រាជធានីភ្នំពេញ ៖ បន្ទាប់ពីមានរបួសពេលលេងបាល់ទាត់ហើយមិនអាចឡើងប្រកួតដណ្តើមខ្សែក្រវាត់ នៅថ្ងៃទី៧ ខែមករា ស្អែកនេះ អ្នកប្រដាល់រហស្សនាមអ្នកលេងពូថៅដៃពិឃាដ ធឿន ធារ៉ា បានប្រកាសសុំទោសមហាជនជាអ្នកគាំទ្រ…
រាជធានីភ្នំពេញ ៖ បន្ទាប់ពីមានរបួសពេលលេងបាល់ទាត់ហើយមិនអាចឡើងប្រកួត
ដណ្តើមខ្សែក្រវាត់ នៅថ្ងៃទី៧ ខែមករា ស្អែកនេះ អ្នកប្រដាល់រហស្សនាមអ្នកលេងពូថៅដៃ
ពិឃាដ ធឿន ធារ៉ា បានប្រកាសសុំទោសមហាជនជាអ្នកគាំទ្រ និងអ្នករៀបចំកម្មវិធីប្រកួតជា
សាធារណៈ ។
អ្នកប្រដាល់ជើងខ្លាំងលំដាប់លេខ១របស់កម្ពុជា ធឿន ធារ៉ា បានចេញមុខទទួលកំហុស ចំពោះការធ្វើឱ្យខកខានការប្រកួតម៉ារ៉ាតុងដណ្តើមខ្សែក្រវាត់ក្នុងព្រឹត្តិការណ៍មួយដែលត្រូវធ្វើឡើងនាថ្ងៃទី៧ ខែមករា ខាងមុខនេះ ។
តាមគម្រោង ធឿន ធារ៉ា នឹងត្រូវចាប់ឆ្នោតប្រកួតម៉ារ៉ាតុងដណ្តើមខ្សែក្រវាត់ទម្ងន់៧២គីឡូក្រាម ជាមួយជើងខ្លាំងមកពីបរទេសចំនួន៣នាក់ទៀត រួមមានកីឡាករថៃ កីឡាករបេឡារុស និងកីឡាករបារាំង ។ ប៉ុន្តែការចំណាយពេលជាច្រើនខែ ដើម្បីរៀបចំឱ្យមានការប្រកួតម៉ារ៉ាតុងដណ្តើមខ្សែក្រវាត់ទម្ងន់ធ្ងន់នេះឡើង ត្រូវបានលុបចោលវិញធ្វើឱ្យអ្នកគាំទ្រប្រដាល់ភាគច្រើន ទម្លាក់កំហុសទៅលើ ធឿន ធារ៉ា ដែលមានការធ្វេសប្រហែសនិងបណ្តោយខ្លួនឯងឱ្យមានរបួសនៅក្នុងការប្រកួតបាល់ទាត់មិត្តភាពទៅវិញ។ មុននេះ អ្នកលេងពូថៅដៃពិឃាតរូបនេះ ក៏ត្រូវបានអ្នកគាំទ្ររិះគន់ទៅលើសកម្មភាពដើរថតស្ពតពាណិជ្ជកម្ម ដែលមិនសូវខ្វល់ខ្ជាយទៅលើការហ្វឹកហាត់ពង្រឹងសមត្ថភាពផងដែរ។
គួរឱ្យដឹងផងដែរថា សម្រាប់ការប្រកួតបាល់ទាត់មិត្តភាពរវាងក្រុមផ្ការីកគ្រប់រដូវ និងក្រុម អ.ម.ត ខេត្តកំពត កាលពីថ្ងៃទី២១ ខែធ្នូ កន្លងទៅនេះ ធឿន ធារ៉ា បានប៉ះទង្គិចគ្នាដួល បណ្តាលឱ្យមានរបួសជើងខាងស្តាំ និងត្រូវបានប្តូរចេញនៅនាទីទី៨៨ ហើយរបួសនេះ មិនបានជាសះស្បើយទាន់ពេលសម្រាប់ការប្រកួតនៅថ្ងៃទី៧ ខែមករា ស្អែកនេះទេ។
ចំពោះការរិះគន់ជុំវិញការបណ្តោយខ្លួនឱ្យមានរបួស ធ្វើឱ្យអាក់ខានដល់ការប្រកួតម៉ារ៉ាតុងដណ្តើមខ្សែក្រវាត់ នៅថ្ងៃទី៧ ខែមករា ស្អែកនេះ ធឿន ធារ៉ា បានចេញមុខមកទទួលកំហុស ដោយបានបង្ហាញការសុំទោសចំពោះអ្នករៀបចំកម្មវិធីប្រកួត ថ្នាក់ដឹកនាំ និងមហាជនជាអ្នកគាំទ្រទូទាំងប្រទេស ដោយលោកបានសន្យាថា នឹងមិនបណ្តោយឱ្យរឿងបែបនេះកើតមានទៀតនោះទេ។
បន្ទាប់ពីប្រកាសដកខ្លួនចេញរបស់ធឿន ធារ៉ាស្ថានីយទូរទស្សន៍ ដែលជាអ្នករៀបចំព្រឹត្តិការណ៍ប្រកួតនាថ្ងៃទី៧ ខែមករា ខាងមុខនេះ បានសម្រេចកែប្រែការប្រកួតម៉ារ៉ាតុងដណ្តើមខ្សែ
ក្រវាត់ប្រភេទទម្ងន់៧២គីឡូក្រាមនេះ មកជាការប្រកួតមិត្តភាពវិញ ដោយដាក់ឱ្យកីឡាករថៃ Thananchai Sitsongpeenong ប្រកួតជាមួយអ្នកប្រដាល់បារាំង Omar Samb រួមជាមួយការប្រកួតម៉ារ៉ាតុងដណ្តើមខ្សែក្រវាត់ ទម្ងន់៦៥គីឡូក្រាម និងការប្រកួតមិត្តភាពអន្តរជាតិ ជាច្រើនគូទៀត ៕
ចែករំលែកព័តមាននេះ