ទីក្រុងវ៉ាស៊ីនតោន៖ មន្ត្រីរដ្ឋាភិបាលលោកត្រាំកំពុងប្រញឹកដៃក្នុងការចរចាគ្នា និងរៀបចំកិច្ចព្រមព្រៀងពាណិជ្ជកម្មជាមួយប្រទេសចំនួន១៥ដែលជាក្រុមប្រទេសសេដ្ឋកិច្ចធំៗ និងបានបោះដៃទៅអាមេរិកមុនគេដើម្បីស្នើសុំចរចាគ្នាដោះស្រាយបញ្ហាពន្ធ។ ខាងលើនេះជាការថ្លែងរបស់រដ្ឋមន្ត្រីក្រសួងរតនាគារជាតិអាមេរិក លោកស្កុតបឺសឹន (Scott Bessent) ប្រាប់អ្នកសារព័ត៌មាននៅចំពោះមុខលោកត្រាំ និងលោកស្រីមេឡូនី នាយករដ្ឋមន្ត្រីអ៊ីតាលីដែលបំពេញទស្សនកិច្ចនៅវ៉ាស៊ីនតោន។
លោកត្រាំ និងលោកស្រីមេឡូនីបានជួបគ្នានៅសេតវិមានដើម្បីពិភាក្សាអំពីបញ្ហាពាណិជ្ជកម្ម។ កិច្ចជំនួបនេះធ្វើឡើងបន្ទាប់ពីលោកត្រាំដំឡើងពន្ធទៅលើសហភាពអឺរ៉ុប ហើយត្រូវអឺរ៉ុបវាយបកវិញ។ លោកស្រីមេឡូនីចជាថ្នាក់ដឹកនាំអឺរ៉ុបទី១ដែលជួបគ្នាដោយផ្ទាល់ជាមួយត្រាំចាប់តាំងពីលោកដំឡើងពន្ធ២០%ទៅលើទំនិញរបស់អឺរ៉ុបជាទូទៅ (ឡានដំឡើងដល់២៥%) កាលពីថ្ងៃទី២ ខែមេសា។ ក្រោយមក លោកប្រកាសព្យួរទុករយៈពេល៩០ថ្ងៃជាបណ្ដោះអាសន្ននូវផែនការដំឡើងពន្ធនោះ។
នៅក្នុងសម័យអន្តរកាលនេះ លោកចង់ឃើញប្រទេសនានាបោះដៃទៅរកវ៉ាស៊ីនតោនដើម្បីចរចាគ្នា។ ប៉ុន្តែប្រទេសខ្លះនៅតែប្រកាន់ជំហរមិនចុះញ៉មនឹងការដាក់សម្ពាធនេះទេ។ នៅពេលកំពុងធ្វើសន្និសីទកាសែតសុខៗ លោកត្រាំក៏ងាកទៅរដ្ឋមន្ត្រីក្រសួងរតនាគារជាតិដើម្បីឱ្យគាត់បកស្រាយបញ្ជាក់អំពីដំណើរការចរចាគ្នាជាមួយប្រទេសទាំងនោះ។ ហេតុនេះ លោករដ្ឋមន្ត្រីក៏បានបញ្ជាក់ថាអាមេរិកកំពុងផ្ដល់អាទិភាពទៅលើការចរចាគ្នាឱ្យមានកិច្ចព្រមព្រៀងជាមួយប្រទេសធំៗចំនួន១៥។
លោកថ្លែងថាយើងបានពិភាក្សាជាមួយប្រទេសជប៉ុនកាលពីម្សិលមិញ។ លោកជឿជាក់ថាអឺរ៉ុប និងអាមេរិកប្រហែលជាបានទាក់ទងគ្នារួចហើយ។ អាមេរិក និងកូរ៉េខាងត្បូងត្រៀមពិភាក្សាគ្នានៅសប្ដាហ៍ក្រោយ។ លោកជឿជាក់ថាឥណ្ឌាក៏កំពុងចាប់ផ្ដើមពិភាក្សាគ្នាជាបណ្ដើរៗផងដែរ។ ដំណើរការចរចាទាំងនេះបាន និងកំពុងប្រព្រឹត្តទៅយ៉ាងលឿនជាទីបំផុត។
ប្រទេសទាំង១៥ដែលរដ្ឋមន្ត្រីអាមេរិកលើកឡើងនេះទំនងជាចង់សំដៅទៅលើប្រទេសដែលមានជីឌីភី (GDP) ធំជាងគេទាំង១៥។ ក្នុងនោះមានអាមេរិក, ចិន, ជប៉ុន, អាល្លឺម៉ង់, ឥណ្ឌា, អង់គ្លេស, បារាំង, អ៊ីតាលី, ប្រេស៊ីល, កាណាដា, រុស្ស៊ី, កូរ៉េខាងត្បូង, អូស្ត្រាលី, អេស្ប៉ាញ និងម៉ិកស៊ីកូ។ ប្រទេសទាំងនេះមានតួនាទីសំខាន់ណាស់នៅក្នុងវិស័យសេដ្ឋកិច្ចពិភពលោក។
ក្នុងនាមជាមហាអំណាចសេដ្ឋកិច្ចទី២, ចិនមិនទាន់បង្ហាញសញ្ញាដកថយនៅឡើយទេ។ កាលពីសប្ដាហ៍មុន ត្រាំបានដំឡើងពន្ធចិនរហូតដល់១៤៥%បន្ទាប់ពីចិនដំឡើងពន្ធទំនិញអាមេរិក១២៥%។ ប៉ុន្តែចិនប្រកាសថាខ្លួនដំឡើងពន្ធ១២៥%នេះជាទឹកផ្ដាច់ព្រ័ត្រហើយ ហើយខ្លួនឈប់លេងចូលជាមួយល្បែងដំឡើងពន្ធរបស់ត្រាំតទៅទៀតហើយ។ ចិនបាននិយាយវាត់កន្ទុយ និងដាក់ផ្លែឱ្យត្រាំថានេះជា «ឆាកកំប្លែងដ៏ល្អសើចបំផុតនៅក្នុងប្រវត្តិសាស្ត្រពាណិជ្ជកម្មពិភពលោកសម័យទំនើប»។
ត្រាំថ្លែងថាគាត់មិនជាប្រញាប់ប្រញាល់ពេកទេក្នុងការប្រកាសកិច្ចព្រមព្រៀងពាណិជ្ជកម្មជាមួយប្រទេសដទៃ។ លោកថាឥឡូវនេះយើងកំពុងតែខ្វារកនឹងការប្រមូលលុយដែលហូរចូលដូចទឹកពុំធ្លាប់មានពីមុនមក។ នាយករដ្ឋមន្ត្រីអ៊ីតាលី លោកស្រីមេឡូនី ថ្លែងប្រាប់អ្នកសារព័ត៌មាននៅសេតវិមានថាលោកស្រីដឹងច្បាស់ថាអ៊ីតាលី និងអាមេរិកនឹងសម្រេចបានកិច្ចព្រមព្រៀងពាណិជ្ជកម្មជាមួយគ្នានៅក្នុងពេលឆាប់ៗនេះ។ លោកស្រីមកសេតវិមានលើកនេះបំណងធំគឺដើម្បីធ្វើរឿងនេះឯង។
ក្រសួងសេដ្ឋកិច្ច និងហិរញ្ញវត្ថុរបស់កូរ៉េខាងត្បូងថ្លែងថាក្រសួងរតនាគារជាតិអាមេរិកបានស្នើសុំជួបគ្នាជាមួយលោករដ្ឋមន្ត្រីបឺសឹនដើម្បីពិភាក្សាគ្នានៅអំឡុងពេលទស្សនកិច្ចរបស់ឧបនាយករដ្ឋមន្ត្រីកូរ៉េខាងត្បូងនាសប្ដាហ៍ក្រោយ។ អ្នកនាំពាក្យចិន លោកលីនចៀន (Lin Jian) ថ្លែងប្រាប់អ្នកសារព័ត៌មានថានៅក្នុងសង្គ្រាមពាណិជ្ជកម្មគ្មានភាគីណាមួយទទួលជ័យជម្នះនៅទីបញ្ចប់ឡើយ។ ហេតុនេះ លោកថ្លែងថាប្រទេសចិនគ្មានចង់ធ្វើសង្គ្រាមនេះទេ។ ប៉ុន្តែចិនក៏មិនខ្លាចនឹងធ្វើសង្គ្រាមនេះដែរ។ ខាងលើនេះជាការដកស្រង់ប្រភពពីទស្សនាវដ្ដីញូស្វីក (Newsweek)៕
ចែករំលែកព័តមាននេះ