ទីក្រុងវ៉ាស៊ីនតោន៖ ប្រធានគណៈគ្រូពេទ្យនៅអាមេរិកព្រមានថាការទទួលទានគ្រឿងស្រវឹងប្រឈមនឹងជំងឺមហារីកខ្ពស់បំផុត។ វេជ្ជបណ្ឌិតវិវេគ មើធី (Vivek Murthy) យល់ថានៅលើដប ឬកំប៉ុងស្រាគួរបិតផ្លាកព្រមានអំពីហានិភ័យនៃជំងឺមហារីក។ ការព្រមាននេះអាចជាសារប្រាប់ទៅអ្នកតាក់តែងគោលនយោបាយដើម្បីដាក់ចេញវិធានការក្ដៅដូចករណីថ្នាំជក់ និងបារីផងដែរ។…
ទីក្រុងវ៉ាស៊ីនតោន៖ ប្រធានគណៈគ្រូពេទ្យនៅអាមេរិកព្រមានថាការទទួលទានគ្រឿងស្រវឹងប្រឈមនឹងជំងឺមហារីកខ្ពស់បំផុត។ វេជ្ជបណ្ឌិតវិវេគ មើធី (Vivek Murthy) យល់ថានៅលើដប ឬកំប៉ុងស្រាគួរបិតផ្លាកព្រមានអំពីហានិភ័យនៃជំងឺមហារីក។ ការព្រមាននេះអាចជាសារប្រាប់ទៅអ្នកតាក់តែងគោលនយោបាយដើម្បីដាក់ចេញវិធានការក្ដៅដូចករណីថ្នាំជក់ និងបារីផងដែរ។
វេជ្ជបណ្ឌិតរូបនេះរកឃើញថាគ្រឿងស្រវឹងធ្វើឱ្យមនុស្សប្រឈមនឹងជំងឺមហារីក៧ប្រភេទយ៉ាងតិច។ ក្នុងនោះក៏មានមហារីកសុដន់, ពោះវៀនធំ និងថ្លើមផងដែរ។ ប៉ុន្តែអ្នកទទួលទានគ្រឿងស្រវឹងនៅអាមេរិកភាគច្រើនមិនបានដឹងអាថ៌កំបាំងទាំងអស់នេះទេ។ ដូច្នេះ លោកសំណូមពរឱ្យអាជ្ញាធរដាក់ចេញគោលការណ៍ណែនាំសម្រាប់អ្នកទទួលទានគ្រឿងស្រវឹងដើម្បីឱ្យពួកគាត់ថ្លឹងថ្លែងអំពីផលចំណេញ និងផលខាតចំពោះសុខភាព។ ជាពិសេស ត្រូវកំណត់បរិមាណគ្រឿងស្រវឹងដែលទទួលទាន។
សព្វថ្ងៃនេះបើតាមការកម្រិតស្តង់ដារសុខភាពជាទូទៅ មនុស្សយើងម្នាក់ៗគួរណាស់ទទួលទានគ្រឿងស្រវឹងជាស្រាបៀរ ឬស្រាដបត្រឹម២កំប៉ុង ឬ២កែវក្នុងមួយថ្ងៃ ឬបើកាត់បន្ថយតិចជាងនេះកាន់តែល្អ។ លោកថ្លែងថាការទទួលទានគ្រឿងស្រវឹងជាមូលហេតុនាំឱ្យមនុស្សស្លាប់នឹងជំងឺមហារីកលំដាប់ទី៣នៅអាមេរិកបន្ទាប់ពីថ្នាំជក់ និងជំងឺធាត់ដុះក្បាលពោះ។ មែនទែនទៅ នេះជាកត្តាដែលអាចជៀសវាងបាន។ គ្រឿងស្រវឹងសុទ្ធតែបង្កបញ្ហាទាំងអស់មិនថាស្រាថ្នាំ ស្រាក្រហម ឬស្រាបៀរទេ។
គ្រាន់តែគ្រូពេទ្យរូបនេះចេញសារព្រមានដូច្នេះ តម្លៃភាគហ៊ុនរបស់ក្រុមផលិតស្រាធ្លាក់ចុះព្រមៗគ្នា។ ក្រុមហ៊ុនខ្លះធ្លាក់ចុះរហូតដល់៣%។ ប៉ុន្តែក្រុមហ៊ុនផលិតស្រាមិនទាន់ធ្វើអត្ថាធិប្បាយ ឬបញ្ចេញប្រតិកម្មតបទៅនឹងសេចក្ដីប្រកាសនេះទេ។ គេមិនទាន់ដឹងថាតើរដ្ឋាភិបាលអាមេរិកនឹងទទួលយកអនុសាសន៍របស់គ្រូពេទ្យរូបនេះកម្រិតណាទេ។ លោកបៃដិននៅសល់ពេលវេលាត្រឹមតែ២អាទិត្យទៀតប៉ុណ្ណោះនឹងចាកចេញពីសេតវិមានហើយ ហើយនឹងជំនួសតំណែងដោយលោកត្រាំ។
បងប្រុសរបស់លោកត្រាំឈ្មោះហ្វ្រឹតត្រាំ ជូនៀ (Fred Trump Jr.)ស្លាប់ដោយសារគ្រឿងស្រវឹងតាំងពីអាយុ៤២ឆ្នាំ។ ចំណែកលោកត្រាំមិនសេពគ្រឿងស្រវឹងទាល់តែសោះ។ លោកធ្លាប់ព្រមានជាយូរមកហើយអំពីហានិភ័យនៃគ្រឿងស្រវឹង។ បើទៅថ្ងៃមុខ រដ្ឋាភិបាលសម្រេចថាត្រូវបិទផ្លាកសញ្ញាព្រមានអំពីគ្រោះថ្នាក់នៅលើសម្បកដប ឬកំប៉ុង ពេលនោះត្រូវយកសំណើនេះទៅឆ្លងកាត់ការអនុម័តពីរដ្ឋសភា និងព្រឹទ្ធសភា៕
ចែករំលែកព័តមាននេះ