យន្តហោះចម្បាំង F-35 ត្រូវបានរំពឹងនឹងឃើញវត្តមានក្នុងតំបន់អាស៊ីប៉ាស៊ីហ្វិកដល់ ៣០០គ្រឿង នៅឆ្នាំ ២០៣៥
ប្រទេសសិង្ហបុរី ៖ ក្រុមហ៊ុនផលិតអាវុធ Lockheed Martin របស់សហរដ្ឋអាមេរិក រំពឹងថានឹងឃើញយន្តហោះចម្បាំង F-35 ជំនាន់ទី ៥…
ប្រទេសសិង្ហបុរី ៖ ក្រុមហ៊ុនផលិតអាវុធ Lockheed Martin របស់សហរដ្ឋអាមេរិក រំពឹងថានឹងឃើញយន្តហោះចម្បាំង F-35 ជំនាន់ទី ៥ ប្រហែល ៣០០ គ្រឿង កំពុងប្រតិបត្តិការក្នុងតំបន់អាស៊ីប៉ាស៊ីហ្វិក នៅឆ្នាំ ២០៣៥។ នេះបើតាមនាយកប្រតិបត្តិជាន់ខ្ពស់ម្នាក់របស់ក្រុមហ៊ុននេះ បានថ្លែងនៅក្នុងពិព័រណ៍យន្តហោះសិង្ហបុរី កាលពីថ្ងៃទី៣ ខែកុម្ភៈ ឆ្នាំ២០២៦។ នេះបើតាមប្រភពពីកាសែតហុងកុង South China Morning Post ចេញផ្សាយនៅថ្ងៃទី៤ ខែកុម្ភៈ ឆ្នាំ២០២៦។
លោក Steve Sheehy អនុប្រធានអភិវឌ្ឍន៍អាជីវកម្មអន្តរជាតិផ្នែកអាកាសចរណ៍របស់ក្រុមហ៊ុន Lockheed Martin បានធ្វើការព្យាករណ៍នេះ អំឡុងសន្និសីទសារព័ត៌មានមួយ ដែលលោកលើកឡើងពីការលេចចេញនូវការគំរាមកំហែងនៅក្នុងតំបន់ និងអន្តរប្រតិបត្តិការដែលបានផ្លាស់ប្តូរយ៉ាងខ្លាំង សម្រេចបានដោយប្រទេសជាសម្ព័ន្ធមិត្តអាមេរិក។
ការបង្ហាញវត្តមានរបស់ក្រុមហ៊ុន Lockheed Martin នៅក្នុងកម្មវិធីពិព័រណ៍យន្តហោះនៅសិង្ហបុរី ត្រូវបានមើលឃើញថា កើតឡើងប្រឆាំងនឹងការពង្រីកយ៉ាងឆាប់រហ័សរបស់ប្រទេសចិននៃកងយន្តហោះចម្បាំងជំនាន់ទី ៥ របស់ខ្លួន។
លោក Sheehy បានលើកពីភាពជាដៃគូដ៏រឹងមាំជាមួយសម្ព័ន្ធមិត្តសំខាន់ៗរបស់អាមេរិក នៅក្នុងតំបន់ រួមមាន អូស្ត្រាលី ជប៉ុន សិង្ហបុរី និងកូរ៉េខាងត្បូង ដែលកំពុងតែប្រតិបត្តិការយន្តហោះចម្បាំង F-35 ។ លោកបន្តថា ប្រទេសជប៉ុន និងសិង្ហបុរី បានបញ្ជាទិញទាំងយន្តហោះចម្បាំង F-35A និង F-35B។ ជប៉ុនត្រូវបានព្យាករណ៍ថានឹងក្លាយជាប្រទេសដែលប្រតិបត្តិការយន្តហោះចម្បាំង F-35 ច្រើនជាងគេទី២នៅលើពិភពលោក បន្ទាប់ពីសហរដ្ឋអាមេរិក ខណៈតំណែងនេះ ត្រូវបានកាន់កាប់កាលពីឆ្នាំមុនដោយអូស្ត្រាលីដែលមានចំនួន ៧២ គ្រឿង ចំណែកកូរ៉េខាងត្បូងកំពុងប្រតិបត្តិការយន្តហោះចម្បាំង F-35A ចំនួន ៤០ គ្រឿង និងកំពុងសម្លឹងរកការបញ្ជាទិញពី ៥ ទៅ ២០ គ្រឿងថែមទៀត។
ក្រុមហ៊ុន Lockheed Martin សម្រេចបានការលក់យន្តហោះចម្បាំង F-35 ចំនួន ១៩១ គ្រឿង ដែលជាការបំបែកកំណត់ត្រា កាលពីឆ្នាំមុន ហើយកំពុងស្ថិតលើផ្លូវដើម្បីលក់យន្តហោះចម្បាំងប្រភេទនេះ ចំនួន ១៥៦ គ្រឿងថែមទៀតនៅឆ្នាំនេះ។
យន្តហោះចម្បាំងជំនាន់ទី ៥ ជាធម្មតាមានសមត្ថភាពបំបាំងកាយខ្ពស់ (គេចពីរ៉ាដា) និងជា Supercruise ដែលមានន័យថា ហោះនៅក្នុងល្បឿនលឿនជាងសំឡេង ហើយក៏ត្រូវបានបំពាក់ប្រព័ន្ធអេឡិចត្រូនិចអាកាសចរណ៍ទំនើប (Avionic) ជាច្រើនរួមបញ្ចូលគ្នា។ ជាមួយភាពបត់បែនខ្ពស់ និងការដឹងអំពីស្ថានភាពកាន់តែប្រសើរឡើងធ្វើឱ្យយន្តហោះចម្បាំងជំនាន់ទី ៥ មានប្រសិទ្ធភាពជាងមុន បើធៀបនឹងយន្តហោះជំនាន់មុន ជាពិសេស អាចគ្រប់គ្រងដែនអាកាសបានល្អជាង តាមរយៈបេសកកម្មផ្លូវអាកាស។
ការអភិវឌ្ឍ និងពង្រីកកងយន្តហោះចម្បាំងបានយ៉ាងឆាប់រហ័សរបស់ប្រទេសចិន កាលពីឆ្នាំមុន ជាពិសេសទៅលើយន្តហោះ J-20 និង J-35 ធ្វើឱ្យកក្រើកកងយន្តហោះចម្បាំងពិភពលោក។ បើតាមរបាយការណ៍មួយកាលពីថ្មីៗនេះ ដោយវិទ្យាស្ថាន Royal United Services Institute មានមូលដ្ឋាននៅទីក្រុងឡុងដ៍ ចក្រភពអង់គ្លេស បានរកឃើញថា សមត្ថភាពរបស់ចិនក្នុងការប្រកួតប្រជែងអំណាចផ្លូវអាកាសជាមួយលោកខាងលិច នៅក្នុងរយៈពេល ៥ ឆ្នាំកន្លងមកនេះ មានការរីកចម្រើនយ៉ាងខ្លាំង៕
ចែករំលែកព័តមាននេះ