ខេត្តពោធិ៍សាត់ ៖ ព្រះពុទ្ធប្បដិមា ទ្រង់ឈរ កម្ពស់២៧.៩ម៉ែត្រ ក្នុងកាយវិការប្រទានព្រះធម៌ និងប្រទានពរ ជាអំណោយដ៍ថ្លៃថ្លារបស់លោក ស៊ុយ សែម…
ខេត្តពោធិ៍សាត់ ៖ ព្រះពុទ្ធប្បដិមា ទ្រង់ឈរ កម្ពស់២៧.៩ម៉ែត្រ ក្នុងកាយវិការប្រទានព្រះធម៌ និងប្រទានពរ ជាអំណោយដ៍ថ្លៃថ្លារបស់លោក ស៊ុយ សែម សមាជិករដ្ឋសភា និងជាអ្នកតំណាងរាស្ត្រមណ្ឌលពោធិ៍សាត់ និងលោកជំទាវ ជា ខេង ដែលកសាងតម្កល់ទុកនៅក្នុងវត្តច័ន្ទរង្សី ហៅវត្តរំលេច ស្ថិតក្នុងភូមិប្រឡាយរំដេញ ឃុំរំលេច ស្រុកបាកាន ខេត្តពោធិ៍សាត់ មកដល់ពេលនេះ កសាងសម្រេចបានប្រមាណ៩៥%ហើយ គ្រោងនឹងធ្វើពិធីបុណ្យឆ្លង នៅខែកុម្ភៈ ឆ្នាំ២០២៥ ខាងមុខនេះ ។
លោក ស៊ុយ សែម ធ្លាប់បានប្រាប់ប្រជាពុទ្ធបរិស័ទថា កន្លងមកនេះ លោកបានកសាងសមិទ្ធផលជាច្រើន ក្នុងទឹកដីខេត្តពោធិ៍សាត់ សម្រាប់ពុទ្ធចក្រ និងអាណាចក្រ ដូចជា ៖ កោះសំពៅមាស ព្រះវិហារ សាលាឆាន់ កុដិ អគារសិក្សា របង ខ្លោងទ្វារ បណ្ណាល័យ អគារគណបក្ស មណ្ឌលសុខភាព ផ្លូវ ស្ពាន ប្រឡាយទឹក ស្រះទឹក អណ្ដូងទឹក ធ្វើផ្ទះ និងចិញ្ចឹមចាស់ជរា គ្មានទីពឹង ធ្វើបុណ្យជូនមនុស្សចាស់ ព្រមទាំងចូលរួមគ្រប់សកម្មភាពក្នុងសង្គម ហើយព្រះពុទ្ធប្បដិមា នៅវត្តច័ន្ទរង្សី ហៅរំលេចនេះ គឺជាសមិទ្ធផលចុងក្រោយរបស់លោកហើយ ព្រោះថា លោកក៏មានអាយុកាន់តែច្រើន សមល្មមនឹងរកកន្លែងសម្រាកហើយ ។
សូមបញ្ជាក់ថា ព្រះពុទ្ធប្បដិមា កម្ពស់២៧.៩ម៉ែត្រនេះ ត្រូវបានស្ថាបនាឡើង ក្រោមការផ្ដួចផ្ដើម ឧបត្ថម្ភ និងដឹកនាំកសាងដោយ លោក ស៊ុយ សែម និងលោកជំទាវ ជា ខេង សម្រាប់ជាឧត្តមប្រយោជន៍ដល់ពុទ្ធសាសនិកជន សម្ដែងពុទ្ធានុស្សតិ សេចក្ដីរំលឹកចំពោះព្រះពុទ្ធ និងពុទ្ធឱវាទ ព្រមទាំងទទួលបានពរជ័យ សិរីមង្គលគ្រប់ប្រការ ក្នុងការស្វែងរកការប្រោសប្រៀនប្រដៅពីព្រះពុទ្ធអង្គ ។
ទម្រង់ និងកាយវិការព្រះពុទ្ធប្បដិមា ត្រូវបានរៀបចំឡើង ដោយផ្អែកលើមូលដ្ឋានសិក្សា នៃគំរូព្រះពុទ្ធប្បដិមាខ្មែរ ក្នុងរចនាបថសម័យមុនអង្គរ (ស.វទី៧ទី៨នៃគ.ស) ដល់រចនាបថសម័យចុងអង្គរ (ស.វទី១២ទី១៣នៃគ.ស) ។
ព្រះពុទ្ធប្បដិមាទ្រង់ឈរនេះ មានកាយវិការបញ្ចូលគ្នា ពោលគឺ ៖ កាយវិការប្រទានព្រះធម៌ និងកាយវិការប្រទានពរ មានន័យថា ព្រះអង្គទ្រង់ប្រទានព្រះធម៌ប្រោសសត្វលោកផង និងប្រទានពរដល់បុគ្គល ដែលស្វែងមករក ការប្រៀនប្រដៅពីព្រះអង្គផង ។
កាយវិការប្រទានព្រះធម៌ បង្ហាញតាមរយៈព្រះហស្ថស្ដាំលើកឡើង និងងាកត្រឹមទ្រូង ដោយមានចលនាម្រាមដៃ បង្ហាញនូវភាពរស់រវើក ក្នុងកាយវិការប្រទានព្រះធម៌។ កាយវិការប្រទានពរ បង្ហាញតាមរយៈព្រះហស្ថឆ្វេងសណ្ដូកចុះក្រោម និងមានលាបាតព្រះហស្ថចេញមកក្រៅ។ ក្នុងបរិបទពុទ្ធសាសនា ការប្រោសប្រទានតែងភ្ជាប់ជាមួយនឹងការផ្ដល់នូវពរជ័យ ដល់ជនទាំងឡាយដែលស្វែងរកការប្រោសប្រៀនប្រដៅពីព្រះពុទ្ធអង្គ ៕
ចែករំលែកព័តមាននេះ