ទីក្រុងតូក្យូ៖ សោកស្ដាយដែលសង្ខាររបស់មនុស្សមិនទៀង។ កើត ចាស់ ជរា ព្យាធិ និងមរណៈតែងតែកើតមានចំពោះបុគ្គលគ្រប់រូប គ្មាននរណាអាចគេចផុតបានឡើយ។ ថ្មីៗនេះ លោកយាយជនជាតិជប៉ុនដែលជាប់ឈ្មោះជាស្ត្រីដែលមានអាយុវែងបំផុតនៅលើពិភពលោកនោះបានទទួលអនិច្ចកម្មហើយនៅក្នុងជន្មាយុ១១៦ឆ្នាំដោយជរាពាធ…
ទីក្រុងតូក្យូ៖ សោកស្ដាយដែលសង្ខាររបស់មនុស្សមិនទៀង។ កើត ចាស់ ជរា ព្យាធិ និងមរណៈតែងតែកើតមានចំពោះបុគ្គលគ្រប់រូប គ្មាននរណាអាចគេចផុតបានឡើយ។ ថ្មីៗនេះ លោកយាយជនជាតិជប៉ុនដែលជាប់ឈ្មោះជាស្ត្រីដែលមានអាយុវែងបំផុតនៅលើពិភពលោកនោះបានទទួលអនិច្ចកម្មហើយនៅក្នុងជន្មាយុ១១៦ឆ្នាំដោយជរាពាធ និងរោគាពាធ។
លោកយាយតូមីកូ អ៊ីទូកា (Tomiko Itooka) ស្លាប់កាលពីថ្ងៃទី២៩ ខែធ្នូ ឆ្នាំ២០២៤ នៅក្នុងគេហដ្ឋានរបស់គាត់ឯទីក្រុងអាស៊ីយ៉ា ខេត្តសូអូហ្គោ (Ashiya, Hyōgo)។ នេះបើយោងតាមមន្ត្រីរដ្ឋាភិបាលម្នាក់ដែលទទួលបន្ទុកខាងមើលថែទាំលោកយាយ។ លោកយាយអ៊ីទូកាដែលនិយមចូលចិត្តពិសាចេកទុំ និងភេជ្ជៈរសជាតិទឹកដោះគោជូរ (យ៉ាអួរ) តាមបែបជប៉ុននោះបានចាប់កំណើតកាលពីថ្ងៃទី២៣ ខែឧសភា ឆ្នាំ១៩០៨។
ក្រោយមរណភាពរបស់លោកយាយជនជាតិអាមេរិកអាយុ១១៧ឆ្នាំកាលពីឆ្នាំ២០២៤ លោកយាយជនជាតិជប៉ុនរូបនេះបន្តគ្រប់គ្រងតំណែងជើងឯកខាងអាយុវែងនៅលើពិភពលោកវិញម្ដង។ ចាប់កំណើតនៅទីក្រុងអូសាកា លោកយាយអ៊ីទូកាជាកីឡាការនីបាល់ទះនៅមធ្យមសិក្សា និងជាមនុស្សមានចិត្តអំណរជានិច្ច។ លោកយាយធ្លាប់ដើរឡើងភ្នំអុនតាកិ (Ontake) ដែលមានកម្ពស់៣០៦៧ម៉ែត្រចំនួន២ដង។
លោកយាយរៀបការនៅអាយុ២០ឆ្នាំ និងមានកូនប្រុស២នាក់ កូនស្រី២នាក់ជាចំណងដៃអាពាហ៍ពិពាហ៍។ លោកយាយជាអ្នករៀបចំចាត់ចែងកន្លែងធ្វើការរបស់ស្វាមីនៅក្នុងរោងចក្រតម្បាញកាលពីអំឡុងសង្គ្រាមលោកលើកទីពីរ។ ក្រោយពេលស្វាមីស្លាប់កាលពីឆ្នាំ១៩៧៩ លោកយាយរស់នៅតែម្នាក់ឯងគត់។
នៅពេលស្លាប់ទៅ លោកយាយបន្សល់ទុកកូនប្រុសម្នាក់, កូនស្រីម្នាក់ និងចៅ៥នាក់។ ក្រុមគ្រួសារបានរៀបចំពិធីបុណ្យសពជូនលោកយាយទៅតាមទំនៀមទម្លាប់របស់ជប៉ុនដោយមានមិត្តភក្តិ និងញាតិមិត្តជិតឆ្ងាយចូលរួមយ៉ាងអធិកអធម។ លោកយាយអ៊ីទូកាបានហែលឆ្លងឆាកជីវិតដ៏សម្បូរបែបនៅក្នុងសង្គម និងឆ្លងកាត់សង្គ្រាមពិភពលោករហូតដល់ទៅ២ដង។
លោកយាយមានថាមពលខ្លាំងក្លាអាចចាកផុតពីការយាយីនៃជំងឺកូវីដ១៩។ ជាទូទៅ គេសង្កេតឃើញថាស្ត្រីជនជាតិជប៉ុនច្រើនមានអាយុវែងមែនទែនរហូតដល់១០០ឆ្នាំ ឬជាង១០០ឆ្នាំ។ ជប៉ុនក៏មិនខុសពីកូរ៉េខាងត្បូងនោះទេកំពុងជួបនឹងបញ្ហាប្រជាសាស្ត្រឡើងចុះមិនស្មើគ្នា។ ពោលគឺអត្រាកំណើតទារកប្រចាំឆ្នាំមានកម្រិតទាបបំផុតគួរឱ្យព្រួយបារម្ភ។ ឥឡូវនេះ អ្នកគ្រប់គ្រងតំណែងជើងឯកពិភពលោកខាងអាយុវែងបំផុតបានទៅលើលោកយាយជនជាតិប្រេស៊ីលអាយុ១១៦ឆ្នាំ៕
ចែករំលែកព័តមាននេះ