ទីក្រុងវ៉ាស៊ីនតោន៖ កាលពីយប់មិញ អាមេរិកវាយប្រហារយ៉ាងខ្លាំងក្លាទៅលើមូលដ្ឋានរបស់ក្រុមហ៊ូទីនៅប្រទេសយ៉េម៉ែនភាគខាងលិចបណ្ដាលឱ្យស្លាប់មនុស្សយ៉ាងតិច៣៨នាក់។ នេះបើតាមការផ្សាយរបស់សារព័ត៌មានដែលគ្រប់គ្រងដោយក្រុមហ៊ូទីផ្ទាល់តែម្ដង។ បើដូច្នេះមែន វាជាការវាយប្រហារដ៏ផ្ដាច់ផ្ដិលជីវិតចាប់តាំងពីអាមេរិកបើកយុទ្ធនាការវាយប្រហារទៅលើហ៊ូទី។
ការវាយប្រហារនេះធ្វើឡើងស្របពេលដែលមានសញ្ញាថាអ៊ីស្រាអែល និងអាមេរិកត្រៀមវាយអ៊ីរ៉ង់នៅពេលឆាប់ៗនេះបើសិនគ្មានកិច្ចព្រមព្រៀងនុយក្លេអ៊ែរជាមួយគ្នា។ ទូរទស្សន៍អាល់ម៉ាស៊ីរ៉ា (Al Mashira TV) ផ្សាយថាក្រៅពីអ្នកស្លាប់ទាំងនោះ មនុស្ស១០២នាក់ទៀតរងរបួស។ អាមេរិកថ្លែងថាការវាយប្រហារលើកនេះមានគោលដៅកាត់ផ្ដាច់ការផ្គត់ផ្គង់ប្រេងទៅឱ្យពួកយុទ្ធជនរបស់ក្រុមហ៊ូទី។
ក្រសួងការពារជាតិអាមេរិក (មន្ទីរបញ្ចកោណ) មិនទាន់ធ្វើអត្ថាធិប្បាយអ្វីទេបន្ទាប់ពីទូរទស្សន៍របស់ក្រុមហ៊ូទីផ្សព្វផ្សាយអំពីការស្លាប់នោះ។ ប៉ុន្តែអគ្គសេនាធិការដ្ឋានកងទ័ពអាមេរិកថ្លែងថាគោលដៅនៃការវាយប្រហារនោះដើម្បីធ្វើឱ្យក្រុមហ៊ូទីចុះខ្សោយសង្វាក់ផ្គត់ផ្គង់ប្រភពថាមពលរបស់ពួកគេ។ អាមេរិកថាហ៊ូទីនៅតែបន្តធ្វើទុក្ខបុកម្នេញទៅលើជនរួមជាតិរបស់ខ្លួន។
អាមេរិកថ្លែងថាយុទ្ធនាការវាយប្រហាររបស់ខ្លួនដែលចាប់ផ្ដើមតាំងពីខែមីនានោះនឹងបន្តធ្វើដូចភ្លៀងរលឹមរហូតដល់ហ៊ូទីលែងរំខាននាវាដឹកទំនិញនៅសមុទ្រក្រហមតទៅទៀត។ ចាប់តាំងពីខែវិច្ឆិកា ឆ្នាំ២០២៣រហូតដល់បច្ចុប្បន្ន ហ៊ូទីវាយប្រហារដោយដ្រូន និងមីស៊ីលទៅលើនាវាដឹកទំនិញជាច្រើនដងដើម្បីរួបរួមសាមគ្គីគ្នាជាមួយជនជាតិប៉ាឡេស្ទីននៅតំបន់ហ្កាហ្សា។
ពួកគេផ្អាកវាយប្រហារនាវាដឹកទំនិញរយៈពេល២ខែកាលពីពេលកន្លងមកនៅពេលមានបទឈប់បាញ់រវាងអ៊ីស្រាអែល និងហាម៉ាស់។ ទោះបីពួកគេសច្ចាថានឹងវាយប្រហារជាថ្មីនៅសមុទ្រក្រហមបន្ទាប់ពីអ៊ីស្រាអែលបន្តវាយប្រហារតំបន់ហ្កាហ្សា ប៉ុន្តែរហូតមកដល់ពេលនេះ ហ៊ូទីបានត្រឹមតែនិយាយតែមាត់ទទេសិន ប៉ុន្តែមិនទាន់ចាត់វិធានការជាក់ស្ដែងនៅឡើយទេ។
សូមរំលឹកថាកាលពីខែមីនា អាមេរិកធ្លាប់វាយប្រហារដ៏ខ្លាំងក្លាម្ដងហើយទៅលើក្រុមហ៊ូទីបណ្ដាលឱ្យស្លាប់មនុស្សជាង៥០នាក់។ ករណីវាយប្រហារកាលពីយប់មិញថ្វីដ្បិតមិនធំដល់ខែមីនា ប៉ុន្តែអាចនិយាយថាជាការផ្ដាច់ផ្ដិលជីវិតមនុស្សដ៏ច្រើនលំដាប់ទី២។ អ្នកខ្លះចាត់ទុកថានេះជាយុទ្ធនាការវាយប្រហារដ៏ធំបំផុតរបស់អាមេរិកនៅមជ្ឈិមបូព៌ាចាប់តាំងពីលោកត្រាំស្បថចូលកាន់តំណែងនៅអាណត្តិទី២។ ខាងលើនេះជាការដកស្រង់ប្រភពពីទីភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ