ខេត្តកណ្ដាល ៖ លំនៅឋានប្រជាពលរដ្ឋចំនួន៦ខ្នង ត្រូវបានព្រះអគ្គីឆេះរាលដាលឆ្លងគ្នាពី១ទៅ១អស់ទាំងកណ្ដាលថ្ងៃត្រង់ក្ដៅហែង ចំថ្ងៃទី១ មករា ចូលឆ្នាំសកល សល់តែកាំជណ្តើរ ថ្ម និងសសរបេតុង…
ខេត្តកណ្ដាល ៖ លំនៅឋានប្រជាពលរដ្ឋចំនួន៦ខ្នង ត្រូវបានព្រះអគ្គីឆេះរាលដាលឆ្លងគ្នាពី១ទៅ១អស់ទាំងកណ្ដាលថ្ងៃត្រង់ក្ដៅហែង ចំថ្ងៃទី១ មករា ចូលឆ្នាំសកល សល់តែកាំជណ្តើរ ថ្ម និងសសរបេតុង ។ មូលហេតុដែលបង្កឱ្យមានអគ្គិភ័យនេះ ត្រូវបានគេនិយាយថា ដោយសារការទុស្សេចរន្តអគ្គិសនី ។
ព្រះអគ្គិភ័យនេះ បានបង្កការភ្ញាក់ផ្អើលប្រជាពលរដ្ឋទាំងភូមិ អាជ្ញាធរ សមត្ថកិច្ច អាវុធហត្ថ នគរបាលបញ្ជូនរថយន្តពន្លត់អគ្គិភ័យចេញទៅអន្តរាគមន៍ កាលពីវេលាម៉ោង១១ព្រឹក ថ្ងៃទី០១ ខែមករា ឆ្នាំ២០២៥ នៅតាមផ្លូវជាតិលេខ៦ ក្នុងភូមិវត្តថ្មី ឃុំព្រែកដំបង ស្រុកមុខកំពូល ខេត្តកណ្តាល ។
តាមប្រភពបានឱ្យដឹងថា ផ្ទះទាំង៦ខ្នងសុទ្ធតែសង់ពីឈើប្រក់ក្បឿងនៅជាប់ៗគ្នា ក្នុងនោះមាន២ផ្ទះដែលម្ចាស់ចាក់សោចោល ចេញទៅដើរលេងឆ្លងឆ្នាំនៅឯខេត្តកំពត ស្រាប់តែនៅវេលាម៉ោងខាងលើ សង្ស័យទុស្សេចរន្តអគ្គិសនី ទើបបង្កជាអគ្គិភ័យឆេះរាលពីមួយខ្នងទៅមួយខ្នង សរុបចំនួន៦ខ្នងគឺអស់ទាំងស្រុង ។ ដូចពាក្យចាស់ពោលថា «សូវលិចទូកកណ្ដាលទន្លេ កុំឱ្យភ្លើងឆេះផ្ទះ» គឺគ្មានអ្វីឡើយ សូម្បីកណ្ដុរ កន្លាត ក៏មិនសល់ដែរ ។
ក្នុងហេតុការណ៍ខាងលើ កម្លាំងសមត្ថកិច្ច ទាំងអាវុធហត្ថ ទាំងនគរបាលបាននាំរថយន្តពន្លត់អគ្គិភ័យរបស់អធិការដ្ឋានស្រុក ចេញទៅជួយអន្តរាគមន៍បាញ់ទឹកពន្លត់ភ្លើង ប៉ុន្តែជួយមិនទាន់ទេ ផ្ទះ៦ខ្នងក្លាយជាផេះអស់ទៅហើយ ។ ទោះជាមានការសង្ស័យពីការឆ្លងចរន្តភ្លើងយ៉ាងណាក្តី សមត្ថកិច្ចបានអះអាងថា នឹងបន្តធ្វើការស្រាវជ្រាវបន្ថែមទៀតពីមូលហេតុបង្កអគ្គិភ័យនេះ ៕
ចែករំលែកព័តមាននេះ