ម្ចាស់មេដាយមាសពិភពលោកកីឡាវ៉ូវីណាម សែន រ៉ាឌី កំពុងស្វែងរកឱកាសឡើងសង្វៀនគុនខ្មែរជាថ្មី
- ភ្នំពេញ
រាជធានីភ្នំពេញ ៖ ក្រោយខកខានជិត ១០ឆ្នាំ ម្ចាស់មេដាយមាសពិភពលោកកីឡាវ៉ូវីណាម សែន រ៉ាឌី កំពុងស្វែងរកឱកាសឡើងសង្វៀនគុនខ្មែរជាថ្មី ។ ការប្រកាសឡើងសង្វៀនជាថ្មីនេះ…
រាជធានីភ្នំពេញ ៖ ក្រោយខកខានជិត ១០ឆ្នាំ ម្ចាស់មេដាយមាសពិភពលោកកីឡាវ៉ូវីណាម សែន រ៉ាឌី កំពុងស្វែងរកឱកាសឡើងសង្វៀនគុនខ្មែរជាថ្មី ។ ការប្រកាសឡើងសង្វៀនជាថ្មីនេះ ត្រូវអ្នកគាំទ្រប្រកាសសាទរដោយអ្នកខ្លះថា ប្រហែលជាសែន រ៉ាឌី មើលឃើញកីឡាករល្បីៗដែលមានសមត្ថភាពប្រដំប្រសងនឹងខ្លួនកំពុងកាក់កបនឹងអាជីពឈឺខ្លួនមួយនេះដោយសារតែការដំឡើងតម្លៃខ្លួនកីឡាករខុសពីមុនប្រមាណ១០ដងហើយមើលទៅ។
អ្នកប្រដាល់មាឌតូចច្រឡឹងសាច់សខ្ចីសង្ហាដូចតារាភាពយន្ត សែន រ៉ាឌី ដែល មានរហស្សនាមថា«ម្ទេសខ្មាំង» រូបនេះបានចាកចេញពីអាជីពប្រដាល់នៅក្នុងអំឡុងឆ្នាំ២០១៦ ក្នុងវ័យ
២៣ឆ្នាំក្រោយចាញ់កីឡាករថៃត្រឹមទឹកទី៤ក្នុងការប្រកួតប្រភេទទម្ងន់៥៧គីឡូក្រាមលើសង្វៀន
ទូរទស្សន៍អប្សរា ទៅប្រកបរបរបើកហាងបុកល្ហុង។
អ្វីដែលធ្វើឱ្យអ្នកគាំទ្រកីឡាកររូបនេះភ្ញាក់ផ្អើលនោះគឺ គ្រាន់តែឈានចូលឆ្នាំថ្មីភា្លាមពោល
គឺនៅថ្ងៃទី០១ មករា ២០២៥ សែន រ៉ាឌី បានបង្ហោះសារលើហ្វេសប៊ុកខ្លួន ក្នុងន័យចង់វិល
ត្រឡប់មកសង្វៀនគុនខ្មែរជាថ្មីខណៈពេលនេះគេមានអាយុ៣២ឆ្នាំ និងកំពុងធ្វើជាគ្រូបង្គោល
ក្លិបប្រដាល់របស់ខ្លួនជាមួយប្អូនប្រុសសែនរ៉ាដេត ។ ទោះបីយ៉ាងណា បុរសកូនពីររូបនេះ បាន
ប្រាប់គេហទំព័រព័ត៌មានក្នុងស្រុកមួយថា បើសិនជាត្រូវលក្ខខណ្ឌនោះ រូបគេនឹងវិលមក
ប្រកួតវិញ ។ ប៉ុន្តែលក្ខខណ្ឌព្រមព្រៀងយ៉ាងណានោះ លោកសុំមិនទាន់បញ្ជាក់ឡើយ ។ អ្នក
គាំទ្រមើលឃើញថា ឱកាសវិលត្រឡប់មកកាន់សង្វៀនគុនខ្មែរជាថ្មីរបស់សែន រ៉ាឌី មានភាគ
រយខ្ពស់ ដោយសារមួយរយៈចុងក្រោយនេះគេឃើញកីឡាកររូបនេះខំហ្វឹកហាត់សម្រកទម្ងន់
រហូតបានសម្រេច ។
គួររំលឹកផងដែរថា ម្ចាស់មេដាយ៦គ្រឿងពីប្រភេទកីឡាវ៉ូវីណាមរូបនេះបានលើកឡើងថា ប្រដាល់សេរីបានដក់ជាប់ក្នុងចិត្តរបស់គេជានិច្ច ហើយគេមានថ្ងៃនេះក៏ដោយសារកីឡាប្រដាល់សេរីដែរ ហេតុនេះទើបធ្វើឲ្យគេចង់ចាប់យកអាជីពទាំងពីរក្នុងពេលតែមួយ ។ សែន រ៉ាឌី បានចាប់ផ្ដើមហាត់ប្រដាល់សេរីតាំងពីឆ្នាំ ២០០០ និងឆ្នាំ២០១១ រូបគេបានចាប់ផ្ដើមហ្វឹកហាត់ កីឡាវ៉ូវីណាម និងបានចូលរួមប្រកួតក្នុងព្រឹត្តិការណ៍កីឡាស៊ីហ្គេមនៅឥណ្ឌូណេស៊ីលើប្រភេទកីឡាវ៉ូវីណាម ដោយទទួលបានមេដាយ
ប្រាក់១គ្រឿង ។
ក្នុងការចូលរួមប្រកួតកីឡាវ៉ូវីណាមនេះ សែន រ៉ាឌី តែងឈ្នះមេដាយជាបន្តបន្ទាប់។ ឆ្នាំ២០១២ ប្រកួតជើងឯកវ៉ូវីណាមនៅខេត្តសៀមរាប ឈ្នះមេដាយសំរឹទ្ធ១គ្រឿង ។ ឆ្នាំ២០១៣ ព្រឹត្តិការណ៍កីឡាស៊ីហ្គេមនៅមីយ៉ាន់ម៉ា ឈ្នះបានមេដាយសំរឹទ្ធ១គ្រឿង ។
ឆ្នាំ២០១៤ ប្រកួតជើងឯកវ៉ូវីណាមពិភពលោកនៅប្រទេសមីយ៉ាន់ម៉ា ឈ្នះមេដាយប្រាក់១គ្រឿង
និងចុងក្រោយក្នុងកម្មវិធីប្រកួតកីឡាវ៉ូវីណាមពិភពលោកនៅប្រទេសអាល់ហ្សេរីឈ្នះមេដាយ
មាស១គ្រឿង ។ សរុបស្ថិតិជើងខ្លាំងប្រដាល់សេរីរូបនេះចូលរួមប្រកួតកីឡាវ៉ូវីណាម៦លើកឈ្នះមេដាយទាំង៦លើកគឺមាស១ ប្រាក់២ និងសំរឹទ្ធ៣ ។
បច្ចុប្បន្ន សែន រ៉ាឌី ក៏ជាមន្ត្រីរាជការក្នុងក្របខណ្ឌនគរបាលជាតិពាក់សក្តិ៤ផងដែរ៕
ចែករំលែកព័តមាននេះ