ទីក្រុងដាម៉ាស់៖ ជោគវាសនា-អនាគតប្រទេសស៊ីរី ជាពិសេស ការរំពឹងថាក្រុមបស្ចិមប្រទេសនឹងលុបចោលទណ្ឌកម្មសេដ្ឋកិច្ចដែលបន្សល់ទុកតាំងពីសម័យដឹកនាំរបស់លោកអាល់អាសាត ឬយ៉ាងណាអាស្រ័យទៅលើកម្មវិធីនយោបាយរបស់រដ្ឋាភិបាលថ្មី។ ជាពិសេស អឺរ៉ុបចង់មើលជំហររបស់រដ្ឋាភិបាលនៅក្នុងវិស័យនយោបាយជាតិ និងនយោបាយការបរទេស។ ខាងលើនេះជាការលើកឡើងរបស់រដ្ឋមន្ត្រីការបរទេសអាល្លឺម៉ង់ លោកស្រីប៊ែបក់ (Baerbock) នៅក្នុងកិច្ចជំនួបជាមួយថ្នាក់ដឹកនាំថ្មី។
លោកស្រីចង់ឃើញការកែសម្រួលវិស័យសង្គមកិច្ច និងនយោបាយ។ ក្រុមដែលមាននិន្នាការនយោបាយចម្រុះរួមទាំងស្ត្រីអម្បូរខឺត (Kurd) គួរណាស់មានតួនាទីសំខាន់ៗបើរដ្ឋាភិបាលថ្មីចង់បានការគាំទ្រពីអឺរ៉ុប។ នៅក្នុងកិច្ចជំនួបរវាងប្រមុខការទូតបារាំង និងអាល្លឺម៉ង់ជាមួយមេដឹកនាំស៊ីរីថ្មីនោះ លោកស្រីប៊ែបក់ចង់សង្កត់ធ្ងន់ទៅលើការចូលរួមបង្កើតរដ្ឋាភិបាលដែលចូលរួមពីគ្រប់និន្នាការនយោបាយមិនថារបបចាស់ ឬរបបថ្មីនោះទេរួមទាំងជនជាតិភាគតិចគួរមានមុខតំណែងសំខាន់ៗផងដែរ។
លោកស្រីថ្លែងបន្តទៀតថាអឺរ៉ុបត្រៀមខ្លួនគាំទ្រផ្នែកនយោបាយ។ ប៉ុន្តែមិនជួយទំនុកបម្រុងរបបដឹកនាំថ្មីនេះភ្លាមៗទេ។ រដ្ឋមន្ត្រីទាំង២រូបធ្វើដំណើរទៅទីក្រុងដាម៉ាស់លើកនេះដើម្បីកែសម្រួលទំនាក់ទំនងឡើងវិញជាមួយប្រទេសស៊ីរី។ ឆ្លៀតនៅក្នុងឱកាសនេះ ពួកគេជំរុញឱ្យមានការផ្ទេរអំណាចដោយសន្តិវិធីនៅក្នុងសម័យអន្តរកាល។ លោកស្រីប៊ែបក់ និងលោកបារ៉ូ (Barrot) ជារដ្ឋមន្ត្រីអឺរ៉ុបដំបូងបំផុតដែលទៅបំពេញធ្វើទស្សនកិច្ចនៅស៊ីរីចាប់តាំងពីការដួលរលំរបបលោកអាល់អាសាត។
ដំណើរទស្សនកិច្ចនេះក៏ជាសារផ្ដាំផ្ញើទៅក្រុមអ្នកនយោបាយនៅស៊ីរីសូមធ្វើអ្វីដោយប្រយ័ត្នប្រយែង ហើយមិនត្រូវមានសុទិដ្ឋិនិយមខ្ពស់ពេកថា។ គេមិនត្រូវភ្លេចទេថាពួកឧទ្ទាមដែលឡើងកាន់អំណាចនោះក៏ធ្លាប់ជាក្រុមឥស្លាមដែលប្រកាន់និន្នាការតឹងរ៉ឹងផងដែរ។ ទោះជាយ៉ាងណាក្ដី ដំណើរទស្សនកិច្ចប៉ុណ្ណេះអាចចាត់ទុកថាជាការទទួលស្គាល់របបដឹកនាំថ្មីផងដែរ។
ជាថ្មីម្ដងទៀត អឺរ៉ុបនៅតែសង្កត់ធ្ងន់ទៅលើការធ្វើទំនើបកម្មរបៀបដឹកនាំរដ្ឋ មានន័យថាកុំសូវបុរាណ ឬប្រកាន់តឹងរ៉ឹងពេក ហើយគួរតែគោរពសិទ្ធិរបស់ជនជាតិភាគតិច។ ចំពោះសំណួររបស់អ្នកសារព័ត៌មានដែលថាតើអឺរ៉ុបត្រៀមលុបចោលការដាក់ទណ្ឌកម្មសេដ្ឋកិច្ចឬយ៉ាងណា? លោកស្រីប៊ែបក់បង្ហាញជំហរនយោបាយត្រង់ចំណុចនេះដោយប្រយ័ត្នប្រយែង។
លោកស្រីថ្លែងថាបញ្ហានេះអាស្រ័យទៅលើដំណើរការវិវត្តផ្នែកនយោបាយនៅប្រទេសស៊ីរី។ លោកស្រីទទួលស្គាល់ថាមានសញ្ញាវិជ្ជមានជាបណ្ដើរៗហើយ។ គ្រាន់តែថានៅក្នុងដំណាក់កាលនេះលោកស្រីមិនទាន់ហ៊ានវាយតម្លៃបែបណាទេ។ រដ្ឋាភិបាលអាល្លឺម៉ង់ និងបារាំងត្រៀមជួយផ្នែកបច្ចេកទេស និងការប្រឹក្សាយោបល់នៅក្នុងគម្រោងតាក់តែងរដ្ឋធម្មនុញ្ញថ្មី៕
មេដឹកនាំថ្មីរបស់ស៊ីរី លោកអាល់ជូឡានី (al-Julani)
ចែករំលែកព័តមាននេះ