មន្ត្រីជាប់ពាក់ព័ន្ធនឹងគ្រឿងញៀ.ន ត្រូវបណ្តេញចេញពីក្របខ័ណ្ឌ គ្មានការលើកលែងឡើយ
ខេត្តប៉ៃលិន ៖ នៅបរិវេណសាលាស្រុកសាលាក្រៅ នាល្ងាចថ្ងៃទី០៣ ខែមករា ឆ្នាំ២០២៥ លោក ហុក សុផល អភិបាលរងខេត្តប៉ៃលិន…
ខេត្តប៉ៃលិន ៖ នៅបរិវេណសាលាស្រុកសាលាក្រៅ នាល្ងាចថ្ងៃទី០៣ ខែមករា ឆ្នាំ២០២៥ លោក ហុក សុផល អភិបាលរងខេត្តប៉ៃលិន បានដឹកនាំក្រុមការងារជំនាញ សហការជាមួយការិយាល័យនគរបាលប្រយុទ្ធប្រឆាំងគ្រឿងញៀន នៃស្នងការនគរបាលខេត្ត បានចុះធ្វើតេស្តទឹកនោម រកសារធាតុញៀន លើមន្ត្រីរាជការ នៅទូទាំងស្រុកសាលាក្រៅ ។
លោកអភិបាលរងខេត្ត បានមានប្រសាសន៍ថា ការចុះធ្វើតេស្តនេះ គឺដើម្បីរកសារញៀនទៅលើមន្ត្រីរាជការ ក៏ដូចជាចូលរួមលើកកម្ពស់ ជំនឿទុកចិត្ត ប្រសិទ្ធភាពការងារ និងអភិបាលកិច្ចល្អ នៅក្នុងស្ថាប័នរដ្ឋ ទាំងថ្នាក់ជាតិ ទាំងថ្នាក់ក្រោមជាតិ ទាំងក្នុងជួរកងកម្លាំងប្រដាប់អាវុធ និងមន្ត្រីរាជការស៊ីវិល ។
លោកបានបន្តលើកឡើងថា បច្ចុប្បន្ននេះ រដ្ឋបាលខេត្តប៉ៃលិន កំពុងបន្តអនុវត្តច្បាប់យ៉ាងម៉ឹងម៉ាត់ ចំពោះមន្ត្រីជាប់ពាក់ព័ន្ធ និងការប្រើប្រាស់គ្រឿងញៀននោះ នឹងត្រូវបណ្តេញចេញពីក្របខ័ណ្ឌ ដោយគ្មានការលើកលែងឡើយ ។
ក្នុងឱកាសនោះដែរ លោកអភិបាលរងខេត្ត បានជំរុញដល់អាជ្ញាធរមានសមត្ថកិច្ច ត្រូវពង្រឹងនូវការប្រយុទ្ធ ប្រឆាំងគ្រឿងញៀន តាមរយៈ វិធានការអប់រំរដ្ឋបាល និងវិធានការច្បាប់ឱ្យបានម៉ឺងម៉ាត់ ដើម្បីឱ្យសហគមន៍ របស់យើងគ្មានគ្រឿងញៀន និងកសាងសុភមង្គល ជូនគ្រួសារ និងសហគមន៍ ៕
ចែករំលែកព័តមាននេះ