ខេត្តកំពង់ចាម ៖ ក្រោមការអាណិតអាសូរ ពីសំណាក់លោកជំទាវ សេម នឿន ភរិយាលោករដ្ឋមន្ត្រីក្រសួងប្រៃសណីយ៍ និងទូរគមនាគមន៍កម្ពុជា បានដឹកនាំប្រតិភូស្ត្រីមួយក្រុមនាំយកនូវអំណោយដ៏ច្រើនសន្ធឹកសន្ធាប់ជួយ ឧបត្ថម្ភដល់គ្រួសារចាស់ជរាអត់ទីពឹង ដែលមានសមាជិក ខ្វិនដើរមិនរួចដល់ទៅចំនួន៣នាក់ កាលពីព្រឹកថ្ងៃទី២៦ ខែមិថុនា
ខេត្តកំពង់ចាម ៖ ក្រោមការអាណិតអាសូរ ពីសំណាក់លោកជំទាវ សេម នឿន ភរិយាលោករដ្ឋមន្ត្រីក្រសួងប្រៃសណីយ៍ និងទូរគមនាគមន៍កម្ពុជា បានដឹកនាំប្រតិភូស្ត្រីមួយក្រុមនាំយកនូវអំណោយដ៏ច្រើនសន្ធឹកសន្ធាប់ជួយ ឧបត្ថម្ភដល់គ្រួសារចាស់ជរាអត់ទីពឹង ដែលមានសមាជិក ខ្វិនដើរមិនរួចដល់ទៅចំនួន៣នាក់ កាលពីព្រឹកថ្ងៃទី២៦ ខែមិថុនា ឆ្នាំ២០១១ ស្ថិតនៅភូមិទួលរកា ឃុំពាមកោះស្នា ស្រុកស្ទឹងត្រង់ ដោយមានការចូលរួមពីលោកមេភូមិទួលរកា និងក្រុមប្រឹក្សា ឃុំផងដែរ ។
លោកយាយឈ្មោះហេង ម៉េត អាយុ៨០ឆ្នាំ មានប្រសាសន៍ប្រាប់កោះសន្តិភាពទាំងបង្ហូរទឹកភ្នែកថា នៅក្នុងសមាជិកក្រុមគ្រួសាររបស់ គាត់មានអ្នកជរាពិការ៣នាក់គឺ១-ប្តីរបស់គាត់ឈ្មោះទៀង ស្រ៊ាង អាយុ៨៨ឆ្នាំ ២-កូនប្រុសបងឈ្មោះស្រ៊ាង ស្រេង អាយុ៦១ឆ្នាំ និងកូនប្អូនឈ្មោះស៊្រាង ហុង អាយុ៥៦ឆ្នាំ ត្រូវបានគាត់ជាអ្នកថែរក្សាទាំងយប់ទាំងថ្ងៃលំបាកបំផុត។ លោកយាយមានប្រសាសន៍បន្តថា សព្វថ្ងៃដោយសារតែដីនៅភូមិដីដុះ បានបាក់អស់មិនអាចធ្វើផ្ទះនៅបាននោះ ទើបគាត់២នាក់ប្តីប្រពន្ធ និងកូនប្រុសទាំង២ ត្រូវក្មួយឈ្មោះស្រី នាង អាយុ៤៥ឆ្នាំ យកមករស់នៅជាមួយក្នុងភូមិទួលរកា ។ រាល់ពេលទទួលទានម្តងៗ ត្រូវបានក្មួយ និងអ្នកជិតខាងតែងតែជួយផ្តល់ចំណីអាហារ ។ ប៉ុន្តែមួយរយៈពេលចុងក្រោយនេះ កម្លាំងរបស់គាត់បានចុះខ្សោយហើយ ព្រោះតែនឿយហត់ក្នុងការថែទាំប្តីនិងកូន ទាំងយប់ទាំងថ្ងៃនេះ ។ នៅថ្ងៃក្រោយប្រសិនណា បើអស់ពីគាត់ទៅ ប្តីនិងកូនដែលពិការមិនដឹងថា បានអ្នកណាមើលជំនួសគាត់ទេ មើលទៅ ។
លោកជំទាវសេម នឿន ភរិយាដ៏ឧត្តមរបស់លោករដ្ឋមន្ត្រីសូរ ឃុន មានប្រសាសន៍ដោយគូសបញ្ជាក់ថា នាពេលកន្លងទៅថ្មីៗ លោកជំទាវបានមើលទស្សនាវដ្តីអង្គរធំឃើញចុះផ្សាយពីជីវិតដ៏លំបាករបស់លោកតាលោកយាយរស់នៅភូមិទួលរកា ឃុំពាមកោះស្នា ស្រុកស្ទឹងត្រង់ បានធ្វើឱ្យលោកជំទាវមានក្តីអាណិតអាសូរជាពន់ពេក អាណិតណាស់ ទើបព្រឹកថ្ងៃទី២៦ មិថុនា លោកជំទាវបានបបួលគ្នីគ្នាចូលរួមមានលោកជំទាវម៉ៅ សុន ភរិយាលោកឡៅ សារឿន , លោកជំទាវទន់ ចាយ , លោកស្រីអ៊ុក សារ៉ាន់ , លោកស្រីអ៊ី ផុន, លោកស្រីគង់ លាម , លោកស្រីសៀម ស៊ីណា , លោកស្រីឡុង ចិន្ត្រា , លោកស្រីហែម អ៊ីម , លោកស្រីតែ វួចណយ បានបរិច្ចាគនូវធនធានផ្ទាល់ខ្លួនមានដូចជាអង្ករ៤បាវ , មី៤កេស , ត្រីងៀត៧គីឡូក្រាម , សៀង៦គីឡូក្រាម , ឆៃប៉ូវ ២គីឡូក្រាម , ទឹកស៊ីអ៊ីវ២យួរ , ទឹកត្រី២យួរ , ប៊ីចេង ១គីឡូក្រាម អំបិល២គីឡូក្រាម , ប្រេងឆា១ដប , ត្រីខកំប៉ុង៣ឡូ , ទឹកដោះគោ១យួរ, ស្ករស៣គីឡូក្រាម , ម្សៅសាប៊ូ២កញ្ចប់ និងអមដោយថវិកាចំនួន១លានរៀលផងដែរ ។ ក្រៅពីនេះបានទិញសម្លៀកបំពាក់ចំនួន២កំប្លេជូនលោកតា និងលោកយាយ ព្រមទាំងបាយសម្ល១ស្រាក់ពិសារយ៉ាងឆ្ងាញ់សម្រាប់អាហារថ្ងៃត្រង់។ លោកជំទាវសោម នឿន សូរ ឃុន មានជំនឿ យ៉ាងមុតមាំថា នាឱកាសក្រោយលោកជំទាវ និងអញ្ជើញមកទីនេះម្តងទៀត ។
លោកអ៊ាង ឡៃអ៊ីន មេភូមិទួលរកាមានប្រសាសន៍ឱ្យដឹងដែរថា រូបលោកមានសេចក្តីត្រេកអរជាអតិបរមាចំពោះសន្តានចិត្តដ៏ថ្លៃថ្លា របស់លោកជំទាវសេម នឿន សូរ ឃុន ដែលបានឃើញពីជីវិតពិតអ្នកពិការគ្មានទីពឹងចំនួន៤នាក់រស់ដោយសារតែអ្នកជិតខាងចិញ្ចឹមតែប៉ុណ្ណោះ និងសូមមេត្តាឱ្យមានជាបន្តបន្ទាប់ទៀតចំពោះអ្នកក្រីក្រនៅក្នុងភូមិរបស់លោក ។
ក្រោយពីទទួលអំណោយមក លោកយាយ ហេង ម៉េត បានលើកដៃប្រណម្យបួងសួងសូមឱ្យវត្ថុស័ក្តិសិទ្ធិក្នុងលោក មេត្តាតាមជួយថែរក្សាលោកជំទាវ និងសហការីទាំងអស់ សូមឱ្យជួបតែសេចក្តីសុខសាន្តគ្រប់ពេលវេលា ព្រមទាំងមានទ្រព្យសំបូរហូរហៀក្នុងជាតិនេះ និងខាងមុខ ៕
ចែករំលែកព័តមាននេះ