ខេត្តកំពង់ស្ពឺ ៖ ឯកឧត្តម ជាម ច័ន្ទសោភ័ណ អភិបាលខេត្តកំពង់ស្ពឺ បានណែនាំដល់មន្ទីរពាក់ព័ន្ធទាំងអស់ឱ្យធ្វើបច្ចុប្បន្នភាពឡើងវិញលើដីអាស្រ័យផល និងដីព្រៃរបស់រដ្ឋ ដើម្បីរកឱ្យឃើញអ្នកគ្រប់គ្រង អាស្រ័យផលជាក់ស្តែង…
ខេត្តកំពង់ស្ពឺ ៖ ឯកឧត្តម ជាម ច័ន្ទសោភ័ណ អភិបាលខេត្តកំពង់ស្ពឺ បានណែនាំដល់មន្ទីរពាក់ព័ន្ធទាំងអស់ឱ្យធ្វើបច្ចុប្បន្នភាពឡើងវិញលើដីអាស្រ័យផល និងដីព្រៃរបស់រដ្ឋ ដើម្បីរកឱ្យឃើញអ្នកគ្រប់គ្រង អាស្រ័យផលជាក់ស្តែង និងដីព្រៃដែលនៅសេសសល់ពីការទន្ទ្រានយក។ ការណែនាំធ្វើឡើង កាលពីព្រឹកថ្ងៃទី០៣ ខែមករា ឆ្នាំ២០២៥ ក្នុងជំនួបសំណេះសំណាលជាមួយមន្ត្រីរដ្ឋបាលស្រុកថ្ពងនៃខេត្តកំពង់ស្ពឺ។
អភិបាលខេត្តកំពង់ស្ពឺ ឯកឧត្តម ជាម ចន្ទ័សោភ័ណ មានប្រសាសន៍ថា មន្ទីរជំនាញពាក់ព័ន្ធ មានមន្ទីរបរិស្ថាន មន្ទីរកសិកម្ម និងមន្ទីរធនធានទឹក គប្បីរួមគ្នាធ្វើបច្ចុប្បន្នភាពលើការអាស្រ័យផលរបស់ប្រជាពលរដ្ឋជាក់ស្តែង ដើម្បីរដ្ឋបាលខេត្តមានវិធានការនិងចាត់ចែងជូនដល់ពលរដ្ឋអាចគ្រប់គ្រងដោយស្របច្បាប់និងដកហូតមកវិញចំពោះដីដែលកាប់រានដោយខុសច្បាប់។
ឯកឧត្តមជាម ច័ន្ទសោភ័ណមានប្រសាសន៍ថា ស្រុកថ្ពងគឺជាស្រុកមួយដែលបាននិងកំពុងប្រឈមជាមួយនិងការឈូសឆាយ កាប់រានទន្ទ្រានយកដីព្រៃរបស់រដ្ឋទៅធ្វើជាកម្មសិទ្ធិ ហើយក្នុងនោះជម្លោះដណ្តើមកាន់កាប់ដីព្រៃដោយទុច្ចរិតក៏កើតមានច្រើនផងដែរ។ដូច្នេះអាជ្ញាធរមូលដ្ឋាន មន្ទីរជំនាញពាក់ព័ន្ធខាងលើ ត្រូវពិនិត្យនិងធ្វើបច្ចុប្បន្នភាពឱ្យមានតម្លាភាពនិងសុច្ចរិតភាព ប្រយោជន៍ដើម្បីរក្សាដីព្រៃរបស់រដ្ឋឱ្យបានគង់វង្ស។
នៅក្នុងជំនួបនោះដែរ ឯកឧត្តម អភិបាលខេត្តកំពង់ស្ពឺ ក៏បានណែនាំផងដែរទៅដល់ស្រុក-ក្រុងទាំង៩ត្រូវពិនិត្យឡើងវិញចំពោះស្លាកប៉ាណូទាំងអស់ដែលលើកផ្សាយពាណិជ្ជកម្មគឺមិនត្រូវឱ្យមានដាក់ស្លាកសញ្ញា ឬពាក្យស្លោកក្នុងន័យបំផុសឱ្យមហាជននាំគ្នាគាំទ្រឬផឹកស្រាបៀរនោះទេ។ជាមួយនោះក៏ត្រូវពិនិត្យឡើងវិញក្នុងមូលដ្ឋានរបស់ខ្លួនចំពោះការបើកឱ្យមានការលេងល្បែងស៊ីសងគ្រប់ប្រភេទ ក្នុងករណីទីតាំងល្បែងដែលបើកលេងដោយសំអាងថាមានការអនុញ្ញាតច្បាប់ពីក្រសួងសេដ្ឋកិច្ចហិរញ្ញវត្ថុ រដ្ឋបាលស្រុក-ក្រុងត្រូវរាយការណ៍មករដ្ឋបាលខេត្តដើម្បីពិនិត្យឡើងវិញចំពោះការបើកលេងនេះ។
មួយវិញទៀត ក៏ត្រូវពង្រឹងនិងចាត់វិធានការឱ្យបានតឹងរឹងនិងម៉ឺងម៉ាត់បំផុតចំពោះក្រុមក្មេងទំនើងគឺមិនអនុញ្ញាតឱ្យរួចខ្លួនឡើយ និយាយរួមងើបមួយបង្ក្រាបមួយ កុំនាំគ្នាវែកចកគឺត្រូវនាំគ្នាដកចកឬកើបចកចេញ ធ្វើយ៉ាងណាចូលរួមអនុវត្តន៍ឱ្យបាននូវគោលនយោបាយភូមិឃុំសង្កាត់មានសុវត្ថិភាព ពិសេស អនុវត្តតាមប្រសាសន៍ដឹកនាំដ៏ថ្លៃថ្លារបស់សម្ដេចមហាបវរធិបតីនាយករដ្ឋមន្ត្រី និងតាមសេចក្តីណែនាំលេខ ០៤ចុះថ្ងៃទី២៣ ខែធ្នូ ឆ្នាំ២០២៤៕
ចែករំលែកព័តមាននេះ