ខេត្តកំពង់ធំ ៖ តន្ត្រីករម្នាក់ ត្រូវបានកម្លាំងនគរបាលចាប់ឃាត់ខ្លួន បន្ទាប់ពីផឹកស៊ីស្រវឹង បានវាយទៅលើឪពុកម្ដាយ បណ្ដាលឲ្យរងរបួសធ្ងន់ទាំង២នាក់ កាលពីយប់ថ្ងៃទី១ ខែមករា ឆ្នាំ២០២៥…
ខេត្តកំពង់ធំ ៖ តន្ត្រីករម្នាក់ ត្រូវបានកម្លាំងនគរបាលចាប់ឃាត់ខ្លួន បន្ទាប់ពីផឹកស៊ីស្រវឹង បានវាយទៅលើឪពុកម្ដាយ បណ្ដាលឲ្យរងរបួសធ្ងន់ទាំង២នាក់ កាលពីយប់ថ្ងៃទី១ ខែមករា ឆ្នាំ២០២៥ ស្ថិតក្នុងភូមិអូរធំ ឃុំបឹងល្វា ស្រុកសន្ទុក ខេត្តកំពង់ធំ ។
លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានឲ្យដឹងនៅថ្ងៃទី៣ មករា ២០២៥នេះ ជនបង្កឈ្មោះ រ៉េត រាត្រី អាយុ២៧ឆ្នាំ ជាតន្ត្រីករ បានប្រើប្រាស់ហិ.ង្សាយ៉ាងធ្ងន់ធ្ងរទៅលើឪពុកម្ដាយ នៅពេលខ្លួនស្ថិតក្នុងស្ថានភាពស្រវឹង ប៉ុន្តែតន្ត្រីកររូបនេះ មិនមានសារធាតុញៀននៅក្នុងខ្លួននោះទេ ។
លោកឧត្តមសេនីយ៍ទោ ហេង សុផល បន្តថា ជនរងគ្រោះជាឪពុក មានឈ្មោះ សេង សារឿន អាយុ៥៩ឆ្នាំ ត្រូវរបួសចំផ្ទៃមុខ ខាងលើចិញ្ចើមឆ្វេង និងក្រោមភ្នែកឆ្វេង និងជនរងគ្រោះជាម្ដាយ មានឈ្មោះ ពេជ សោភា អាយុ៥៨ឆ្នាំ រងរបួសក្បាល និងបាក់ដៃទាំងសងខាង ។
លោកស្នងការ បានបន្តទៀតថា ដើមចម ដែលនាំឲ្យតន្ត្រីកររូបនេះ វាយលើឪពុកម្ដាយបង្កើត ដោយសារនៅថ្ងៃកើតហេតុរូបគេស្រវឹងជោគជាំ ហើយពេលនោះ ម្ដាយស្ដីបន្ទោសរឿងមកពីផឹកស៊ីស្រវឹង ទើបខឹងតមាត់ជាមួយម្ដាយ ។ ហើយនៅពេលនោះដែរ ឪពុកបានជេរស្ដីបន្ថែម និងវាយមួយដៃ ទើបកូនប្រុសរូបនេះ ស្ទុះទៅវាយឪពុកចំមុខបណ្ដាលឲ្យដួល ហើយម្ដាយបានទៅជួយ ស្រាប់តែកូនប្រុសវាយម្ដាយបន្ថែមទៀត បណ្ដាលឲ្យបាក់ដៃទាំងពីរ តែម្តង ។
លោកស្នងការ បញ្ជាក់ថា ក្រោយកើតហេតុ កម្លាំងសមត្ថកិច្ចមូលដ្ឋានបានចុះទៅអន្ដរាគមន៍ និងចាប់ខ្លួនជនបង្កភ្លាមៗបញ្ជូនទៅធ្វើការសួរនាំ។ ដោយឡែក ជនរងគ្រោះទាំងពីរនាក់ ត្រូវបានបញ្ជូនទៅសង្គ្រោះនៅមន្ទីរពេទ្យ ។
លោកស្នងការ បានបញ្ជាក់ដែរថា ចំពោះជនបង្ក សមត្ថកិច្ចបានចាត់វិធានការយ៉ាងម៉ឺងម៉ាត់បំផុត និងបញ្ជូនសំណុំរឿងទៅកាន់សាលាដំបូងខេត្តកំពង់ធំ ដោយគ្មានការលើកលែងឡើយ ពីបទ ហិ.ង្សាដោយមានស្ថានទម្ងន់ទោស ។
លុះព្រឹកឡើង លោកឧត្តមសេនីយ៍ទោ ហេង សុផល បានបញ្ជាឲ្យលោកស្នងការរង ចុះទៅធ្វើការសួរសុខទុក្ខ និងពិនិត្យស្ថានភាពរបស់ជនរងគ្រោះផងដែរ នៅមន្ទីរពេទ្យ ប៉ុន្ដែត្រូវបានក្រុមគ្រួសារ បញ្ជូនបន្តទៅសម្រាកព្យាបាលនៅមន្ទីរពេទ្យខេត្តកំពង់ចាម ហើយ ៕
ចែករំលែកព័តមាននេះ