រាជធានីភ្នំពេញ ៖ អ្នកនាំពាក្យកងរាជអាវុធហត្ថលើផ្ទៃប្រទេសបានបញ្ជាក់ថា ក្រោយពីស្រាវជ្រាវអស់រយៈពេលប៉ុន្មានថ្ងៃក្រោយមក បានកំណត់មុខសញ្ញាអ្នកបើករថយន្តស៊ីរ៉ែនពាក់ផ្លាកលេខខ.មអូសក្បួនស្ត្រីលក់ឡេទៅស៊ីការគេនោះបានហើយ ដោយម្ចាស់រថយន្តត្រូវមកហៅមកអប់រំ និងទទួលទណ្ឌកម្មវិន័យកងទ័ព ។ លោកឧត្តមសេនីយ៍ត្រី អេង…
រាជធានីភ្នំពេញ ៖ អ្នកនាំពាក្យកងរាជអាវុធហត្ថលើផ្ទៃប្រទេសបានបញ្ជាក់ថា ក្រោយពីស្រាវជ្រាវអស់រយៈពេលប៉ុន្មានថ្ងៃក្រោយមក បានកំណត់មុខសញ្ញាអ្នកបើករថយន្តស៊ីរ៉ែនពាក់ផ្លាកលេខខ.មអូសក្បួនស្ត្រីលក់ឡេទៅស៊ីការគេនោះបានហើយ ដោយម្ចាស់រថយន្តត្រូវមកហៅមកអប់រំ និងទទួលទណ្ឌកម្មវិន័យកងទ័ព ។
លោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានលើកឡើងក្នុងសេចក្តីប្រកាសព័ត៌មាននាថ្ងៃទី១៣ មករា ឆ្នាំ២០២៥ ថា បានរកអ្នកបើករថយន្តនាំក្បួនស្ត្រីលក់ឡេនោះឃើញហើយ គឺរថយន្តស៊ីរ៉ែនពាក់ស្លាកលេខខេមរភូមិន្ទ 02 2-1871 ។
លោកបន្តថា តាមសេចក្តីរាយការណ៍របស់ឯកឧត្តមឧត្តមសេនីយ៍ឯក រ័ត្ន ស្រឹង មេបញ្ជាការរងកងរាជអាវុធហត្ថលើផ្ទៃប្រទេស មេបញ្ជាការកងរាជអាវុធហត្ថរាជធានីភ្នំពេញ អនុវត្តតាមបទបញ្ជាយ៉ាងម៉ឺងម៉ាត់របស់លោកនាយឧត្តមសេនីយ៍ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស កម្លាំងជំនាញបានធ្វើការស្រាវជ្រាវ និងចុះទៅដល់ទីតាំងលំនៅឋានរបស់បុគ្គលដែលពាក់ព័ន្ធនឹងរថយន្តស៊ីរ៉ែនអូសក្បួននោះ ហើយបានកោះអញ្ជើញបុគ្គលពាក់ព័ន្ធមកបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីបំភ្លឺ។
ក្រោយពីបានស្តាប់ដំណើររឿង និងអង្គហេតុរួចមក កម្លាំងជំនាញកងរាជអាវុធហត្ថ បានអប់រំបុគ្គលដែលពាក់ព័ន្ធឱ្យយល់ដឹងអំពីការប្រើប្រាស់ភ្លើងសញ្ញាពិសេស សូរស័ព្ទពិសេស សិទ្ធិអាទិភាពធ្វើចរាចរណ៍ក្នុងព្រះរាជាណាចក្រកម្ពុជា និងបានធ្វើកិច្ចសន្យា កុំឱ្យប្រព្រឹត្តទង្វើបែបនោះតទៀត ជាពិសេស ត្រូវចូលរួមគោរពច្បាប់លិខិតបទដ្ឋានគតិយុត្តនានា។
លោកឧត្តមសេនីយ៍បញ្ជាក់ថា «ចំពោះម្ចាស់រថយន្តស៊ីរើនពាក់ស្លាកលេខ ខេមរភូមិន្ទ02 2-1871បានប្រគល់ជូនអង្គភាពសាមី ដើម្បីចាត់វិធានការអនុវត្តទណ្ឌកម្មវិន័យកងទ័ព»។
សូមបញ្ជាក់ថា កាលពីថ្ងៃទី៦ មករា កន្លងមក មានការរិះគន់និងវែកញែកជាខ្លាំងទៅលើករណីនារីស្អាតជាអ្នកលក់អនឡាញបានជិះរថយន្តទំនើប ដោយមានរថយន្តផ្សេងបំពាក់ផ្លាកលេខខេមរភូមិន្ទ និងបើកភ្លើងសារ៉ែននាំផ្លូវទៅស៊ីការគេពេញបណ្តាញសង្គមហ្វេសប៊ុក ៕
ចែករំលែកព័តមាននេះ