រាជធានីភ្នំពេញ ៖ បុរស២នាក់ បានជួបឧប្បត្តិហេតុគ្រោះថ្នាក់ចរាចរណ៍ ដែលសង្ស័យជិះម៉ូតូបុកពីក្រោយរថយន្តធុនធំ បណ្ដាលឲ្យស្លា.ប់ភ្លាមៗនៅនឹងកន្លែង ប៉ុន្តែដោយសារតែមិនអស់ចិត្តថា អ្នកទាំង២ស្លា.ប់នោះ ក្រុមគ្រួសារបានដឹកតាមម៉ូតូ បញ្ជូនទៅកាន់មន្ទីរពេទ្យរដ្ឋ…
រាជធានីភ្នំពេញ ៖ បុរស២នាក់ បានជួបឧប្បត្តិហេតុគ្រោះថ្នាក់ចរាចរណ៍ ដែលសង្ស័យជិះម៉ូតូបុកពីក្រោយរថយន្តធុនធំ បណ្ដាលឲ្យស្លា.ប់ភ្លាមៗនៅនឹងកន្លែង ប៉ុន្តែដោយសារតែមិនអស់ចិត្តថា អ្នកទាំង២ស្លា.ប់នោះ ក្រុមគ្រួសារបានដឹកតាមម៉ូតូ បញ្ជូនទៅកាន់មន្ទីរពេទ្យរដ្ឋ និងឯកជនពីមួយទៅមួយជាច្រើនកន្លែង ដើម្បីសង្គ្រោះ ហើយពេលទៅដល់មន្ទីរពេទ្យ គ្រូពេទ្យសុទ្ធតែបានផ្ដល់ចម្លើយយ៉ាងប្រាកដប្រជាដូចគ្នាថា «មិនអាចសង្គ្រោះបាននោះទេ ព្រោះជនរងគ្រោះ ២នាក់នោះស្លា.ប់ហើយ» ទើបក្រុមគ្រួសារដឹកស.ពត្រលប់ទៅផ្ទះធ្វើបុណ្យតាមប្រពៃណីរៀងៗខ្លួន ។
ឧប្បត្តិហេតុនោះបានកើតឡើងកាលពីវេលាម៉ោង១០និង៣០នាទីយប់ថ្ងៃទី០៣ ខែមករា ឆ្នាំ២០២៥ នៅតាមផ្លូវបេតុងចូលផ្សារសាមគ្គី ត្រង់ចំណុចជិតរោងចក្រពុម្ពស្បែកជើង ស្ថិតនៅក្នុងភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
ស.ពម្នាក់ឈ្មោះ ផុស សុជាតិ អាយុ៣៧ឆ្នាំ មុខរបរកម្មករ មានទីលំនៅភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ជាអ្នកជិះពីក្រោយ ។ ចំណែកស.ពម្នាក់ទៀត ឈ្មោះ ធឿន សៀង ហៃ ហៅម៉ារីតា អាយុ២៧ឆ្នាំ មុខរបរកម្មករ មានទីលំនៅភូមិតាំងបន្ទាយ ឃុំតាំងបន្ទាយ ស្រុកថ្ពង ខេត្តកំពង់ស្ពឺ ។ បុរសនេះ គឺជាអ្នកឌុប ហើយក៏ជាម្ចាស់ម៉ូតូ ម៉ាកហុងដាឌ្រីមសេ១២៥ ពណ៍ស ពាក់ស្លាកលេខកំពង់ស្ពឺ 1P-0473 ផងដែរ ។
បើតាមបងប្អូនជនរងគ្រោះ បានប្រាប់ថា នៅមុនពេលកើតហេតុ អ្នកទាំង២នាក់ បានជិះម៉ូតូ១គ្រឿងខាងលើ ឌុបគ្នាធ្វើដំណើរតាមផ្លូវបេតុងនោះ ក្នុងទិសដៅពីលិចទៅកើត លុះពេលទៅដល់ត្រង់ចំណុចកើតហេតុ ក៏បានជួបគ្រោះអកុសល ស្លា.ប់ទាំង២នាក់ បែបនេះតែម្ដង ។ ខណៈនោះ ក្រុមគ្រួសារពុំដឹងថា ជិះម៉ូតូបុកជាមួយរថយន្តអ្វីនោះទេ ព្រោះពេលទៅដល់ ឃើញតែជនរងគ្រោះដួលដេកលើផ្លូវ រីឯរថយន្តទៅបាត់ហើយ ប៉ុន្តែពួកគាត់បានសង្ស័យថា បុកពីក្រោយរថយន្តធុនធំ ១គ្រឿង ចំណែកម៉ូតូបានរងការខូចខាត បែកខ្ទេចក្បាល ។
ប្រភពដដែល បានប្រាប់ឲ្យដឹងបន្តទៀតថា ពេលនោះ ដោយសារតែមិនអស់ចិត្តថា ជនរងគ្រោះស្លា.ប់នោះទេ ក្រុមគ្រួសារក៏បានដឹកតាមម៉ូតូទៅកាន់មន្ទីរពហុព្យាបាល ឡាំ ប៊ុនថន ដែលស្ថិតនៅជិតផ្សារជម្ពូវ័ន ដើម្បីសង្គ្រោះបន្ទាន់ ។ លុះពេលទៅដល់ ក្រុមគ្រូពេទ្យបានពិនិត្យមើលភ្លាមៗ ហើយបានប្រាប់ថា ជនរងគ្រោះស្លា.ប់បាត់ហើយ ប៉ុន្តែក្រុមគ្រួសារនៅតែមិនអស់ចិត្តទៀត ក៏បានដឹកបន្តទៅកាន់គ្លីនិកឯកជនផ្សេងៗមួយចំនួនទៀត។ ពេលនោះគ្រូពេទ្យសុទ្ធតែពិនិត្យឃើញថា ជនរងគ្រោះស្លាប់ដូចគ្នា ប៉ុន្តែទឹកចិត្តក្រុមគ្រួសារធំធេងណាស់ ទោះជាគ្រូពេទ្យពីមួយទៅមួយប្រាប់ថា ស្លាប់ហើយក្ដី ក៏ពួកគាត់នៅតែគិតថា មិនទាន់ស្លាប់ ហើយក៏ដឹកទៅកាន់មន្ទីរពេទ្យជាតិ តេជោសន្តិភាព បន្តទៀត ។
ប្រភពខាងលើ បានបញ្ជាក់ប្រាប់ឲ្យដឹងបន្ថែមទៀតថា ក្រោយពីការពិនិត្យរួចមក គ្រូពេទ្យជាតិតេជោសន្តិភាព ក៏បានផ្ដល់ចម្លើយមិនខុសពីគ្រូពេទ្យឯកជនពីដំបូងៗឡើយ គឺជនរងគ្រោះស្លា.ប់ហើយ ។ បន្ទាប់មកក្រុមគ្រួសារ មិនបានដឹកជនរងគ្រោះត្រលប់ទៅផ្ទះឡើយ ព្រោះពួកគាត់នៅតែមិនទាន់អស់ចិត្តនៅឡើយ រួចក៏ដឹកបន្តទៅកាន់មន្ទីពេទ្យព្រះកុសុមៈ វិញម្ដង ក្រែងអាចជួយបាន ប៉ុន្តែចម្លើយគ្រូពេទ្យ នៅតែប្រាប់ដដែលថា ជនរងគ្រោះស្លា.ប់ហើយ ទើបពួកគាត់សម្រេចដឹកស.ពត្រលប់មកផ្ទះវិញរួចធ្វើបុណ្យតាមប្រពៃណី ។
នគរបាលបានប្រាប់ថា ដោយសារតែរវល់តែកើតទុក្ខ និងរវល់បញ្ជូនជនរងគ្រោះទៅកាន់មន្ទីរពេទ្យពីមួយកន្លែងទៅមួយកន្លែងនោះ ក្រុមគ្រួសារ ពុំបានរាយការណ៍ប្រាប់ឲ្យដឹងនគរបាលប៉ុស្តិ៍ ឬខណ្ឌ ឲ្យបានដឹងនោះទេ រហូតដល់វេលាម៉ោងជាង៨ព្រឹកថ្ងៃទី០៤ ខែមករា ឆ្នាំ២០២៥ បន្ទាប់ពីឃើញមានការធ្វើបុណ្យស.ព ហើយនគរបាលចុះទៅសួរនាំ ទើបដឹងថា អ្នកស្លា.ប់នោះ បានជួបឧប្បត្តិហេតុគ្រោះថ្នាក់ចរាចរណ៍កាលពីយប់មិញ។
នគរបាលបានប្រាប់ទៀតថា សពជនរងគ្រោះឈ្មោះ ផុស សុជាតិ ត្រូវបានក្រុមគ្រួសារនាំយកទៅធ្វើបុណ្យនៅផ្ទះក្នុងភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។ ចំណែកស.ពជនរងគ្រោះឈ្មោះ ធឿន សៀង ហៃ ហៅម៉ារីតា ត្រូវក្រុមគ្រួសារនាំយកទៅធ្វើបុណ្យនៅភូមិតាំងបន្ទាយ ឃុំតាំងបន្ទាយ ស្រុកថ្ពង ខេត្តកំពង់ស្ពឺ ។
ដោយឡែកនៅព្រឹកថ្ងៃដដែលនោះ កម្លាំងនគរបាលចរាចរខណ្ឌពោធិ៍សែនជ័យ ចុះធ្វើការស្រាវជ្រាវ ហើយសន្និដ្ឋានជនរងគ្រោះ ជិះម៉ូតូបុកពីក្រោយរថយន្តធុនធំ ១គ្រឿង ។ ខណៈនោះ នគរបាលក៏បានស្វែងរកកាមេរ៉ាសុវត្ថិភាព ដើម្បីមើលដែរ ប៉ុន្តែនៅទីតាំងនោះ គ្មានកាមេរ៉ានោះឡើយ ៕
ចែករំលែកព័តមាននេះ