ទីក្រុងញូដេលី៖ បន្ទាប់ពីមានឧបទ្ទវហេតុធ្លាក់យន្តហោះកាលពីប៉ុន្មានថ្ងៃមុន ស្លាប់ជាង២៤០នាក់ អាកាសយានិករបស់ក្រុមហ៊ុនអាកាសចរណ៍ឥណ្ឌាចាប់ផ្ដើមបង្កើនការប្រុងប្រយ័ត្នខ្ពស់។ ថ្ងៃនេះ គ្រាន់តែមើលសភាពការណ៍មិនសូវស្រួល អាកាសយានិករបស់យន្តហោះខ្នាតយក្សបូអ៊ីង៧៨៧ឌ្រីមឡាញណឺ (Boeing 787-8 Dreamliner)…
ទីក្រុងញូដេលី៖ បន្ទាប់ពីមានឧបទ្ទវហេតុធ្លាក់យន្តហោះកាលពីប៉ុន្មានថ្ងៃមុន ស្លាប់ជាង២៤០នាក់ អាកាសយានិករបស់ក្រុមហ៊ុនអាកាសចរណ៍ឥណ្ឌាចាប់ផ្ដើមបង្កើនការប្រុងប្រយ័ត្នខ្ពស់។ ថ្ងៃនេះ គ្រាន់តែមើលសភាពការណ៍មិនសូវស្រួល អាកាសយានិករបស់យន្តហោះខ្នាតយក្សបូអ៊ីង៧៨៧ឌ្រីមឡាញណឺ (Boeing 787-8 Dreamliner) បានបញ្ជាយន្តហោះថយក្រោយទៅរកអាកាសយានដ្ឋាននៃទីក្រុងហុងកុងវិញជាបន្ទាន់បន្ទាប់ពីចាកចេញដំណើរបានត្រឹមតែមួយភ្លែតប៉ុណ្ណោះ។
តាមគម្រោង យន្តហោះនេះត្រូវចាកចេញដំណើរពីទីក្រុងហុងកុងឆ្ពោះទៅរដ្ឋធានីញូដេលី។ សារព័ត៌មានឥណ្ឌាចុះផ្សាយថាអាចដោយសារបញ្ហារអាក់រអួលខ្លះៗផ្នែកបច្ចេកទេស។ តាមរយៈរបាយការណ៍ស្ដីពីការហោះហើរ គេឃើញថាអាកាសយានិកនៃជើងហោះហើរលេខអេអាយ៣១៥ (Flight AI315) ចេញដំណើរពីហុងកុងបាន៣០នាទីក៏បកក្រោយវិញជាបន្ទាន់។
អ្នកនាំពាក្យអាកាសយានដ្ឋានទីក្រុងហុងកុងថ្លែងថាយន្តហោះដឹកអ្នកដំណើរដែលជារបស់ក្រុមហ៊ុនអ៊ែរឥណ្ឌា (Air India) ត្រូវវិលទៅហុងកុងវិញ និងស្នើសុំចុះចតនៅម៉ោង១រសៀល។ យន្តហោះអាចចុះចតដោយសុវត្ថិភាពនៅម៉ោង១:១៥រសៀល។ រាល់ប្រតិបត្តិការហោះហើរនៅអាកាសយានដ្ឋានទីក្រុងហុងកុងនោះអាចដំណើរការជាធម្មតាដោយគ្មានការរំខានទេ។
ហេតុការណ៍នេះកើតឡើងក្រោយការធ្លាក់យន្តហោះឥណ្ឌាដែលចេញដំណើរទើបតែបានជាង៣០វិនាទីប៉ុណ្ណោះក៏ធ្លាក់ចុះមកវិញ និងផ្ទុះឆេះយ៉ាងសន្ធោសន្ធៅ។ មនុស្ស២៤១នាក់ស្លាប់ គិតទាំងអ្នកជិះនៅក្នុងយន្តហោះ និងអ្នកស្នាក់នៅក្នុងអគារដែលយន្តហោះនេះធ្លាក់ពីលើ។ នៅក្នុងចំណោមអ្នកដំណើរទាំងអស់មានតែម្នាក់គត់ដែលនៅរស់។
ក្រុមហ៊ុនអ៊ែរឥណ្ឌា (Air India) ថ្លែងថាខ្លួនកំពុងអនុវត្តតាមគោលការណ៍ណែនាំរបស់អាកាសចរណ៍ស៊ីវិលឥណ្ឌាដើម្បីត្រួតពិនិត្យមើលយន្តហោះម៉ាកបូអ៊ីង៧៨៧របស់ខ្លួនទាំងអស់។ អ៊ែរឥណ្ឌាបានត្រួតពិនិត្យលក្ខណៈបច្ចេកទេសនៅក្នុងយន្តហោះប្រភេទនេះបាន៩គ្រឿងរួចហើយ ហើយកំពុងពិនិត្យមើលយន្តហោះដែលនៅសេសសល់ចំនួន២៤គ្រឿងទៀត៕
ចែករំលែកព័តមាននេះ