ខេត្តបាត់ដំបង ៖ ក្មេងប្រុសចំនួន០៣នាក់ បានរងរបួសគ្រប់ៗគ្នាស្ទើរពេញខ្លួន ដោយសាររពឹសដៃ រើសបានកន្ទុយគ្រាប់ «បេ៤០» រួចនាំគ្នាយកពូថៅដំលេងបណ្ដាលឲ្យផ្ទុះឡើង កាលពីវេលាម៉ោង៣និង២០នាទីរសៀលថ្ងៃទី ១៧…
ខេត្តបាត់ដំបង ៖ ក្មេងប្រុសចំនួន០៣នាក់ បានរងរបួសគ្រប់ៗគ្នាស្ទើរពេញខ្លួន ដោយសាររពឹសដៃ រើសបានកន្ទុយគ្រាប់ «បេ៤០» រួចនាំគ្នាយកពូថៅដំលេងបណ្ដាលឲ្យផ្ទុះឡើង កាលពីវេលាម៉ោង៣និង២០នាទីរសៀលថ្ងៃទី ១៧ មេសា នៅចំណុចភូមិប៉ៃឡាំ ឃុំចែងមានជ័យ ស្រុកបាណន់ តែជនរងគ្រោះទាំង០៣នាក់ ហាក់មិនធ្ងន់ធ្ងរទេ។
របាយការណ៏មន្ត្រីមូលដ្ឋាន បានឲ្យដឹងថា ជនរងគ្រោះទាំង០៣នាក់មាន ១-ឈ្មោះ ថា សម្បត្តិ ភេទប្រុស អាយុ១៧ឆ្នាំ ២-ឈ្មោះ វន រស្មី ភេទប្រុស អាយុ១៤ឆ្នាំ និង៣-ឈ្មោះ វន វាសនា ភេទប្រុស អាយុ១២ឆ្នាំ។ ពួកគេទាំង០៣នាក់ រងរបួសលើផ្ទៃមុខ និង លើរាងកាយ ប្រហាក់ ប្រហែលគ្នា តែមិនធ្ងន់ធ្ងរទេ។
នាយប៉ុស្ដិ៍នគរបាល ឃុំចែងមានជ័យ លោក ថាប់ ជិនហាក់ បានប្រាប់កោះសន្តិភាពថា គ្រាប់ដែលពួកក្មេងៗដំលេងបណ្ដាលឲ្យផ្ទុះរងរបួសគ្រប់គ្នានោះ ជាកន្ទុយគ្រាប់«បេ៤០» មិនមែនគ្រាប់បេទាំងមូលទេ ហើយគេក៏មិនដឹងក្រុមក្មេងៗទាំងនោះ រើសបានពីណាមកដែរ។
លោកនាយប៉ុស្ដ៏បានបន្តថា នៅពេលពួកគេរើសបាន ស្រាប់តែពួកគេយកពូថៅទៅដំលេង ស្រាប់តែផ្ទុះតែម្ដង ដែលទំនងផ្ទុះគីបបំបែក ដែលបន្សល់ទុកជាប់នឹងកន្ទុយគ្រាប់នោះ។ លោកបានបញ្ជាក់ថា គ្រាប់នោះមានអំបែងតូចៗ រួមជាមួយកំទេចថ្មខ្លះផង ជះទៅលើលើក្រុមក្មេងៗរពឹសដៃទាំងនោះ ធ្វើឲ្យពួកគេរងរបួសពាសពេញលើផ្ទៃមុន និង ដងខ្លួនស្ទើរសុះសាច់ តែមិនធ្ងន់ធ្ងរទេ។
ក្រោយកើតហេតុ ក្រុមគ្រួសារ បានដឹកក្រុមក្មេងរងគ្រោះទៅកាន់មណ្ឌលសុខភាពភ្លាមៗដែរ ដើម្បីគ្រូពេទ្យពិនិត្យ និង សង្គ្រោះ៕
ចែករំលែកព័តមាននេះ