រាជធានីភ្នំពេញ ៖ ជនសង្ស័យដែលលួចលុយចំនួន៣៧០០ដុល្លារ ពីស្ត្រីជនជាតិអេត្យូពីម្នាក់បានត្រូវនគរបាលទេសចរណ៍យកមកធ្វើត្រាប់ឡើងវិញនៅផ្សារទួលទំពូង ក្នុងសង្កាត់ទួលទំពូងទី១ ខណ្ឌចំការមន កាលពីវេលាម៉ោងប្រមាណ៩ព្រឹកថ្ងៃទី១៥ ខែមីនា ឆ្នាំ២០២៥កន្លងទៅ ។…
រាជធានីភ្នំពេញ ៖ ជនសង្ស័យដែលលួចលុយចំនួន៣៧០០ដុល្លារ ពីស្ត្រីជនជាតិអេត្យូពីម្នាក់បានត្រូវនគរបាលទេសចរណ៍យកមកធ្វើត្រាប់ឡើងវិញនៅផ្សារទួលទំពូង ក្នុងសង្កាត់ទួលទំពូងទី១ ខណ្ឌចំការមន កាលពីវេលាម៉ោងប្រមាណ៩ព្រឹកថ្ងៃទី១៥ ខែមីនា ឆ្នាំ២០២៥កន្លងទៅ ។
ជនសង្ស័យឈ្មោះ អុល ច័ន្ទណារី ភេទស្រី អាយុ៣៧ឆ្នាំ ជនជាតិខ្មែរ មានមុខរបរលក់ដូរតាមអនឡាញ និងមានទីលំនៅផ្ទះលេខ ៥៥E៣ ផ្លូវលេខ២០០ ភូមិ៦ សង្កាត់បឹងរាំង ខណ្ឌដូនពេញ ។ ចំពោះវត្ថុតាងចាប់យកមាន ម៉ូតូស្គូពី១គ្រឿង ពណ៌ស ពាក់ផ្លាកលេខ ភ្នំពេញ ១HS-៦២៩៤ ស៊េរីឆ្នាំ២០២០ និងទូរស័ព្ទដៃ១គ្រឿង ។
បើតាមលោកឧត្តមសេនីយ៍ឯក រុន រ័ត្នវាសនា ប្រធាននាយកដ្ឋាននគរបាលទេសចរណ៍ បានឱ្យដឹងថា ដោយមានការរួមសហការជាមួយអាជ្ញាធរមូលដ្ឋាន និងគណ:កម្មការផ្សារផង សមត្ថកិច្ចបានបង្ហាញមុខជនសង្ស័យឱ្យអាជីវករលក់ដូរបានឃើញ ក្រែងធ្លាប់ឃើញធ្វើសកម្មភាពនៅកន្លែងរបស់ខ្លួន សូមប្រញាប់មកដាក់ពាក្យបណ្ដឹងជាបន្ត ដើម្បីងាយស្រួលដាក់បន្ទុកទៅលើជនសង្ស័យបន្ថែមទៀត ។
លោកប្រធាននាយកដ្ឋានបន្តថា បន្ទាប់ពីបានទទួលពាក្យបណ្តឹងរបស់ជនរងគ្រោះ ការិយាល័យនីតិវិធីបានចាប់ផ្តើមស៊ើបអង្កេត និងឈានដល់ឃាត់ខ្លួនជនសង្ស័យបានរយៈពេល១០ថ្ងៃមកហើយ ។ ជាមួយគ្នានេះ កម្លាំងជំនាញបានចាប់ផ្ដើមបិទ QRកូដ តាមផ្សារទូទាំងប្រទេស ប៉ុន្តែជំហានដំបូងក្នុងរាជធានីភ្នំពេញសិន ដែលមាន៣ចំណុច ៖
ទី១-លេខតេឡេក្រាមនាយកដ្ឋាន ការិយាល័យទេសចរណ៍ ។
ទី២-ផេករបស់នាយកដ្ឋាន ។
ទី៣-ទីតាំងរបស់នាយកដ្ឋាន ដើម្បីងាយស្រួលជនបរទេសដែលមានបញ្ហា អាចទៅដល់គោលដៅបានលឿន ។
ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី ។ សូមរំឭកថា កាលពីថ្ងៃទី២ ខែមីនា ឆ្នាំ២០២៥ វេលាម៉ោង១២និង២០នាទីថ្ងៃត្រង់ ជនសង្ស័យបានដើរចូលផ្សារទួលទំពូង ក្នុងគោលបំណងទិញសម្លៀកបំពាក់ឱ្យភ្ញៀវ ។ ពេលជនសង្ស័យដើរដល់តូបលេខ១១០១ ក៏ឃើញភ្ញៀវបរទេសម្នាក់កំពុងឈរទិញសម្លៀកបំពាក់ ដោយភ្ញៀវបរទេសនោះ បានដាក់កាបូបស្ពាយដែលដាក់លុយក្នុងនោះនៅលើធ្នើរតាំងសម្លៀកបំពាក់ ។
នៅពេលឃើញដូច្នេះ ជនសង្ស័យបានឈរនៅជាប់ភ្ញៀវបរទេសធ្វើខ្លួនជាអ្នកទិញដែរ ហើយក៏បានបន្លំលូកយកលុយចេញពីកាបូបស្ពាយដែលមានចំនួន៣៧០០ដុល្លាររួចចេញទៅបាត់តែម្តង ៕
ចែករំលែកព័តមាននេះ