ថ្វីត្បិតតែចំនួនពលរដ្ឋគ្រោះថ្នាក់ដល់ជីវិតនៅតិចក៏ពិតមែន ប៉ុន្តែករណីឆ្លងជំងឺកញ្ជ្រឹលនៅវៀតណាមផ្ទុះខ្លាំង រហូតដល់ផ្អើលនាយករដ្ឋមន្ត្រីចេញគោលការណ៍បង្ហារ និងទប់ស្កាត់ ខណៈកម្ពុជានៅមិនទាន់មានព័ត៌មាននៅឡើយទេ ប៉ុន្តែក៏គួរបង្ការ និងលើកកម្ពស់ការទប់ស្កាត់ត្រៀមអោយហើយ ។ តាមសេចក្តីរាយការណ៍របស់កាសែត Vietnam…
ថ្វីត្បិតតែចំនួនពលរដ្ឋគ្រោះថ្នាក់ដល់ជីវិតនៅតិចក៏ពិតមែន ប៉ុន្តែករណីឆ្លងជំងឺកញ្ជ្រឹលនៅវៀតណាមផ្ទុះខ្លាំង រហូតដល់ផ្អើលនាយករដ្ឋមន្ត្រីចេញគោលការណ៍បង្ហារ និងទប់ស្កាត់ ខណៈកម្ពុជានៅមិនទាន់មានព័ត៌មាននៅឡើយទេ ប៉ុន្តែក៏គួរបង្ការ និងលើកកម្ពស់ការទប់ស្កាត់ត្រៀមអោយហើយ ។
តាមសេចក្តីរាយការណ៍របស់កាសែត Vietnam News បានឲ្យដឹងថា គិតពីដើមឆ្នាំដល់នៅពាក់កណ្តាល ខែមីនា ឆ្នាំ២០១៥នេះ វៀតណាមបានកត់ត្រាករណីឆ្លងជំងឺកញ្ជ្រឹលប្រមាណជា៤០.០០០នាក់ និងស្លា.ប់៥នាក់ ។
ពាក់ព័ន្ធនឹងជំងឺនេះ ក្រសួងសុខាភិបាលវៀតណាម បានព្រមានថា ចំនួនករណីសង្ស័យថាកើតជំងឺកញ្ជ្រឹលនឹងបន្តកើនឡើងនៅទូទាំងប្រទេស ។ ជាពិសេស តំបន់ដែលមានហានិភ័យខ្ពស់ ដូចជា ខេត្តនៅតាមតំបន់ភ្នំ ដែលមានក្រុមជនជាតិភាគតិចរស់នៅមានកម្រិតលទ្ធភាពទទួលបានសេវាសុខភាព ហើយតំបន់ដែលមានអត្រាទទួលថ្នាំបង្ការទាប គឺងាយនឹងឆ្លងមេរោគច្រើនជាងគេ ។
លោកស្រី ដាវ ហុងឡាន (Dao Hong Lan) រដ្ឋមន្ត្រីក្រសួងសុខាភិបាលវៀតណាម បាននិយាយថា ការប្រែប្រួលអាកាសធាតុ និងការប្រែប្រួលរដូវធ្វើឱ្យស្ថានភាពជំងឺរាតត្បាតកាន់តែស្មុគស្មាញ និងមិនអាចទាយទុកជាមុនបាន ។ លោកស្រីបានស្នើឱ្យតំបន់ក្នុងតំបន់តាមដានយ៉ាងដិតដល់ និងរាយការណ៍ពីស្ថានភាពនេះឱ្យបានទាន់ពេល ។ លើសពីនេះទៀត ត្រូវអំពាវនាវឱ្យមានការចូលរួមពីគ្រប់កម្រិត និងគ្រប់វិស័យ មិនមែនតែវិស័យសុខាភិបាលនោះទេ ។
ការផ្ទុះរីករាលដាលនៃជំងឺកញ្ជ្រឹលនេះបានបញ្ជូនព័ត៌មានដល់លោក ផាម មិញជិញ ហើយលោកបានចេញបទបញ្ជាពន្លឿន ចាក់វ៉ាក់សាំងប្រឆាំងនឹងជំងឺកញ្ជ្រឹល ហើយបានស្នើដល់រដ្ឋមន្ត្រីក្រសួងសុខាភិបាលណែនាំ និងគាំទ្រដល់មូលដ្ឋាន ជំរុញយុទ្ធនាការចាក់វ៉ាក់សាំងការពារជំងឺកញ្ជ្រឹល ហើយបញ្ចប់វាមិនលើសពីចុងខែនេះ ។
លោកក៏សង្កត់ធ្ងន់ឲ្យវិស័យសុខាភិបាលត្រូវតែធានាឱ្យបានគ្រប់គ្រាន់នូវវ៉ាក់សាំងការពារជំងឺកញ្ជ្រឹល និងចែកចាយទាន់ពេលវេលាដល់មូលដ្ឋាន ហើយចេញបទបញ្ជាឲ្យក្រសួងហិរញ្ញវត្ថុសម្របសម្រួល ដើម្បីធានាបាននូវថវិកាគ្រប់គ្រាន់ និងទាន់ពេលវេលាសម្រាប់យុទ្ធនាការចាក់ថ្នាំបង្ការជំងឺកញ្ជ្រឹល ។ បណ្តាខេត្តដែលកំពុងតែផ្ទុះជំងឺនេះក៏មានខេត្តខ្លះជាប់នឹងព្រំដែនប្រទេសកម្ពុជាផងដែរ ដូច្នេះសូមឲ្យលើកកម្ពស់ការប្រុងប្រយ័ត្នជាពិសេស គឺអនាម័យខ្លួនប្រាណ ។
ចំពោះការផ្ទុះថ្មីនៅកម្ពុជាហាក់មិនទាន់មាននៅឡើយទេ អ្វីដែលមានគឺថា ពីខែមករា ដល់ខែធ្នូ កម្ពុជាធ្លាប់កើតជំងឺនេះសរុប៣៧៥ ករណី ។ ចំនួននេះនៅតិចនៅឡើយ ប៉ុន្តែទោះបីជាយ៉ាងណាក៏ដោយ អ្នកដែលពាក់ព័ន្ធ និងប្រជាពលរដ្ឋផ្ទាល់កុំធ្វេសប្រហែស ពីព្រោះកញ្ជ្រឹលក៏ជាប្រភេទជំងឺដែលអាចសម្លា.ប់ និងធ្វើឲ្យមនុស្សពិការបានដែរ ជាពិសេស គឺកុមារ ស្របពេលដែលមេរោគបង្ករជំងឺនេះវាក៏ងាយនឹងឆ្លងរីករាលដាលខ្លាំងផងដែរ ។
ជំងឺកញ្ជ្រឹល គឺជាប្រភេទជំងឺដែលមានវ៉ាក់សាំងចាក់ ប៉ុន្តែទោះបីជាយ៉ាងណាក៏ដោយក៏នៅមានករណីខ្លះមនុស្ស ជាពិសេស គឺកុមារនៅតែអាចមានករណីឆ្លងដែរ ។ ដូច្នេះគប្បីលើកកម្ពស់ការប្រុងប្រយ័ត្ន ។
តាមអ្វីដែលក្រសួងសុខាភិបាលធ្លាប់បានប្រកាសកន្លងមក ជំងឺនេះវាអាចចម្លងតាមការប៉ះពាល់អ្នកជំងឺតាមផ្លូវដង្ហើម ជាពិសេស គឺនៅពេលក្អក ឬកណ្តាស់ ដោយមានមេរោគសកម្ម ។ អ្នកជំងឺជាទូទៅមានរោគសញ្ញាហៀរសំបោរ ក្អក ភ្នែកក្រហម ហូរទឹកភ្នែក, មានចំណុចពណ៌សតូចៗនៅខាងក្នុងថ្ពាល់ កន្ទួលក្រហមលើស្បែក ។
ជំងឺនេះអាចបង្កផលវិបាកជាច្រើន គួរសមដែរ ជាពិសេស គឺស្លា.ប់ ពិការភ្នែក រលាកខួរក្បាល រាគធ្ងន់ធ្ងរ ឆ្លងមេរោគក្នុងត្រចៀក បញ្ហាផ្លូវដង្ហើម រលាកសួត ហើយប្រសិនបើវាឆ្លងដល់ស្ត្រីមានផ្ទៃពោះអាចបង្កគ្រោះថ្នាក់ដល់ម្តាយ ហើយអាចបណ្ដាលឱ្យទារកកើតមិនគ្រប់ខែ និងមានទម្ងន់ទាប ។ វីរុសកញ្ជ្រឹលធ្វើឱ្យប្រព័ន្ធភាពស៊ាំចុះខ្សោយងាយឆ្លងមេរោគផ្សេងៗដទៃទៀតបង្កលក្ខណៈឱ្យកុមារកាន់តែងាយរងគ្រោះខ្លាំង ។
ដើម្បីបង្ការ និងការពារមេរោគនេះ មាតា បិតា និងអាណាព្យាបាលកុមារ ត្រូវតែនាំកុមារដែលមានអាយុចាប់ពី៩ខែ ដល់៥៩ខែ ដែលមានការខកខានមិនបានទទួលវ៉ាក់សាំង មកទទួលថ្នាំបង្ការជំងឺកញ្ជ្រឹលឱ្យបានពីរដូស និងគ្រប់គ្នានៅតាមមណ្ឌលសុខភាព និងមន្ទីរពេទ្យនៅទូទាំងប្រទេស ។ ប្រសិនជួបករណីសង្ស័យជំងឺកញ្ជ្រឹល ដូចជា មានរោគសញ្ញា ក្តៅខ្លួនខ្លាំង ក្អក ហៀរសំបោរ និងកន្ទួលក្រហម សូមនាំកុមារមកពិគ្រោះជំងឺនៅតាមមណ្ឌលសុខភាព និងមន្ទីរពេទ្យដែលនៅជិតផ្ទះរបស់លោកអ្នក ។
សរុបទៅ សូមកុំមើលស្រាយសភាពការណ៍ ខាងរដ្ឋាភិបាលក៏គួរតែលើកកម្ពស់ការត្រៀមខ្លួន ដើម្បីកុំអោយវាផ្ទុះបានស្រវេស្រវារកដំណោះស្រាយ ។ ទោះវាមិនទាន់ផ្ទុះនៅកម្ពុជា ក៏ពិតមែន ក៏វាអាចនឹងឆ្លងរីករាលដាលដល់ដែរ ។ ដូច្នេះគប្បីយើងត្រូវតែត្រៀមលក្ខណៈទុកជាមុនឲ្យហើយ ដើម្បីកុំអោយស្តាយក្រោយ ៕
ចែករំលែកព័តមាននេះ