ខេត្តសៀមរាប ៖ សួន Angkor Wildlife & Aquarium គឺជាមជ្ឈមណ្ឌលដែលបង្កើតឡើងក្នុងគោលបំណងអភិរក្ស និងជួយសង្គ្រោះសត្វជាច្រើនប្រភេទ ដោយផ្តោតសំខាន់លើការអភិរក្សសត្វទឹក…
ខេត្តសៀមរាប ៖ សួន Angkor Wildlife & Aquarium គឺជាមជ្ឈមណ្ឌលដែលបង្កើតឡើងក្នុងគោលបំណងអភិរក្ស និងជួយសង្គ្រោះសត្វជាច្រើនប្រភេទ ដោយផ្តោតសំខាន់លើការអភិរក្សសត្វទឹក និងសត្វព្រៃដូចជា សត្វល្មូន និងប្រពើភ្នំ ។ មជ្ឈមណ្ឌលនេះក៏មានបំណងផ្តល់ប្រយោជន៍ដល់ការអប់រំ សិក្សាស្រាវជ្រាវ និងការជួយសង្គ្រោះសត្វដែលមានរងគ្រោះផងដែរ ។
លោក អុល វ៉ាន់ដា ប្រធានផ្នែកលក់ និងទីផ្សារ Angkor Wildlife & Aquarium បានឱ្យដឹងថា សួននេះបើកចាប់តាំងពីឆ្នាំ ២០២២ ។ ហើយមុនពេលបើកក្នុងគោលគំនិតដើមធ្វើវាឱ្យទៅជាមជ្ឈមណ្ឌលជួយសង្គ្រោះ និងស្តារសម្បទាសត្វ គម្រោងអភិរក្ស និងអប់រំជាច្រើនទៀតផង ។ លោកបញ្ជាក់ថា មជ្ឈមណ្ឌលនេះរួមផ្សំទៅដោយធាតុ ៤ សំខាន់ៗ គឺមានសត្វទឹក ដែលមាន ២ ប្រភេទផ្សេងគ្នា គឺសត្វទឹកប្រៃ និងសត្វទឹកសាប ។
សត្វទឹកសាប មានត្រីមកពីទន្លេសាប និងទន្លេមេគង្គ និងប្រភេទត្រីទឹកសាបមកពីអាម៉ាហ្សូន ដើម្បីឱ្យអ្នកទស្សនា និងអ្នកសិក្សារៀនសូត្រទាំងឡាយអាចធ្វើការប្រៀបធៀបគ្នាបាន ។ សម្រាប់ទឹកប្រៃ មានទាំងត្រីឆ្លាម ត្រីបបែល និងសត្វចម្រុះផ្សេងៗ ។
ចំពោះសត្វព្រៃ មជ្ឈមណ្ឌលបានសហការយ៉ាងជិតស្និតជាមួយអង្គការក្រៅរដ្ឋាភិបាលមួយចំនួនក្នុងការអភិរក្ស និងសង្គ្រោះ ដែលមានសត្វខ្លះបានជួយសង្គ្រោះតាំងពីតូច ហើយសត្វខ្លះទៀតជួយសង្គ្រោះពីការរត់ពន្ធផ្សេងៗ ។ សហការគ្នាដើម្បីផ្តល់និតិសម្បទា បើសត្វមានរបួសព្យាបាល បើសត្វមានកាយសម្បទាល្អព្រលែងចូលព្រៃ ដោយសហការជាមួយអ្នកជំនាញ ។
លោកឱ្យដឹងទៀតថា សត្វល្មូន មានសត្វល្មូនដល់ទៅ ៤៥ ប្រភេទផ្សេងគ្នា និងមានជាច្រើនរយក្បាល ដើម្បីឱ្យសិស្សានុសិស្សសិក្សារៀនសូត្រ ហើយសិស្សបានចាប់អារម្មណ៍ច្រើន ។
ដោយឡែក ប្រពើភ្នំ ជាសត្វដែលយើងខិតខំប្រឹងប្រែងសហការជាមួយអង្គការក្រៅរដ្ឋាភិបាល ដើម្បីអភិរក្ស និងបង្កាត់ពូជ ដើម្បីបង្កើនចំនួនឱ្យកើនឡើង ។ ហើយតាំងពីឆ្នាំ ២០២២ មកដល់បច្ចុប្បន្នបានបង្កាត់ពូជ និងព្រលែងចំនួន ៣ លើករួចមកហើយ មានចំនួន ៧១ ក្បាល នៅក្នុងព្រៃអភិរក្ស សៀមប៉ាង ជាកន្លែងមានសុវត្ថិភាព ។ ក្រពើមួយចំនួនបានបំពាក់កាមេរ៉ា និង GPS ឱ្យដឹងថា វាពងនៅទីណា ដើម្បីជួយការពារសម្បុករបស់វា ។
លោក អុល វ៉ាន់ដា បញ្ជាក់ទៀតថា មជ្ឈមណ្ឌលមានកម្មវិធីសង្គ្រោះសត្វផ្ទាល់ ដូចជាសត្វរងគ្រោះដោយសារភ្លើងឆេះព្រៃ គឺយើងទទួលព្យាបាលសត្វរហូតទាល់តែជា ទើបព្រលែងចូលដែនធម្មជាតិវិញ ។
សួន Angkor Wildlife & Aquarium ស្ថិតនៅក្នុងស្រុកសូត្រនិគម ខេត្តសៀមរាប ហើយទាក់ទងការអប់រំ លោក អុល វ៉ាន់ដា បានឱ្យដឹងទៀតថា មកដល់បច្ចុប្បន្នមជ្ឈមណ្ឌលបានសហការជាមួយរដ្ឋបាលខេត្តសៀមរាប ដែលអនុញ្ញាតឱ្យសិស្សសាលា និងគ្រឹះស្ថានអប់រំគ្រប់លំដាប់ថ្នាក់ទាំងអស់របស់ខេត្ត មានលទ្ធភាពចូលទស្សនា សិក្សាស្រាវជ្រាវនៅទីនេះ ដែលតាំងពីខែកុម្ភៈ ឆ្នាំ ២០២៤ មកទល់បច្ចុប្បន្ននេះទទួលបានសិស្ស និងលោកគ្រូ អ្នកគ្រូ ចំនួន ៤ ម៉ឺននាក់រួចមកហើយ ៕
ចែករំលែកព័តមាននេះ