រាជធានី​ភ្នំពេញ ៖ ក្រសួង​ធនធានទឹក និង​ឧតុនិយម បាន​ឲ្យ​ដឹង​ថា​ចាប់ពី​ថ្ងៃ​ទី​២ ដល់ទី​៤ ខែមករា ឆ្នាំ​២០២៥​នេះ អាកាសធាតុ​នឹង​ចុះ​ត្រជាក់ ដល់​១៨​អង្សា​សេ ។

យោង​តាម​ព្រឹត្តិបត្រ​ព័ត៌មាន​ស្តី​ពី​ស្ថានភាព​ធាតុអាកាស​របស់​ក្រសួង​ធនធានទឹក នៅ​ថ្ងៃ​ទី​២ មក​រា ឆ្នាំ​២០២៥ បាន​លើក​ឡើង​ថា ស្ថានភាព​ធាតុអាកាស​នៅ​ព្រះរាជាណាចក្រ​កម្ពុជា សម្រាប់​ថ្ងៃ​ទី​២ ខែមករា ឆ្នាំ​២០២៥ របប​ខ្យល់មូសុង​ឦសាន ដែល​គ្របដណ្តប់​លើ​សមុទ្រ​ចិន​ខាងត្បូង​អាង​ទន្លេមេគង្គ ព្រះរាជាណាចក្រ​កម្ពុជា និង​ឈូង​សមុទ្រ​ថៃ បាន​ថយឥទ្ធិពល ។

ក្រសួង​បាន​លើក​ឡើង​ទៀត​ថា ស្ថានភាព​បែប​នេះ​នឹង​ធ្វើ​ឱ្យ ៖ ចាប់ពី​ថ្ងៃ​ទី​២ ដល់​ថ្ងៃ​ទី​៤ ខែមករា ឆ្នាំ​២០២៥ នៅ​តំបន់​វាលទំនាប​មាន​សីតុណ្ហភាព​មធ្យម​អប្បបរមា​២០°C និង​សីតុណ្ហភាព​មធ្យម​អតិបរមា​៣១°C​។ ខ្យល់​បក់​មក​ពី​ទិសឦសាន និង​អាគ្នេយ៍​មាន​ល្បឿន​មធ្យម​៣,៥​ម៉ែត្រ​វិនាទី ។

ដោយឡែក នៅ​តំបន់​ខ្ពង់រាប​មាន​សីតុណ្ហភាព​មធ្យម​អប្បបរមា​១៨°C និង​សីតុណ្ហភាព​មធ្យម​អតិបរមា​៣២°C ។ ខ្យល់​បក់​មក​ពី​ទិសឦសាន និង​បូព៌​មាន​ល្បឿន​មធ្យម​៤​ម៉ែត្រ​វិនាទី ។ ចំណែក​នៅ​តំបន់​មាត់សមុទ្រ សីតុណ្ហភាព​មធ្យម​អប្បបរមា​២០°C និង​សីតុណ្ហភាព​មធ្យម​អតិបរមា​៣២°C ។ ខ្យល់​បក់​មក​ពី​ទិសឦសាន និង​អាគ្នេយ៍​មាន​ល្បឿន​មធ្យម​៤,៥​ម៉ែត្រ​/​វិនាទី ។ រលក​សមុទ្រ​មាន​កម្ពស់​មធ្យម​អប្បបរមា ០,៥០​ម៉ែត្រ និង​កម្ពស់​មធ្យម​អតិបរមា​១,៥០​ម៉ែត្រ ៕