សហរដ្ឋអាមេរិក ៖ តារាបាល់បោះ LeBron James គឺជាបុគ្គលដំបូងគេក្នុងប្រវត្តិសាស្ត្រ NBA ដែលក្លាយជាកីឡាករអាជីពនៅវ័យក្មេងខ្ចី និងបន្តអាជីពរហូតដល់អាយុ៤០ឆ្នាំ។ កំណត់ត្រាជាប្រវត្តិសាស្ត្រនេះ…
សហរដ្ឋអាមេរិក ៖ តារាបាល់បោះ LeBron James គឺជាបុគ្គលដំបូងគេក្នុងប្រវត្តិសាស្ត្រ NBA ដែលក្លាយជាកីឡាករអាជីពនៅវ័យក្មេងខ្ចី និងបន្តអាជីពរហូតដល់អាយុ៤០ឆ្នាំ។ កំណត់ត្រាជាប្រវត្តិសាស្ត្រនេះ ត្រូវបានកំណត់ក្នុងការប្រកួតដែលក្រុម Los Angeles Lakers ចាញ់ក្រុម Cleveland Cavaliers ។
កីឡាករសញ្ជាតិអាមេរិក LeBron James បានបង្ហាញខ្លួនជាកីឡាករបាល់ទាត់អាជីពជាលើកដំបូងរបស់សមាគមបាល់បោះជាតិសហរដ្ឋអាមេរិក (NBA) នៅវ័យ១៨ឆ្នាំ កាលពីឆ្នាំ ២០០៣ ហើយតារាបាល់ទាត់ដ៏ល្បីលំដាប់ពិភពលោករូបនេះ បានឈានដល់អាយុ៤០ឆ្នាំហើយ កាលពីថ្ងៃទី៣០ ខែធ្នូ ឆ្នាំ២០២៤។ បច្ចុប្បន្នកូនប្រុសច្បងរបស់ LeBron James គឺកីឡាករ Bronny James ក៏កំពុងតែប្រកបអាជីពក្នុងក្រុមតែមួយជាមួយឪពុករបស់ខ្លួនផងដែរ បន្ទាប់ពីចូលរួមជាមួយក្រុមនេះ កាលពីខែមិថុនា ឆ្នាំ២០២៤។
នៅក្នុងការប្រកួតក្របខណ្ឌ NBA រដូវកាល ២០២៤-២០២៥ កាលពីថ្ងៃទី៣១ ខែធ្នូ ឆ្នាំ២០២៤ LeBron James រកបាន២៣ពិន្ទុ ដ្បិតក្រុម Los Angeles Lakers ចាញ់ក្រុម Cleveland Cavaliers ក្នុងលទ្ធផល ១២២ទល់នឹង១១០ នៅកីឡដ្ឋាន Crypto.com Arena ស្ថិតនៅទីក្រុងឡូសអាន់ជ័រលេស ប៉ុន្តែការរកបាន២៧ពិន្ទុពីកីឡាករ Jarrett Allen បានជួយឱ្យ Cleveland ឈ្នះ៨ប្រកួតជាប់គ្នា។
LeBron James ដែលត្រូវបានចាត់ទុកជាតារាបាល់បោះដ៏អស្ចារ្យបំផុតគ្រប់ពេលវេលានោះ កាលពីឆ្នាំ ២០២៤ បានក្លាយជាកីឡាកររកពិន្ទុពីការបោះបាល់កន្ត្រកច្រើនជាងគេនៅក្នុងប្រវត្តិសាស្ត្រ NBA ចំនួន ៤១,១៥៤ពិន្ទុ។ តារាឆ្នើមក្រុមជម្រើសជាតិអាមេរិករូបនេះ បានឈ្នះជើងឯក NBA ចំនួន៤សម័យកាល និងឈ្នះពានរង្វាន់កីឡាករឆ្នើមបំផុតប្រចាំឆ្នាំ ឬ Most Valuable Player ចំនួន៤លើក និងកំពុងស្ថិតក្នុងការរដូវកាលទី២២ នៃក្របខណ្ឌ NBA ដោយស្មើកំណត់ត្រាជាមួយកីឡាករ Vince Carter ដែលបានចូលនិវត្តន៍តាំងឆ្នាំ ២០២០។
LeBron James ក៏បានដើរតួយ៉ាងសំខាន់បំផុតជួយជម្រើសជាតិអាមេរិក ឈ្នះមេដាយមាសព្រឹត្តិការណ៍ FIBA Americas Championship ឆ្នាំ ២០០៧ ព្រឹត្តិការណ៍អូឡាំពិកឆ្នាំ ២០០៨ នៅចិន ២០១២ នៅចក្រភពអង់គ្លេស និង ២០២៤ ថ្មីៗនេះ នៅបារាំង រួមទាំងមេដាយសំរឹទ្ធព្រឹត្តិការណ៍ FIBA World Championship ឆ្នាំ ២០០៦ នៅជប៉ុន និងឆ្នាំ ២០០៤ ព្រឹត្តិការណ៍អូឡាំពិកនៅក្រិក។
កាលពីឆ្នាំ ២០២៤ LeBron James រកចំណូលបានសរុប ១២៨.២លានដុល្លារ ដោយឈរនៅចំណាត់ថ្នាក់ទី៤ ពិភពលោក សម្រាប់បញ្ជីអត្តពលិករកចំណូលបានច្រើនជាងគេបំផុតប្រចាំឆ្នាំរបស់ទស្សនាវដ្តី Forbes ខណៈដែលកីឡាករបាល់ទាត់ Cristiano Ronaldo សញ្ជាតិព័រទុយហ្គាល់ឈរលេខ១ពិភពលោក ជាមួយចំណូលសរុប ២៦០លានដុល្លារ។
មិនត្រឹមតែប៉ុណ្ណោះ LeBron James បានក្លាយជាកីឡាករ NBA ដំបូងគេ ដែលកំពុងប្រកបអាជីពទទួលបានងារ «មហាសេដ្ឋី» ពីទស្សនវដ្តី Forbes ជាផ្លូវការ កាលពីខែមិថុនា ឆ្នាំ២០២២។ គិតមកទល់ពេលនេះ ទ្រព្យសម្បត្តិរបស់តារាបាល់បោះឆ្នើមរូបនេះ ត្រូវបានប៉ាន់ប្រមាណថាមានសរុបរហូតដល់ ១.៣ពាន់លានដុល្លារ៕ ដកស្រង់ ៖ BBC, ESPN និង Reuters
ចែករំលែកព័តមាននេះ