ប្រទេស​វៀតណាម ៖ ក្រុមកីឡា​បាល់ទាត់​ជម្រើសជាតិ​វៀតណាម ត្រូវ​តទល់​ជាមួយ​ក្រុម​ជម្រើសជាតិ​ថៃ ដើម្បី​ដណ្តើម​ជើងឯក​ពានរង្វាន់​អាស៊ាន AFF Cup ឆ្នាំ ២០២៤ ជាមួយ​ប្រាក់​រង្វាន់​៣០​ម៉ឺន​ដុល្លារ​អា​មេ​រិ​ក ដែល​ការ​ប្រកួត​វគ្គ​ផ្តាច់​ព្រ័ត្ត​ត្រូវធ្វើ​ឡើង​ពីរ​ជើង​។

ការ​ប្រកួត​ជើង​ទី​១ នឹង​ត្រូវធ្វើ​ឡើង​នៅ​ថ្ងៃ​ទី​២ ខែមករា ឆ្នាំ​២០២៥ ដោយ​វៀតណាម​នឹង​បើកទ្វារ​កីឡដ្ឋាន Viet Tri របស់​ខ្លួន ទទួល​ស្វាគមន៍​ថៃ វេលា​ម៉ោង ០៨:០០​នាទី​យប់​នេះ​ផ្ទាល់​តែ​ម្តង​។ ចំណែក​ជើង​ទី​២ នៅ​ថ្ងៃ​ទី​៥ ខែមករា ឆ្នាំ​២០២៥ ដោយ​ថៃ​នឹង​បើកទ្វារ​កីឡដ្ឋាន​ជាតិ Rajamangala របស់​ខ្លួន ស្វាគមន៍​វៀតណាម នៅ​វេលា​ម៉ោង ០៨:០០​នាទី​យប់ ហើយ​ក៏​ជា​ជំនួប​ចុង​ក្រោយ​កាត់សេចក្តី​រក​ម្ចាស់​ជើងឯក​។

យោង​តាម​ការ​ចេញផ្សាយ​ដោយសារ​ព័ត៌មាន VnExpress កាលពី​ពេល​ថ្មី​ៗ​នេះ បានឱ្យ​ដឹង​ថា មុន​ពេល​ត្រូវ​តទល់​នឹង​ម្ចាស់ផ្ទះ​វៀតណាម​ជើង​ទី​១ នៅ​យប់​នេះ ខ្សែការពារ​ឆ្នើម​ក្រុម​ដំរី​សឹក​ថៃ Chalermsak Aukkee បាន​បង្ហាញ​ទំនុកចិត្ត​ខ្ពស់​លើ​សមត្ថភាព​របស់​ថៃ​ក្នុង​ការ​ផ្តួល​វៀតណាម​ក្នុង​វគ្គ​ផ្តាច់ព្រ័ត្រ ហើយ​ក៏​បាន​បោះសម្តី​ថា គេ​មិន​ដែល​ស្គាល់​ខ្សែប្រយុទ្ធ​ដ៏​មុត​ស្រួច​ថ្មី​របស់​ក្រុម​អ្នក​ចម្បាំង​ផ្កាយ​មាស​វៀតណាម ខ្សែប្រយុទ្ធ​សញ្ជាតិ​ដើម​ប្រេ​ស៊ី​ល Nguyen Xuan Son គឺជា​នរណា​នោះ​ទេ​។

ក្រោយ​ផ្តួល​ហ្វី​លី​ពី​ន កាលពី​ថ្ងៃ​ទី​៣០ ខែធ្នូ ឆ្នាំ​២០២៤ កីឡាករ Aukkee ត្រូវ​បាន​អ្នកកាសែត​សួរ​ថា តើ​គេ​បារម្ភ​ទេ ចំពោះ​ការ​ប្រឈម​មុខ​នឹង​វៀតណាម​ក្នុង​វគ្គ​ផ្តាច់ព្រ័ត្រ? ខ្សែការពារ​វ័យ​៣០​ឆ្នាំ​រូប​នេះ បាន​និយាយ​ថា «​ទម្រង់​លេង​ថៃ​មាន​ភាព​ប្រសើរ​ឡើង​រាល់​ការ​ប្រកួត​។ យើង​មិន​ខ្លាច​ការ​លេង​ជាមួយ​វៀតណាម​នៅ​ទីក្រុង​បាងកក​នោះ​ទេ​។ សំណួរ​នេះ​គួរតែ​សួរ​ថា តើ​វៀតណាម​ខ្លាច​ថៃ​ឬ​អត់? ទើបត្រូវ​»​។

Aukkee ជា​កីឡាករ​ដ៏​សំខាន់​ក្នុង​តំបន់​ការពារ​របស់​ថៃ​នោះ នឹង​ត្រូវ​ប្រឈម​មុខជា​មួយ​ខ្សែប្រយុទ្ធ​ចូលសញ្ជាតិ​របស់​វៀតណាម Nguyen Xuan Son ដែល​មានឈ្មោះ​កំណើត​ថា Rafaelson Bezerra Fernandes ហើយ​បច្ចុប្បន្ន​កំពុង​ឈរ​ជា​កីឡាករ​ស៊ុត​បញ្ចូល​ទី​ច្រើន​ជាងគេ​នៅ AFF Cup ឆ្នាំ ២០២៤ ដោយ​រកបាន​៥​គ្រាប់​ត្រឹម​៣​ប្រកួត​ប៉ុណ្ណោះ​។ ទោះ​យ៉ាងណា​ក៏​ដោយ Aukkee សមាជិក​ក្រុម Port FC នៃ​លី​គ​កំពូល​ថៃ បាន​បន្ត​ថា តើ Xuan Son ជា​នរណា? តើ​គេ​ខ្លាំង​មែន​អត់?ចឹ​ង​ទុក​ឱ្យ​គេ​តទល់​ជាមួយ Jonathan Khemdee ចុះ (​ខ្សែការពារ​ឆ្នើម​ថៃ​) ខ្ញុំ​ធានា​ថា Khemdee ខ្លាំង​ជាង​»​។

ថៃ​ក្នុង​នាម​ក្រុម​ការពារ​តំណែង​ជើងឯក ស្ថិត​នៅ​ពូ​ល A ដែល​រួម​មាន សិង្ហ​បុរី ម៉ា​ឡេ​ស៊ី កម្ពុជា និង​ទី​ម័​រ​ខាងកើត ហើយ​បញ្ចប់​នៅ​កំពូល​តារាង ក្រោយ​ឈ្នះ​ទាំង​៤​ប្រកួត​។ លុះដល់​វគ្គ​ពាក់កណ្តាល​ផ្តាច់ព្រ័ត្រ ក្រុម​របស់​គ្រូបង្វឹក​ជនជាតិ​ជប៉ុន លោក Masatada Ishii មួយ​នេះ បន្ត​យកឈ្នះ​ហ្វី​លី​ពី​ន​ទាំង​លំបាក​សរុប​ទាំង​ពីរ​ជើង លទ្ធផល ៤-៣ ខណៈ​ជើង​ទី​១ ភ្លាត់​ចាញ់​ម្ចាស់ផ្ទះ​ហ្វី​លី​ពី​ន​លទ្ធផល ២-១ និង​ជា​ការ​ចាញ់​លើក​ដំបូង​របស់​ថៃ​ក្រោម​ថ្វី​ជើង​ហ្វី​លី​ពី​ន​។

ដោយឡែក វៀតណាម ក្រោម​ការ​ដឹកនាំ​របស់​គ្រូបង្វឹក​ជនជាតិ​កូរ៉េ​ខាងត្បូង លោក Kim Sang-sik ស្ថិត​នៅ​ពូ​ល B ដែល​រួម​មាន ហ្វី​លី​ពី​ន ឥណ្ឌូ​ណេ​ស៊ី មី​យ៉ា​ន់​ម៉ា និង ឡាវ ដោយ​បញ្ចប់​នៅ​កំពូល​តារាង ក្រោយ​ឈ្នះ​៣​ប្រកួត និង​ស្មើ​១​ប្រកួត​។ វគ្គ​ពាក់កណ្តាល​ផ្តាច់ព្រ័ត្រ ពួក​គេ​បន្ត​យកឈ្នះ​សិង្ហ​បុរី​សរុប​ទាំង​ពីរ​ជើង​លទ្ធផល ៥-១ ដោយ​ជើង​ទី​១ ទៅ​បំបាក់​ម្ចាស់ផ្ទះ​សិង្ហ​បុរី​លទ្ធផល ២-០​។

ប្រវត្តិ​ជួប​គ្នា ២០​ប្រកួត​កន្លង​មក ថៃ​ឈ្នះ ១១​លើក វៀតណាម​ឈ្នះ​ត្រឹម ២​លើក និង​ស្មើគ្នា ៧​លើក​។ ជួប​គ្នា ៥​លើក​ចុង​ក្រោយ ថៃ​ឈ្នះ ៣​លើក និង​ស្មើគ្នា ២​លើក​។ ចំណែក​នៅ​ក្នុង​ពានរង្វាន់ AFF Cup ក្រុម​ទាំង​ពីរ​ធ្លាប់​ជួប​គ្នា ១០​លើក ថៃ​ឈ្នះ ៥​លើក ខណៈ​វៀតណាម​ឈ្នះ​ត្រឹមតែ ១​លើក​ប៉ុណ្ណោះ​។ នៅ​ក្នុង​ពានរង្វាន់​នេះ​ទៀត​សោត ថៃ​ឈាន​ដល់​វគ្គ​ផ្តាច់ព្រ័ត្រ​ជា​លើក​ទី​១១ ចំណែក​វៀតណាម​គឺជា​លើក​ទី​៥​។

គួរ​បញ្ជាក់​ថា ពានរង្វាន់​ជើងឯក​អាស៊ាន​ពី​មុន​ត្រូវ​បាន​ហៅ​ថា AFF Championship ឬ AFF Cup មុន​ប្រែជា ASEAN Championship ឬ ASEAN Cup បច្ចុប្បន្ន​ជា ASEAN Mitsubishi Electric Cup ដោយ​ផ្អែក​លើ​ម្ចាស់​ឧបត្ថម្ភ គឺជា​ការ​ប្រកួត​រៀបចំ​ដោយ​សហព័ន្ធ​បាល់ទាត់​អាស៊ី​អាគ្នេយ៍ (AFF) សម្រាប់​ក្រុម​បុរស​។ បង្កើត​ដំបូង​នៅ​ក្នុង​ឆ្នាំ ១៩៩៦ បច្ចុប្បន្ន ថៃ​ឈ្នះ​ជើងឯក​ច្រើន​ជាងគេ​ពោល​៧​សម័យកាល​, សិង្ហ​បុរី ឈ្នះ​៤​សម័យកាល​, វៀតណាម​ឈ្នះ​២​សម័យកាល និង​ម៉ា​ឡេ​ស៊ី​ឈ្នះ​១​សម័យកាល​៕ រូបភាព ៖ FAT, VFF និង ASEAN United FC