ខេត្តពោធិ៍សាត់ ៖ រយៈពេលមួយខែនេះ ក្រុមការងារបច្ចេកទេសក្រសួង និងមន្ទីរធនធានទឹក និងឧតុនិយមខេត្តពោធិ៍សាត់ បានចុះអន្តរាគមន៍បូមទឹក ជួយសង្គ្រោះស្រូវប្រាំងប្រជាកសិករ ចំនួន០៣ឃុំ នៅក្រុងពោធិ៍សាត់…
ខេត្តពោធិ៍សាត់ ៖ រយៈពេលមួយខែនេះ ក្រុមការងារបច្ចេកទេសក្រសួង និងមន្ទីរធនធានទឹក និងឧតុនិយមខេត្តពោធិ៍សាត់ បានចុះអន្តរាគមន៍បូមទឹក ជួយសង្គ្រោះស្រូវប្រាំងប្រជាកសិករ ចំនួន០៣ឃុំ នៅក្រុងពោធិ៍សាត់ និងស្រុកកណ្ដៀង ដែលត្រូវការទឹកជាចាំបាច់ ដើម្បីបន្តការលូតលាស់ដល់ទីបញ្ចប់ ។
លោក កែវ វ័យ ប្រធានមន្ទីរធនធានទឹក និងឧតុនិយមខេត្តពោធិ៍សាត់ បានឱ្យដឹងថា កិច្ចអន្តរាគមន៍បានអនុវត្តចាប់តាំងពីថ្ងៃទី២៧ ខែធ្នូ ឆ្នាំ២០២៤ ដោយប្រើប្រាស់ម៉ាស៊ីនបូមទឹកចល័តកម្លាំង៦៥សេះ ចំនួន០៣គ្រឿង បូមចេញពីស្ទឹងពោធិ៍សាត់បញ្ចូលតាមប្រឡាយមេ ដើម្បីឲ្យប្រជាកសិករបូមបន្តចូលស្រែរៀងៗខ្លួន។ ម៉ាស៊ីនចល័តទាំង០៣គ្រឿង ទី១នៅសង្កាត់ព្រៃញី ក្រុងពោធិ៍សាត់ ទី២ នៅឃុំកោះជុំ និងទី៣ នៅឃុំអន្លង់វិល ស្រុកកណ្ដៀង។ ការបូមទឹកសង្គ្រោះស្រូវប្រាំង ជូនប្រជាកសិករនេះ អាចជួយបានតែកន្លែងណាមានប្រភពទឹកតែប៉ុណ្ណោះ បើគ្មានប្រភពទឹកមិនអាចជួយបាននោះទេ ដូចជានៅឃុំស្វាយដូនកែវ ឃុំអូរតាប៉ោង និងឃុំមួយចំនួនទៀត នៅស្រុកបាកានជាដើម ។
លោក កែវ វ័យ បញ្ជាក់ថា រដ្ឋបាលខេត្តអនុញ្ញាតឲ្យប្រជាកសិករ ធ្វើស្រែប្រាំងតែ២ម៉ឺនហិកតាប៉ុណ្ណោះ ទូទាំងខេត្តពោធិ៍សាត់ ប៉ុន្តែបងប្អូនបានធ្វើលើសការកំណត់ រហូតដល់ជាង៥ម៉ឺនហិកតាឯណោះ ទើបបណ្ដាលឲ្យខ្វះទឹកស្រោចស្រពពាក់កណ្ដាលទីបែបនេះ។ នៅតាមប្រឡាយ បឹងបួរ អូរ ព្រែក និងស្រះ ត្រូវបានបងប្អូនប្រជាកសិករ បូមយកទឹកបញ្ចូលស្រែគ្មានសល់ ធ្វើឲ្យរីងស្ងួតហួតហែង បង្កការលំបាកដល់សត្វពាហនៈទៀតផង។ ជាក់ស្ដែង នៅក្រុងពោធិ៍សាត់ និងស្រុកកណ្ដៀង ចំនួនផ្ទៃដី ដែលត្រូវអន្តរាគមន៍ តែ៥២០ហិកតាទេ ប៉ុន្តែបងប្អូនតាមឃុំសង្កាត់នីមួយៗ ធ្វើលើសកំណត់ ក៏ក្រុមការងារនៅតែបន្តជួយបូមអន្តរាគមន៍រហូតដែរ។ គិតត្រឹមថ្ងៃទី២៣ ខែមករា ឆ្នាំ២០២៥ លទ្ធផលអន្តរាគមន៍ប្រចាំថ្ងៃ បានចំនួន៧១៦ហិកតា ហើយក្រុមការងារ មិនទាន់ដកម៉ាស៊ីនចេញនៅឡើយទេ ។
សូមបញ្ជាក់ថា ខេត្តពោធិ៍សាត់ មានប្រភពទឹកចំនួន០៣កន្លែង សម្រាប់យកទឹកមកប្រើប្រាស់លើវិស័យកសិកម្ម ទី១. ទំនប់ទី៣ ទី២. ទំនប់ទី៥ និងទី៣. ទឹកស្ទឹងពោធិ៍សាត់ ។ នៅក្នុងស្ទឹងពោធិ៍សាត់ មានទំនប់ដំណាក់អំពិល ទំនប់ដំណាក់ឈើក្រំ និងទំនប់ក្បាលហុងចារឹក សម្រាប់បញ្ចាល់ទឹកចូលទៅប្រឡាយមេ ដើម្បីចែកចាយតាមប្រឡាយជើងក្អែប បញ្ចូលទៅតាមស្រែបន្តទៀត។ ឆ្នាំ២០២៤-២០២៥នេះ ដោយសារប្រជាកសិករធ្វើស្រែប្រាំង លើសផែនការជិត៤ម៉ឺនហិកតា ទើបបណ្ដាលឲ្យខ្វះទឹកខ្លាំងជាងឆ្នាំមុនៗទៅទៀត។ អាងទឹក និងទឹកស្ទឹងពោធិ៍សាត់ប៉ែកខាងលើ ស្ទើរតែអស់ទឹករលីងទៅហើយ មិនអាចរកប្រភពទឹកពីណា មកជួយអន្តរាគមន៍បាននោះទេ ប៉ុន្តែបើទំនប់ស្ទឹងពោធិ៍សាត់ ២សាងសង់រួច ខេត្តពោធិ៍សាត់នឹងលែងខ្វះទឹកប្រើប្រាស់ នៅរដូវប្រាំងទៀតហើយ ៕
ចែករំលែកព័តមាននេះ