ទីក្រុងវ៉ាស៊ីនតោន៖ លើកនេះច្បាស់ជាងមុនទៅទៀត ត្រាំមិននិយាយច្រើនទេ បើគាត់ខំប្រឹងដោះស្រាយបញ្ហាអ៊ុយក្រែនអស់ប៉ុណ្ណឹងហើយ ហើយគ្មានរីកចម្រើនទៅមុខទៀត គាត់នឹងឈប់រវីរវល់ធ្វើជាមេអណ្ដើកសម្រុះសម្រួលគ្នាតទៅទៀតហើយ ហើយបណ្ដោយតាមយថាកម្មទៅចុះ។ ខាងលើនេះជាការអះអាងរបស់រដ្ឋមន្ត្រីការបរទេសអាមេរិក លោករូប៊ីយ៉ូ (Rubio)។…
ទីក្រុងវ៉ាស៊ីនតោន៖ លើកនេះច្បាស់ជាងមុនទៅទៀត ត្រាំមិននិយាយច្រើនទេ បើគាត់ខំប្រឹងដោះស្រាយបញ្ហាអ៊ុយក្រែនអស់ប៉ុណ្ណឹងហើយ ហើយគ្មានរីកចម្រើនទៅមុខទៀត គាត់នឹងឈប់រវីរវល់ធ្វើជាមេអណ្ដើកសម្រុះសម្រួលគ្នាតទៅទៀតហើយ ហើយបណ្ដោយតាមយថាកម្មទៅចុះ។ ខាងលើនេះជាការអះអាងរបស់រដ្ឋមន្ត្រីការបរទេសអាមេរិក លោករូប៊ីយ៉ូ (Rubio)។
ប្រុមខការទូតរូបនេះថ្លែងបន្តទៀតថាយ៉ាងហោចណាស់ពីនេះទៅមុខប៉ុន្មានថ្ងៃទៀត លោកចង់ឃើញដំណើរការចរចារីកចម្រើនទៅមុខទោះបីតិចក្ដីច្រើនក្ដីដើម្បីឱ្យអាមេរិកបានល្ហែល្ហើយចិត្តខ្លះ និងមានចិត្តចង់ដោះស្រាយបញ្ហានេះជាបន្តទៀត។ លោករូប៊ីយ៉ូថ្លែងដូច្នេះក្រោយកិច្ចជំនួបជាមួយថ្នាក់ដឹកនាំអឺរ៉ុប និងអ៊ុយក្រែននៅទីក្រុងប៉ារីស ប្រទេសបារាំង។ លោកថាអាមេរិកមិនអាចខិតខំទាំងឥតប្រយោជន៍រាប់អាទិត្យ រាប់ខែដោយគ្មានលទ្ធផលនោះទេ។
ហេតុនេះ យើងត្រូវតែប្ដេជ្ញាចិត្តយ៉ាងឆាប់រហ័សបំផុត។ បើប៉ុន្មានថ្ងៃទៀត យើងសម្លឹងឃើញថាមិនអាចសម្រេចបានកិច្ចព្រមព្រៀងនៅក្នុងរង្វង់ពីរបីសប្ដាហ៍ទេ អាមេរិកនឹងដកខ្លួនថយហើយ។ លោករូប៊ីយ៉ូថ្លែងថាលោកត្រាំកំពុងគិតគូរអំពីការដើរចេញនេះមិនមែនគិតលំៗទេ ប៉ុន្តែគិតដោយការតាំងចិត្តខ្ពស់មែនទែន។ គាត់ (ត្រាំ) បានលះបង់ពេលវេលា និងកម្លាំងកាយចិត្តច្រើនណាស់ទៅលើរឿងនេះ (ការដោះស្រាយបញ្ហាអ៊ុយក្រែន)។
លោករូប៊ីយ៉ូទទួលស្គាល់ថាអ៊ុយក្រែនជាបញ្ហាសំខាន់ពិតមែនហើយ។ ប៉ុន្តែពិភពលោកមានរឿងសំខាន់មិនចាញ់អ៊ុយក្រែនទេដែលត្រូវការដោះស្រាយដូចគ្នា។ លោកចង់មានន័យថាបើអាល័យតែនៅត្រាំត្រែងនឹងរឿងអ៊ុយក្រែនវិលវល់នៅក្នុងវាលវដ្ឋសង្សារមហាធំធេង ដោះស្រាយមិនចេញដដែល តើបន្តនៅធ្វើអ្វីទៀត?
ក្រោយការប្រើវោហារសាស្ត្រនយោបាយមុតៗដល់ថ្នាក់នេះ ប្រទេសដទៃទៀតហាក់ដូចជាស្ងាត់មាត់ច្រៀប មិនទាន់ចេញវាចានៅឡើយទេ មិនថាអង់គ្លេស បារាំង អាល្លឺម៉ង់ អ៊ុយក្រែន ឬរុស្ស៊ីនោះទេ។ ទន្ទឹមនឹងនោះ ដំណើរការចរចាទ្វេភាគីរវាងអាមេរិក និងអ៊ុយក្រែន (ពាក់ព័ន្ធនឹងការបែងចែកផលប្រយោជន៍គ្នា) ហាក់ដូចជារីកចម្រើនទៅមុខគួរឱ្យកត់សម្គាល់។
ត្រាំថ្លែងកាលពីយប់មិញថាអាមេរិក និងអ៊ុយក្រែនអាចនឹងចុះកិច្ចព្រមព្រៀងរ៉ែកម្រនៅសប្ដាហ៍ក្រោយ។ តាមពិត ប្រទេសទាំង២គួរណាស់ចុះកិច្ចព្រមព្រៀងជាមួយគ្នាតាំងពីដើមខែមីនាមកម៉្លេះ។ ប៉ុន្តែដោយសារនៅក្នុងកិច្ចជំនួបនៅសេតវិមាននោះមានជម្លោះពាក្យសម្ដីគ្នារវាងលោកហ្សេឡិនស្គីជាមួយលោកត្រាំ និងលោកជេឌីវេន (អនុប្រធានាធិបតីអាមេរិក)។ ដូច្នេះក៏អាក់ខានទៅវិញ។ ខាងលើនេះជាការដកស្រង់ប្រភពពីទីភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ