ខេត្តព្រះសីហនុ ៖ នៅអនុវិទ្យាល័យសម្តេចឪក្រុងព្រះសីហនុ នាព្រឹកថ្ងៃទី២៤ មិថុនា មានរៀបចំពិធីចុះហត្ថលេខាលើអនុស្សរណៈនៃការយោគយល់គ្នា រវាងអនុវិទ្យាល័យសម្តេចឪ និងអង្គការផេកកម្ពុជា សម្រាប់គម្រោងសាងសង់បណ្ណាល័យក្នុងអនុវិទ្យាល័យសម្តេចឪ ដោយមានការឧបត្ថម្ភថវិកាពីក្រុមហ៊ុនប្រេង ឈេហ្វរ៉ុនអូវើស៊ីភេត្រូលៀម(ខេមបូឌា)លីមី ធីត ។ ពិធីនេះប្រារព្ធធ្វើដោយមានការអញ្ជើញចូលរួមពីលោកសំ សំអាត តំណាងលោក ស្បោង សារ៉ាត អភិបាលខេត្ត លោកកែវ ឡាយ ប្រធានមន្ទីរអប់រំ យុវជន និងកីឡាខេត្ត លោកស្ទីវ គ្លិក ប្រធានក្រុមហ៊ុនប្រេង ឈេហ្វរ៉ុនអូវើស៊ីភេត្រូលៀម(ខេមបូឌា)លីមីធីត លោកអេរិកបែ៊កធល ប្រធានប្រចាំប្រទេសរបស់អង្គការផេកកម្ពុជា ព្រមទាំងលោកគ្រូអ្នកគ្រូ និងសិស្សានុសិស្សយ៉ាងច្រើនកុះករ ។
លោកកែវ ឡាយ បានថ្លែងអំណរគុណអង្គការផេកកម្ពុជា និងក្រុមហ៊ុនប្រេងឈេហ្វរ៉ុនអូវើស៊ីភេត្រូលៀម(ខេមបូឌា)លីមីធីត ដែលបានសហការយ៉ាងស្អិតរមួតជាមួយមន្ទីរអប់រំយុវជន និងកីឡាខេត្ត និងចាត់ទុកថា នេះជាការចូលរួមយ៉ាងធំធេងក្នុងកិច្ចអភិវឌ្ឍន៍វិស័យអប់រំក្នុងព្រះរាជាណាចក្រកម្ពុជា ។ សមិទ្ធផលដ៏ មានតម្លៃនេះជាឧត្តមប្រយោជន៍ដ៏ថ្លៃថ្លាបំផុតសម្រាប់កូនចៅជំនាន់ក្រោយក្នុងមូលដ្ឋាននេះ ។
ថ្លែងក្នុងឱកាសនោះ លោកអេរិក ប៊ែកធលប្រធានប្រចាំប្រទេសរបស់អង្គការផេកកម្ពុជា បានថ្លែងថា គម្រោងនេះជាតំណាងឱ្យចលនាដ៏មោះមុតមួយ នៅក្នុងភាពទទួលខុសត្រូវ រួមចំណែកជួយដល់សង្គម ហើយនេះមិនមែនជាលើកទី១ទេ ដែលអង្គការផេក និងក្រុមហ៊ុនប្រេងឈេហ្វរ៉ុន បានរួបរួមកម្លាំងគ្នាកសាងនៅក្នុងប្រទេសកម្ពុជា ។ លោកសង្ឃឹមថា បណ្ណាល័យនេះនឹងក្លាយជាប្រភពធនធានមួយប្រកបដោយមោទនភាព ព្រមទាំងមានសារសំខាន់ និងសារប្រយោជន៍សម្រាប់ការអប់រំទាំងនៅសាលានិងនៅសហគមន៍ ៕
ចែករំលែកព័តមាននេះ