រាជធានីភ្នំពេញ ៖ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី១ ខែមករា ឆ្នាំ២០២៤នេះ…
រាជធានីភ្នំពេញ ៖ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី១ ខែមករា ឆ្នាំ២០២៤នេះ បានបញ្ជាក់អំពីប្រតិបត្តិការបង្ក្រាបក្រុមក្មេងទំនើងនៅចុងឆ្នាំ២០២៤ កន្លងទៅ ហើយសម្រាប់ឆ្នាំ២០២៥នេះ លោកបានដាក់បទបញ្ជារួចហើយ គឺត្រូវតែបង្កើនសកម្មភាពទ្វេដង ក្នុងការបង្ការ ទប់ស្កាត់ និងឈានទៅបង្ក្រាបក្រុមក្មេងទំនើងក្នុងភូមិសាស្ដ្ររាជធានីភ្នំពេញ ។
លោកឧត្តមសេនីយ៍ឯក ជួន ណារិន្ទ បានអះអាងថា ក្នុងរយៈពេលប៉ុន្មានថ្ងៃចុងក្រោយ ក៏មានហេតុការណ៍ ដែលបង្កដោយក្រុមក្មេងទំនើងកើតឡើងដែរ នៅខណ្ឌច្បារអំពៅ និងខណ្ឌកំបូល ប៉ុន្ដែត្រូវកម្លាំងជំនាញស្រាវជ្រាវបង្ក្រាបបានជាបន្ដបន្ទាប់ តាមរយៈកិច្ចសហការជាមួយស្នងការដ្ឋាននគរបាលខេត្តកណ្ដាល និងខេត្តកែប ។
បើតាមឧត្តមសេនីយ៍ឯក ជួន ណារិន្ទ គ្រប់ហេតុការណ៍ ដែលកើតឡើង គឺសមត្ថកិច្ចជំនាញតែងតែធ្វើការបង្ក្រាបបានជាបន្ដបន្ទាប់ បើទោះបីទប់ស្កាត់មិនទាន់បានទាំងស្រុងយ៉ាងណាក៏ដោយ ។
លោកឧត្តមសេនីយ៍ឯក ជួន ណារិន្ទ បញ្ជាក់ច្បាស់ថា សម្រាប់ឆ្នាំ២០២៥នេះ លោកបានដាក់បទបញ្ជារួចហើយ គឺត្រូវតែបង្កើនសកម្មភាពទ្វេដង ក្នុងការបង្ការ ទប់ស្កាត់ និងឈានទៅបង្ក្រាបក្រុមក្មេងទំនើង ក្នុងភូមិសាស្ដ្ររាជធានីភ្នំពេញ ។
លោកស្នងការនគរបាលរាជធានីភ្នំពេញ បានបង្ហើបអំពីផែនការចំពោះមុខ ដែលលោកបានដាក់ចេញ ក្នុងនោះរួមមានទាំងការងារផ្សព្វផ្សាយអប់រំ នៅតាមមូលដ្ឋានក្នុងវេទិកាសាធារណៈ ពង្រឹងអនុវត្តវិធានការជំនាញ និងរឹងបន្ដឹងវិធានការច្បាប់ ។
លើសពីនេះ លោកស្នងការបានដាក់បទបញ្ជាដល់ស្នងការរង ទទួលការងារព្រហ្មទណ្ឌ ពិសេសទទួលដឹកនាំការងារបង្ក្រាបទប់ស្កាត់ ក្រុមក្មេងទំនើង ត្រូវចុះធ្វើបច្ចុប្បន្នភាព នៅតាមមូលដ្ឋានទាំងមុខសញ្ញាបង្ហោះម៉ូតូ ឬកែច្នៃមធ្យោបាយនានា ដើម្បីជាចំណែកក្នុងការអនុវត្តបទបញ្ជារបស់ប្រមុខ នៃរាជរដ្ឋាភិបាលឲ្យកាន់តែមានប្រសិទ្ធភាពខ្ពស់បំផុត ។
ជាមួយគ្នានេះ លោកឧត្តមសេនីយ៍ឯក ជួន ណារិន្ទ ក៏បានស្នើសុំកិច្ចសហការជាមួយឪពុកម្ដាយ អាណាព្យាបាល លោកគ្រូ អ្នកគ្រូ និងនាយកសាលាទាំងអស់ ដើម្បីឲ្យជួយផ្ដល់ព័ត៌មាន ឬរាយការណ៍ទៅកាន់អាជ្ញាធរ និងសមត្ថកិច្ចមូលដ្ឋានក្នុងករណីមានសង្ស័យណាមួយពាក់ព័ន្ធសកម្មភាពរបស់កូនៗ ឬសិស្សានុសិស្សរបស់ខ្លួន។ ការទប់ស្កាត់ក្រុមក្មេងទំនើង ក៏ចាំបាច់ទាមទារឲ្យមានការចូលរួមពីគ្រប់ភាគីពាក់ព័ន្ធទាំងអស់ ។
បន្ថែមពីនេះ ឯកឧត្តម ឧត្តមសេនីយ៍ឯក ជួន ណារិន្ទ បានបកស្រាយនូវចម្ងល់មួយរបស់មហាជនពាក់ព័ន្ធវត្ថុតាង ដែលមានមធ្យោបាយប្រើសម្រាប់ធ្វើសកម្មភាព ដូចជា ដាវ និងកាំបិតជាដើមនោះ គឺសុទ្ធតែជាសម្ភារៈ កែច្នៃ ដោយក្រុមក្មេងទំនើងទាំងនោះផ្ទាល់តែម្ដង។ ដោយលោកស្នងការនគរបាលរាជធានីភ្នំពេញ ដាក់បទបញ្ជាដល់នគរបាលជំនាញ ឲ្យបន្ដយកចិត្តទុកដាក់តាមដានពិនិត្យទីតាំងលក់វត្ថុអនុស្សាវរីយ៍ ដែលមានសម្ភារៈយកទៅកែច្នៃជាដាវ ឬកាំបិតបាន ដើម្បីបង្ការ និងទប់ស្កាត់កុំឲ្យធ្លាក់ទៅដល់ដៃក្រុមក្មេងទំនើង ៕
ចែករំលែកព័តមាននេះ