រាជធានីភ្នំពេញ ៖ គិតមកដល់ថ្ងៃទី២៦ ខែមករា ឆ្នាំ២០២៥ វឌ្ឍនភាពនៃគម្រោងអភិវឌ្ឍន៍ទំនប់ដងកាំបិតក្រោមហិរញ្ញប្បទានពីសាធារណៈរដ្ឋប្រជាមានិតចិន ស្ថិតនៅលើស្ទឹងសែនក្នុងខេត្តព្រះវិហារ និងខេត្តកំពង់ធំ បច្ចុប្បន្នសម្រេចបានលទ្ធផលប្រមាណ៤៨% ។…
រាជធានីភ្នំពេញ ៖ គិតមកដល់ថ្ងៃទី២៦ ខែមករា ឆ្នាំ២០២៥ វឌ្ឍនភាពនៃគម្រោងអភិវឌ្ឍន៍ទំនប់ដងកាំបិតក្រោមហិរញ្ញប្បទានពីសាធារណៈរដ្ឋប្រជាមានិតចិន ស្ថិតនៅលើស្ទឹងសែនក្នុងខេត្តព្រះវិហារ និងខេត្តកំពង់ធំ បច្ចុប្បន្នសម្រេចបានលទ្ធផលប្រមាណ៤៨% ។ នេះបើយោងតាមបណ្តាញសង្គមរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ។
សម្តេចមហាបវរធិបតី បានលើកឡើងថា គម្រោងអភិវឌ្ឍន៍ទំនប់ដងកាំបិតនឹងផ្តល់ផលអត្ថប្រយោជន៍ជូនដល់ប្រជាកសិកររួមមាន ៖ -ប្រជាកសិករចំនួន ២៥.០០០ គ្រួសារស្មើនឹង៨៥.៣០០នាក់ ស្ថិតក្នុងស្រុកបារាយណ៍ ស្រុកកំពង់ស្វាយ ស្រុកប្រាសាទសំបូរ ស្រុកសណ្តាន់ ស្រុកសន្ទុក និងស្រុកស្ទោង ខេត្តកំពង់ធំនឹងទទួលបានទឹកស្រោចស្រពគ្រប់គ្រាន់សម្រាប់ដំណាំស្រូវដំណាំរួមផ្សំ និងទឹកប្រើប្រាស់ប្រចាំថ្ងៃ ។ -ផ្តល់ទឹកស្រោចស្រពលើផ្ទៃដីស្រែនៅផ្នែកខាងក្រោមចំនួន១៣១.៣២៣ហិកតា -បង្កើនទិន្នផលស្រូវពី៤តោន ទៅ៥,៤ តោន/ហិកតា អត្រាទិន្នផលកើនឡើងដល់៣៥ ភាគរយ និងអាចបង្កើនទិន្នផល១៨៣.៨០០តោន/ប្រចាំឆ្នាំ ។
សម្តេចបន្តថា ការងារសំណង់សំខាន់នៅក្នុងគម្រោងនេះរួមមាន ៖ ទំនប់ស្ទាក់ទឹក សំណង់បង្ហៀរទឹក ទំនប់បេតុង តំបន់គ្រប់គ្រង និងផ្លូវចូលទីតាំងទំនប់ ។ កម្ពស់ទំនប់អតិបរមា៣០.០ម៉ែត្រ ខ្នងទំនប់ទំហំ៤០.០ម៉ែត្រ ទំនប់មានប្រវែង ២.៦៨០ម៉ែត្រ និងទំនប់បង្ហៀរទឹកប្រវែង៣០៦ម៉ែត្រ ៕
ចែករំលែកព័តមាននេះ