សហរដ្ឋអាមេរិក ៖ លោក Mike Tyson បានចំណាយលុយរកបានពីការប្រកួតចាញ់យុវជន Jake Paul កាលពីខែវិច្ឆិកា ឆ្នាំមុន ទិញផ្ទះដ៏ប្រណិតតម្លៃ ១៣,៤លានដុល្លារអាមេរិក ស្ថិតនៅក្នុងតំបន់ដ៏ល្បី Tierra del Rey Estates ​របស់រដ្ឋផ្លរីដា (Florida) ដោយមានទំហំ ១១,០០០ម៉ែត្រការ៉េ មកជាមួយនឹងស្រះទឹកឯកជនមួយផងដែរ។ នេះបើយោងតាមប្រភពពីកាសែត Daily Mail និង The Mirror កាលពីពេលថ្មីៗនេះ។

គួររំលឹកថា អតីតជើងឯកប្រដាល់សកលទម្ងន់ធ្ងន់ពិភពលោក សញ្ជាតិអាមេរិក Mike Tyson ឈានដល់វ័យ៥៨ឆ្នាំ បានត្រលប់ឡើងសង្វៀនប្រកួតម្តងវិញ ស្ថិតនៅកីឡដ្ឋាន AT&T រដ្ឋតិចសាស់ Texas នៅក្នុងការប្រកួតអាជីព៨ទឹក ​ដោយចាញ់ពិន្ទុឯកច្ឆ័ន្ទក្រោមស្នាដៃតារាយូធូបអាមេរិក ប្រែខ្លួនជាកីឡាករប្រដាល់អាជីព Jake Paul វ័យត្រឹម២៨ឆ្នាំ កាលពីថ្ងៃទី១៥ ខែវិច្ឆិកា ឆ្នាំ២០២៤។ ជំនួបដ៏កក្រើកបំផុតមួយនេះ ត្រូវបានចាត់ទុកជាព្រឹត្តិការណ៍ប្រដាល់សកលដ៏ធំបំផុតមួយកាលពីឆ្នាំមុនផងដែរ។

ក្រុមហ៊ុន Netflix បានចាក់ផ្សាយផ្ទាល់ការប្រកួតរវាង Mike Tyson និង Jake Paul នៅទូទាំងពិភពលោក និងបានបំបែកកំណត់ត្រាអ្នកទស្សនារបស់ខ្លួនផងដែរ។ ស្របពេល Jake Paul ត្រូវបានរាយការណ៍ថារកបាន ៤០លានដុល្លារពីជំនួបនេះ។ ចំណែក ម៉ៃ ថៃសាន់ ទទួលបាន ២០លានដុល្លារ។

បើតាមការបង្ហើបពីភ្នាក់ងារអចលនទ្រព្យ Matthew Maschler បានបង្ហាញថា ការទិញផ្ទះដ៏ប្រណិតពីសំណាក់លោក Mike Tyson ដោយសារតែអាជីពកីឡាវាយតេន្នីសកូនស្រីរបស់លោក។ កូនស្រីលោក Mike Tyson ឈ្មោះ Milan អាយុ១៦ឆ្នាំ កំពុងស្ថិតលើផ្លូវទៅរកភាពជោគជ័យនៃអាជីពកីឡាវាយតេន្នីស។ នាងមានទំនាក់ទំនងល្អជាមួយនឹងអតីតកីឡាការិនីវាយតេន្នីសពិភពលោក សញ្ជាតិអាមេរិក Serena Williams ហើយថែមទាំងបានហ្វឹកហាត់ជាមួយអតីតគ្រូបង្វឹករបស់នាង លោក Patrick Mourtagolou នៅប្រទេសបារាំងផងដែរ។ ដូច្នេះការទិញផ្ទះដ៏ប្រណិតនៅ Tierra del Rey Estates ផ្តល់ភាពងាយស្រួលសម្រាប់ ​Mike Tyson ​ធ្វើដំណើរតាមយន្តហោះឯកជនរបស់លោកទៅមកកូនស្រីលេងកីឡាតេន្នីស ដែលជារឿយៗនាងតែលេងនៅតំបន់ឆ្នេរ Delray។ មិនត្រឹមប៉ុណ្ណោះ វាក៏ផ្តល់ភាពងាយស្រួលសម្រាប់ ​Mike Tyson ​នៅពេលលោកចង់ហោះទៅកាន់កន្លែងណាដែលលោកចង់ទៅ ឬត្រលប់មកពីទីតាំងណាមួយផងដែរ។

គួរបញ្ជាក់ថា លោក ​Mike Tyson​ បានប្រកាសចូលនិវត្តន៍តាំងពីឆ្នាំ ២០០៥ មកម្ល៉េះ។ គិតទាំងការចាញ់ចុងក្រោយ ក្រោមស្នាដៃ Jake Paul កំណត់ត្រាអាជីពរបស់មនុស្សដែក Mike Tyson ​ចំនួន ៥៩ប្រកួត ឈ្នះ៥០ដង ចាញ់៧ដង និងចាត់ទុកជាមោឃៈ ឬ No Contest ២ដង ដោយបានផ្តួលគូប្រកួតឱ្យសន្លបសរុប ៤៤ដង៕