ប្រទេសឥណ្ឌូណេស៊ី ៖ ប្រភពពីអ្នកកាសែតបាល់ទាត់ដ៏ល្បី លោក Fabrizio Romano កាលពីថ្ងៃទី៦ ខែមករា ឆ្នាំ២០២៥ បានឱ្យដឹងថា វីរបុរសបាល់ទាត់ហូឡង់ លោក Patrick Kluivert បានចុះកុងត្រារយៈពេលពីរឆ្នាំ ជាមួយជម្រើសបន្តរយៈពេលពីរឆ្នាំបន្ថែមទៀត ដើម្បីក្លាយជាគ្រូបង្វឹកថ្មីក្រុមជម្រើស​ជាតិឥណ្ឌូណេស៊ី ជំនួសតំណែងគ្រូបង្វឹកជនជាតិកូរ៉េខាងត្បូង លោក Shin Tae-yong ដែលត្រូវបានសហព័ន្ធបាល់ទាត់ឥណ្ឌូណេស៊ីប្រកាសចែកផ្លូវ កាលពីថ្ងៃទី៦ ខែមករា កន្លងទៅ។

ការប្រកាសជាផ្លូវការអំពីវត្តមានរបស់លោក Patrick Kluivert នឹងប្រព្រឹត្តទៅនៅថ្ងៃទី១២ ខែមករា ខាងមុខនេះ នៅក្នុងទីក្រុងហ្សាកាតា។ សមាគមបាល់ទាត់ឥណ្ឌូណេស៊ី បានប្រគល់ភារកិច្ចដល់អតីតខ្សែប្រយុទ្ធឆ្នើមក្រុមមច្ចុរាជពណ៌ទឹកក្រូចហូឡង់វ័យ៤៨ឆ្នាំរូបនេះ ដើម្បីនាំក្រុមជម្រើសជាតិឈុតធំផ្នែកបុរសឈានទៅដល់ការប្រកួតព្រឹត្តិការណ៍ World Cup ជាប្រវត្តិសាស្ត្រ។

ការប្រកាសនេះ ធ្វើឡើងបន្ទាប់ពីការសម្រេចចិត្តចែកផ្លូវរបស់ឥណ្ឌូណេស៊ីជាមួយលោកគ្រូបង្វឹក Shin Tae-yong ដែលកាន់តំណែងនេះជិត៥ឆ្នាំ។ ហើយបើទោះបីជាកាលពីខែមេសា ឆ្នាំ២០២៤ កន្លងទៅ គ្រូបង្វឹកជនជាតិកូរ៉េខាងត្បូងវ័យ៥៤ឆ្នាំរូបនេះ ទទួលបានសេចក្តីទុកចិត្តបន្តកុងត្រារហូតដល់ឆ្នាំ ២០២៧ ក៏ដោយ ក៏ប្រធានសមាគមបាល់ទាត់ឥណ្ឌូណេស៊ី លោក Erick Thohir បានគូសបញ្ជាក់ថា ការសម្រេចចិត្តចែកផ្លូវគ្នានេះ គឺជាការព្រមព្រៀងរវាងភាគីទាំងសងខាង ហើយក៏មិនទាក់ទងនឹងការធ្លាក់ចេញពីពានរង្វាន់ AFF Cup ឆ្នាំ ២០២៤ របស់ឥណ្ឌូណេស៊ី ត្រឹមវគ្គចែកពូលនោះទេ។

ការតែងតាំងរបស់លោក Patrick Kluivert បានបង្ហាញពីការប្តេជ្ញាចិត្តរបស់ឥណ្ឌូណេស៊ី ចំពោះយុទ្ធសាស្ត្រ និងរួមបញ្ចូលទាំងវត្តមានកីឡាករកូនកាត់ហូឡង់-ឥណ្ឌូណេស៊ី ដើម្បីពង្រឹងក្រុម។ យុទ្ធសាស្ត្រនេះទទួលបានជោគជ័យ ដោយឥណ្ឌូណេស៊ីបានឈានដល់វគ្គជម្រុះជុំទី៣ ពានរង្វាន់ World Cup ឆ្នាំ ២០២៦ ប្រចាំទ្វីបអាស៊ី ហើយក៏ជាក្រុមអាស៊ានជោគជ័យបំផុតក្នុងប្រវត្តិសាស្ត្រ ការប្រកួតជម្រុះវគ្គនេះ ក្រោយរកបាន៦ពិន្ទុ ឆ្លងកាត់៦ប្រកួតកន្លងមក។ បច្ចុប្បន្នឥណ្ឌូណេស៊ីស្ថិតនៅចំណាត់ថ្នាក់លេខ៣ ពូល C ដោយមាន ជប៉ុន អូស្ត្រាលី អារ៉ាប៊ីសាអូឌីត បារ៉ែន និង ចិន។

លោក Kluivert ត្រូវបានពិភពបាល់ទាត់ចាត់ទុកយ៉ាងទូលំទូលាយថា គឺជាខ្សែប្រយុទ្ធល្អបំផុតម្នាក់របស់អឺរ៉ុបក្នុងទសវត្សរ៍ឆ្នាំ ១៩៩០ និងដើមឆ្នាំ ២០០០។ លោកបានឈ្នះពានរង្វាន់ UEFA Champions League ជាមួយ Ajax នៅក្នុងឆ្នាំ ១៩៩៥ និងឈ្នះជើងឯកលីគកំពូលអេស្ប៉ាញ La Liga ជាមួយ Barcelona នៅក្នុងឆ្នាំ ១៩៩៩ ។ លោកក៏បានលេងឱ្យក្លិបល្បីៗដូចជា AC Milan, Newcastle United, LOSC Lille, Valencia និង PSV ផងដែរ។

ជាមួយក្រុមជម្រើសជាតិហូឡង់ លោក Kluivert រកបាន៤០គ្រាប់ពីការបង្ហាញខ្លួន ៧៩ប្រកួតគ្រប់កម្មវិធី។ លោករួមចំណែកជួយហូឡង់ឈានដល់វគ្គពាក់កណ្តាលផ្តាច់ព្រ័ត្រ FIFA World Cup ឆ្នាំ ១៩៩៨ និងជើងឯកអឺរ៉ុប UEFA Euro ឆ្នាំ ២០០០ ជាកន្លែងលោកឈរជាកីឡាករស៊ុតបញ្ចូលទីច្រើនជាងគេពោល៥គ្រាប់។

ចាប់តាំងពីចូលនិវត្តន៍ពីអាជីពមក លោក Patrick Kluivert បានកាន់តួនាទីជាច្រើនរួមទាំងជំនួយការគ្រូបង្វឹកក្រុមជម្រើសជាតិហូឡង់ពីឆ្នាំ ២០១២ ដល់ឆ្នាំ ២០១៤ ហើយក៏ជានាយកបាល់ទាត់នៅក្លិប PSG ចាប់ពីឆ្នាំ ២០១៦ ដល់ឆ្នាំ ២០១៧ រួមទាំងតួនាទីជាទីប្រឹក្សាសាលាបាល់ទាត់ផងដែរ៕ ដកស្រង់ ៖ VnExpress និង Khel Now