ខេត្តប៉ៃលិន ៖ រហូតមកដល់ថ្ងៃទី៣០ ខែធ្នូ ឆ្នាំ២០២៤នេះ គេសង្កេតឃើញប្រជាពលរដ្ឋមួយចំនួន ដែលអត់មានដីចំការនឹងគេ ព្រមទាំងអ្នកដែលគ្មានមុខរបរសម្រាប់ចិញ្ចឹមជីវភាព បាននាំគ្នាទៅបោះតង់កៅស៊ូស្នាក់នៅលើដីវាលមួយកន្លែង ដើម្បីស៊ីឈ្នួលកាប់ចិញ្ច្រាំមើមដំឡូងមីឱ្យថៅកែម្នាក់ ដែលស្ថិតនៅក្បែរផ្លូវជាតិលេខ៥៧ ក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។

តាមការរៀបរាប់ពីប្រជាពលរដ្ឋឈ្មោះ ស្រី មិណី ភេទស្រី អាយុ២១ឆ្នាំ ឈ្មោះ ពៅ ចាន់ ភេទប្រុស អាយុ២៤ឆ្នាំ និងឈ្មោះ វ៉ើន រ៉ាត់ ភេទស្រី អាយុ៦៥ឆ្នាំ រស់នៅក្នុងក្រុងប៉ៃលិន បានរៀបរាប់ឱ្យដឹងដូចៗ គ្នាថា ពួកគាត់មួយចំនួន ធ្វើដំណើរមកពីតាមបណ្តាខេត្តនានាដូចជា ខេត្តកំពង់ឆ្នាំង កំពង់ស្ពឺ តាកែវ ព្រៃវែង ស្វាយរៀង និងខ្លះទៀតមកពីខេត្តបាត់ដំបង ដោយបានមកស៊ីឈ្នួលកាប់ចិញ្ច្រាំមើមដំឡូងមីនេះ អស់រយៈពេលជាង១ខែមកហើយ ខណៈពេលដែលនៅក្នុងក្រុងប៉ៃលិន ត្រូវបានប្រជាពលរដ្ឋនាំគ្នាប្រមូលផលដំឡូងមី។

ប្រភពដដែលបានបន្តទៀតថា ការកាប់ចិញ្ច្រាំមើមដំឡូ ងមីនេះ ក្នុង១កញ្ឆេ ទទួលបានប្រាក់កម្រៃ១០០០រៀល ដោយក្នុង១ថ្ងៃ អ្នកខ្លះ អាចកាប់ចិញ្រ្ចាំបានចាប់ពី៣០ទៅ៤០កញ្ឆេ ខណៈដែលពួកគាត់ម្នាក់ៗ ខិតខំប្រឹងប្រែងកាប់ចិញ្ច្រាំទាំងយប់ទាំងថ្ងៃ ដោយគ្មានពេលឈប់សម្រាកនោះឡើយ។

ប្រភពដដែលបញ្ជាក់ទៀតថា ពួកគាត់ដែលមានផ្ទះនៅឆ្ងាយ បាននាំគ្នាសុំដីគេសង់ជារោងតង់កៅស៊ូ បណ្តោះអាសន្ន ដើម្បីស្នាក់នៅក្បែរៗកន្លែងកាប់ចិញ្ច្រាំមើមដំឡូងមី ងាយស្រួលងើបពីព្រឹកព្រលឹមកាប់ចិញ្ច្រាំឱ្យបានទាន់ពេលវេលា ព្រោះបើយឺតពេលធ្វើការងារបានតិច លុះថ្ងៃក្តៅខ្លាំងលំបាកក្នុងការធ្វើការងារផងដែរ។ ចំណែកអ្នកខ្លះទៀតដែលអត់មានកូនតូចៗជាប់នឹងខ្លួន ក៏ខិតខំប្រឹងប្រែងដាក់ភ្លើងបំភ្លឺ នាំគ្នាកាប់ចិញ្ច្រាំនាពេលយប់បន្ថែមទៀត រហូតដល់ម៉ោង១១​ទៅ​១២យប់ ទើបនាំគ្នាឈប់សម្រាកចូលដេករហូតដល់ម៉ោង៤ទាបភ្លឺនាំគ្នាងើបកាប់ចិញ្ច្រាំបន្តទៀត។

ពួកគាត់បញ្ជាក់ទៀតថា ការរកការងារធ្វើនៅក្នុងស្រុក ពិតជាងាយស្រួលជាងធ្វើការចំណាកស្រុក ដោយសារតែពួកគាត់អត់មានថវិកាគ្រប់គ្រាន់ក្នុងការធ្វើលិខិតឆ្លងដែនទៅរកការងារនៅប្រទេសថៃ ណាមួយមិនចង់រស់នៅឃ្លាតឆ្ងាយពីប្តីប្រពន្ធកូនចៅ ទើបនាំគ្នាធ្វើការងារនៅក្នុងប្រទេសរបស់ខ្លួន។ ទោះបីជាបានប្រាក់កម្រៃតិចតួច ក៏អាចផ្គត់ផ្គង់ជីវភាពប្រចាំថ្ងៃ ដើម្បីបន្តរស់នៅជួបជុំក្រុមគ្រួសារដោយសុខសាន្តផងដែរ។ តែការធ្វើជាកម្មករដំឡូងមីនេះ ក្រោយពេលកាប់ចិញ្ច្រាំរួច ពួកគាត់ត្រូវតែរៀបចំដាក់ហាលមើមដំឡូងមីនៅលើស្បៃមុងឱ្យស្ងួត រយៈពេល៣ទៅ៤ថ្ងៃ ទើបថៅកែមកកើបប្រមូលដាក់រថយន្តដឹយកទៅលក់ដូរនៅតាមស្តង់នានា ដើម្បីនាំចេញទៅលក់ដូរ នៅប្រទេសថៃ ហើយក៏បើកប្រាក់កម្រៃជូនពួកគាត់ជាបន្តបន្ទាប់។

បើតាមការរៀបរាប់ពីឈ្មួញកណ្តាលម្នាក់ បានឱ្យដឹងថា ការប្រមូលផលមើមដំឡូងមីរបស់ប្រជាកសិករនាឆ្នាំ២០២៤នេះ មានការយឺតយ៉ាវជាងឆ្នាំមុនៗ ដោយសារតែតម្លៃទីផ្សារមានការធ្លាក់ចុះជាងឆ្នាំមុនបន្តិច។ ដូច្នេះ ពួកគាត់បន្តរង់ចាំតាំងពីដើមខែធ្នូ រហូតដល់ពាក់កណ្តាលខែ ដើម្បីមើលតម្លៃទីផ្សារអាចនឹងឡើងខ្ពស់បន្តទៀតឬយ៉ាងណា។

ម្យ៉ាងវិញទៀត ដោយសារតែកសិករមិនទាន់ហ៊ានប្រមូល ព្រោះតម្លៃទីផ្សារឥឡូវដំឡូងមីស្រស់ ឈ្មួញទិញត្រឹមតែ១គីឡូក្រាម តម្លៃជាង១០០រៀលប៉ុណ្ណោះ ខណៈដែលឆ្នាំមុនៗ តម្លៃទីផ្សារខ្ពស់ជាងនេះ ដោយ១គីឡូក្រាម ឈ្មួញទិញ រហូតដល់ជាង២០០រៀលឯណោះ។ ដូច្នេះហើយ ទើបកសិករភាគច្រើនមិនទាន់ហ៊ានប្រមូលផលនោះទេ ព្រោះក្រែងលោក្រោយពេលប្រមូលផលរួច សងជំពាក់បំណុលគេមិនរួច។ តែដោយសាររង់ចាំយូរៗទៅតម្លៃមិនមានឡើងអ្វីនោះទេ ណាមួយក៏កៀកដល់ខែដែលត្រូវដាំសារឡើងវិញ និងដោយសារតែដល់ថ្ងៃត្រូវបង់ការប្រាក់ឱ្យនាយទុន និងមីក្រូហិរញ្ញវត្ថុផង ទើបបង្ខំចិត្តប្រមូលទាំងតម្លៃទីផ្សារធ្លាក់ទាបបែបនេះ៕