រាជធានីភ្នំពេញ ៖ ដូចយើងដឹងហើយថា កាលពីថ្ងៃទី១៥ ខែមិថុនា ឆ្នាំ២០២៥ សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា បានចេញសេចក្តីថ្លែងការណ៍រួមស្តីពីការគាំទ្រលើសេចក្តីអំពាវនាវរបស់សម្តេច នាយករដ្ឋមន្ត្រី…
រាជធានីភ្នំពេញ ៖ ដូចយើងដឹងហើយថា កាលពីថ្ងៃទី១៥ ខែមិថុនា ឆ្នាំ២០២៥ សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា បានចេញសេចក្តីថ្លែងការណ៍រួមស្តីពីការគាំទ្រលើសេចក្តីអំពាវនាវរបស់សម្តេច នាយករដ្ឋមន្ត្រី ក្នុងការចូលរួមសម្រាលបន្ទុកហិរញ្ញវត្ថុសម្រាប់បងប្អូនប្រជាពលករដែលត្រលប់មកពីថៃវិញ ។
ឆ្លើយតបនឹងការកាយវិការគាំទ្ររបស់សមាគមទាំងពីរខាងលើ សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅថ្ងៃទី១៦ ខែមិថុនា ឆ្នាំ២០២៥នេះបានផ្ញើសារថ្លែងអំណរគុណយ៉ាងដូច្នេះថា ៖ «ខ្ញុំសូមអរគុណចំពោះសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ដែលបានបង្ហាញនៅឆន្ទៈជាវិជ្ជមាន ទៅនឹងការអំពាវនាវរបស់ខ្ញុំ ក្នុងការពិនិត្យលទ្ធភាពជួយសម្រាលបន្ទុកហិរញ្ញវត្ថុសម្រាប់បងប្អូនប្រជាពលករដែលត្រលប់មកពីថៃវិញ ចំពោះអ្នកដែលមានជាប់ជំពាក់បំណុលជាមួយធនាគារ ឬគ្រឹះស្ថានមីក្រូហិរញ្ញវត្ថុទៅតាមលទ្ធភាពដែលអាចធ្វើទៅបាន ។ នេះ គឺបង្ហាញអំពីឆន្ទៈក្នុងការចូលរួមក្នុងស្មារតីសាមគ្គីឯកភាពជាតិ និងការជួយគ្នាទៅវិញទៅមក ពេលប្រទេសជាតិ និងប្រជាពលរដ្ឋខ្មែរយើងប្រឈមនឹងបញ្ហា។»
គួររំលឹកថា សមាគមធនាគារនៅកម្ពុជា (ABC) និងសមាគមមីក្រូហិរញ្ញ វត្ថុកម្ពុជា (CMA) សូមប្រកាសគាំទ្រយ៉ាងពេញទំហឹងចំពោះការអំពាវនាវរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ឱ្យសមាគមទាំងពីរ «ពិនិត្យលទ្ធភាពក្នុងការជួយសម្រាលបន្ទុកហិរញ្ញវត្ថុសម្រាប់បងប្អូនប្រជាពលករដែលត្រលប់មកពីប្រទេសថៃវិញចំពោះអ្នកដែលមានជាប់ជំពាក់កម្ចីជាមួយធនាគារ ឬគ្រឹះស្ថានមីក្រូហិរញ្ញវត្ថុទៅតាមលទ្ធភាព ឬ ក្នុងមួយរយៈពេលកំណត់ណាមួយដែលអាចធ្វើទៅបាន» ។
សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជាបន្តថា ការអំពាវនាវនេះបានបង្ហាញឱ្យឃើញពីជម្រៅទឹកចិត្ត និងកាយវិការដ៏ល្អប្រពៃក្នុងភាពជាអ្នកដឹកនាំគំរូរបស់សម្តេចដែលតែងតែយកចិត្តទុកដាក់ រួមសុខរួមទុក្ខ ផ្តល់ភាពកក់ក្តៅ និងគិតគូរអំពីជីវភាពរស់នៅរបស់បងប្អូនខ្មែរយើងនៅគ្រប់ទិសទីក្នុងគ្រប់កាលៈទេសៈ ។ សមាគមទាំងពីរសង្កត់ធ្ងន់ថា គ្រឹះស្ថានសមាជិកនៃសមាគមទាំងពីរនឹង ពិនិត្យឱ្យអស់លទ្ធភាពចូលរួមដាក់ចេញនូវវិធានការសមស្រប ក្នុងការបន្ធូរបន្ថយបន្ទុកហិរញ្ញវត្ថុ សម្រាប់បងប្អូនប្រជាពលករ តាមរយៈការរៀបចំឥណទានឡើងវិញ ដែលជាយន្តការរបស់សមាគមបាន និងបន្តអនុវត្ត ។
ក្នុងករណីមានតម្រូវការជាក់ស្តែងក្នុងរៀបចំឥណទានឡើងវិញ ក៏ដូចជា សំណើសុំផ្តល់ការគាំទ្រផ្សេងៗសមាគមស្នើសុំបងប្អូនប្រជាពលករទាំងអស់ដែលជាអតិថិជន ទាក់ទងផ្ទាល់ជាមួយគ្រឹះស្ថានធនាគារ និងហិរញ្ញវត្ថុនៅរៀងរាល់ម៉ោងធ្វើការ ដោយភ្ជាប់មកជាមួយនូវអត្តសញ្ញាណបណ្ណ ឯកសារឥណទាន បណ្ណ/សៀវភៅការងារ និងលិខិតពាក់ព័ន្ធនានា ដើម្បីពិភាក្សារិះរកដំណោះ ស្រាយដ៏សមរម្យ ។
សមាគមទាំងពីរនឹងបន្តសហការជាមួយធនាគារជាតិនៃកម្ពុជា និងភាគីពាក់ព័ន្ធ ដើម្បីធានាថា គ្រឹះស្ថានហិរញ្ញវត្ថុនៅតែចូលរួមយ៉ាងពេញលេញ និងទូលំទូលាយក្នុងការគាំទ្រដល់ការអភិវឌ្ឍសង្គម-សេដ្ឋកិច្ចជាតិ និងលើកស្ទួយជីវភាពរបស់ប្រជាជន ទៅទៅតាមលទ្ធភាពជាក់ស្តែង និងការដឹកនាំចង្អុល បង្ហាញរបស់ធនាគារជាតិនៃកម្ពុជា និងរាជរដ្ឋាភិបាល ។
គួរកត់សម្គាល់ដែរថា នាព្រឹកថ្ងៃទី១៦ ខែមិថុនា ឆ្នាំ២០២៥ សម្ដេចតេជោ ហ៊ុន សែន ប្រធានព្រឹទ្ធសភា កម្ពុជាបានប្រកាសស្វាគមន៍បងប្អូនប្រជាពលរដ្ឋខ្មែរ ដែលកំពុងរស់នៅ ឬធ្វើការនៅប្រទេសថៃឱ្យវិលត្រឡប់មកកម្ពុជាវិញឱ្យបានឆាប់ ព្រោះជាពេលវេលាដ៏សាកសម ខណៈវិវាទព្រំដែនខ្មែរ-ថៃ មិនងាយនឹងបញ្ចប់ឆាប់ៗបានឡើយ ហើយយើងក៏មិនអាចនៅអែអង់រង់ចាំឲ្យក្រុមជ្រុលនិយមថៃមួយចំនួនបន្តប្រមាថមកលើបងប្អូនបានឡើយ ។
ម្យ៉ាងប្រជាពលរដ្ឋកម្ពុជា ដែលជាពលករទាំងអស់ ក៏មិនអាចបន្តរស់ពឹងពាក់គេអស់មួយជីវិតដូចគ្នានោះដែរ គួរតែត្រឡប់មកផ្ទះយើងវិញ ដោយសម្តេចតេជោ បានធានាអះអាងថា បច្ចុប្បន្នឱកាសការងារនៅក្នុងប្រទេសកម្ពុជាយើង គឺមានច្រើនរាប់សិបម៉ឺនកន្លែង ដូច្នេះកុំបារម្ភរឿងខ្វះការងារធ្វើអោយសោះ ទាំងក្នុងវិស័យឧស្សាហកម្ម កសិកម្ម និងវិស័យសំណង់ជាដើម ។
ដោយឡែកទាក់ទងទៅនឹងវិលត្រឡប់មកវិញ ដែលតែងមានការលើកឡើងភ្ជាប់ជាមួយបញ្ហាបំណុលនោះ សម្តេចតេជោ ហ៊ុន សែន បានថ្លែងអំណរគុណរបស់សមាគមគ្រឹះស្ថានហិរញ្ញវត្ថុនៅកម្ពុជា ដែលទទួលយកសំណូមពររបស់រាជរដ្ឋាភិបាល ក្នុងការសម្របសម្រួល ឬបន្ធូរបន្ថយសម្រាប់ការបង់ធនាគាររបស់ពលរដ្ឋត្រឡប់មកកម្ពុជា ប៉ុន្តែមិនមែនន័យថា អោយតែវិលត្រលប់មកវិញបានរួចផុតពីបំណុល ធនាគារនោះទេ៕
ចែករំលែកព័តមាននេះ