រាជធានីភ្នំពេញ ៖ ក្រោយទទួលរងការរិៈគន់ផ្ទួនៗជុំវិញការចាប់គូកីឡាករមុខដដែលៗឱ្យឡើងប្រកួត៤-៥ដងក្នុង១ខែ ជាពិសេសអនុសាសន៍របស់សម្ដេចតេជោឱ្យគិតគូរឡើងវិញពីបញ្ហាដូចរៀបរាប់ខាងលើ សហព័ន្ធកីឡាប្រដាល់គុនខ្មែរបានជូនដំណឹងទៅគ្រប់ស្ថានីយទូរទស្សន៍ សង្វៀន សមាគម ក្លិបប្រដាល់គុនខ្មែរ និងដៃគូសហការ មិនឲ្យចាប់គូកីឡាករ-កីឡាការិនីក្នុងម្នាក់មិនឲ្យលើសពី២ដងក្នុង១ខែឡើយ។…
រាជធានីភ្នំពេញ ៖ ក្រោយទទួលរងការរិៈគន់ផ្ទួនៗជុំវិញការចាប់គូកីឡាករមុខដដែលៗឱ្យឡើងប្រកួត៤-៥ដងក្នុង១ខែ ជាពិសេសអនុសាសន៍របស់សម្ដេចតេជោឱ្យគិតគូរឡើងវិញពីបញ្ហាដូចរៀបរាប់ខាងលើ សហព័ន្ធកីឡាប្រដាល់គុនខ្មែរបានជូនដំណឹងទៅគ្រប់ស្ថានីយទូរទស្សន៍ សង្វៀន សមាគម ក្លិបប្រដាល់គុនខ្មែរ និងដៃគូសហការ មិនឲ្យចាប់គូកីឡាករ-កីឡាការិនីក្នុងម្នាក់មិនឲ្យលើសពី២ដងក្នុង១ខែឡើយ។ នេះបើយោងតាមសេចក្តីជូនដំណឹងរបស់សហព័ន្ធកីឡាប្រដាល់គុនខ្មែរ ដែលទើបផ្សព្វផ្សាយលើទំព័រហ្វេសប៊ុក នារសៀលថ្ងៃទី៧ មករា។
សហព័ន្ធកីឡាប្រដាល់គុនខ្មែរបានណែនាំឲ្យបណ្ដាសង្វៀនទាំងអស់ មានសិទិ្ធចាប់គូកីឡាករ-កីឡាការិនីក្នុងម្នាក់ត្រឹមតែ២ប្រកួតប៉ុណ្ណោះក្នុង១ខែ។ សហព័ន្ធនឹងពិន័យទៅលើស្ថានីយ ក្លិប ឬសង្វៀន រួមទាំងកីឡាករ-កីឡាការិនី ដែលមិនអនុវត្តតាមបទបញ្ជាមួយនេះ។ បទបញ្ជាថ្មីនេះ មានសុពលភាពចាប់ពីថ្ងៃទី១ ខែមករា ឆ្នាំ២០២៥តទៅ ។ គោលបំណង នៃបទបញ្ជាថ្មីរបស់សហព័ន្ធនេះ គឺចង់ឲ្យកីឡាករ-កីឡាការិនី មានពេលសម្រាកគ្រប់គ្រាន់ ក្រោយពេលប្រកួតរួច យ៉ាងហោចណាស់រយៈពេល២សប្ដាហ៍ដែរ លើកលែងតែការប្រកួតជាលក្ខណៈម៉ារ៉ាតុន និងការប្រកួតមួយចំនួនផ្សេងទៀត ដែលមានការអនុញ្ញាតពីសហព័ន្ធកីឡាប្រដាល់គុនខ្មែរ។
បើតាមបទបញ្ជារបស់សហព័ន្ធដដែល ក្នុងករណី ដែលកីឡាករ-កីឡាការិនីត្រូវបានគូប្រកួតវាយចំក្បាលធ្ងន់ធ្ងរ ត្រូវសម្រាកយ៉ាងតិច៣សប្ដាហ៍។ ក្រោយពេលសម្រាក៣សប្ដាហ៍ហើយ កីឡាករ-កីឡាការិនីដដែលនេះ ត្រូវបានគេវាយចំក្បាលឲ្យធ្ងន់ធ្ងរក្នុងការប្រកួតជាលើកទី២ នោះត្រូវឲ្យពួកគេសម្រាក៦សប្ដាហ៍។ មុនពេលចាប់គូប្រកួត កីឡាករ-កីឡាការិនី តម្រូវឲ្យពិនិត្យកាយសម្បទា សុខភាពជាមួយគ្រូពេទ្យប្រចាំសហព័ន្ធកីឡាប្រដាល់គុនខ្មែរ ។ សហព័ន្ធ នឹងបង្កើតក្រុមការងារត្រួតពិនិត្យលើការចាប់
គូប្រកួតប្រចាំសប្ដាហ៍។ កីឡាករ-កីឡាការិនី ដែលនឹងត្រូវប្រកួតលើសង្វៀនណាមួយហើយ នឹងមិនត្រូវអនុញ្ញាតឲ្យទៅចាប់គូនៅសង្វៀនផ្សេងក្នុងសប្ដាហ៍តែមួយឡើយ។ ចំណែកការកំណត់តម្លៃខ្លួនកីឡាករ-កីឡាការិនី និងតម្លៃក្លិប ជាសមត្ថកិច្ចរបស់ស្ថានីយទូរទស្សន៍ ដៃគូអភិវឌ្ឍ ឬម្ចាស់កម្មវិធី។
សហព័ន្ធ ក៏ព្រមានពីការដាក់ពិន័យកីឡាករ-កីឡាការិនី ដែលមិនអនុវត្តតាមបទបញ្ជានេះដូចជា សហព័ន្ធនឹងណែនាំជាលាយលក្ខណ៍អក្សរ ក្នុងករណីខុសជាលើកទី១ ។ ក្នុងករណីខុសជាលើកទី២ សហព័ន្ធនឹងផ្អាកការប្រកួតរបស់កីឡាករ-កីឡាការិនីរូបនោះរយៈពេល៦សប្ដាហ៍។
ប្រសិនជាបន្ដធ្វើខុសបទបញ្ជាជាលើកទី៣ សហព័ន្ធនឹងផ្អាកការប្រកួតរយៈពេល៣ខែ ហើយអាចឈានទៅ៦ខែប្រសិនជាធ្វើខុសជាលើកទី៤ ។ សហព័ន្ធកីឡាប្រដាល់គុនខ្មែរនឹងលុបឈ្មោះកីឡាករ-កីឡាការិនីនោះចេញ និងមិនឲ្យមានឈ្មោះប្រកួតជារៀងរហូត ប្រសិនជាបន្ដខុសជាលើកទី៥។
សហព័ន្ធកីឡាប្រដាល់គុនខ្មែរ សង្ឃឹមយ៉ាងមុតមាំថា សមាគម ក្លិបប្រដាល់គុនខ្មែរទាំងអស់ នឹងអនុវត្តនូវបទបញ្ជាប្រកួតនេះឱ្យបានខ្ជាប់ខ្ជួនដើម្បីរក្សាបាននូវការអភិវឌ្ឍកីឡាប្រដាល់គុនខ្មែរ ដែលជាកីឡាអត្តសញ្ញាណជាតិយើងឱ្យរីកចម្រើនប្រកបដោយចីរភាព និងបរិយាប័ន្ន៕
ចែករំលែកព័តមាននេះ