រាជធានីភ្នំពេញ ៖ បច្ចុប្បន្ននេះ មានស្ថានីយទូរទស្សន៍ចំនួន៦ បានរៀបចំឱ្យមានការប្រកួតប្រដាល់គុនខ្មែរជារៀងរាល់ចុងសប្តាហ៍ចាប់ពីថ្ងៃព្រហស្បតិ៍ ដល់ថ្ងៃអាទិត្យ ដោយក្នុងនោះ សង្វៀនទូរទស្សន៍បាយ័ន និងថោន មាន៥កម្មវិធីដូចគ្នា…
រាជធានីភ្នំពេញ ៖ បច្ចុប្បន្ននេះ មានស្ថានីយទូរទស្សន៍ចំនួន៦ បានរៀបចំឱ្យមានការប្រកួតប្រដាល់គុនខ្មែរជារៀងរាល់ចុងសប្តាហ៍ចាប់ពីថ្ងៃព្រហស្បតិ៍ ដល់ថ្ងៃអាទិត្យ ដោយក្នុងនោះ សង្វៀនទូរទស្សន៍បាយ័ន និងថោន មាន៥កម្មវិធីដូចគ្នា រីឯសង្វៀនទទក មាន២កម្មវិធី ចំណែកសង្វៀនCNC ប៉ុស្តិ៍លេខ៥ និងសង្វៀនPNN មាន១កម្មវិធីដូចគ្នា ។ នៅក្នុងកម្មវិធីទាំង១៥នេះ មានកីឡាករ កីឡាការិនីចន្លោះពី១៥០ ទៅ១៨០នាក់ ក្នុងនោះមានបរទេសប្រមាណ២៥ទៅ៣៥នាក់ ត្រូវបានផ្គូផ្គងឱ្យឡើងប្រកួតជាលក្ខណៈជាតិ និងអន្តរជាតិជារៀងរាល់សប្តាហ៍នៅតាមសង្វៀនធំៗទាំង៦នេះ ហើយបន្ថែមនេះ ក៏នៅមានកម្មវិធីប្រកួតប្រដាល់បែបថ្នាល ដែលត្រូវបានរៀបចំឡើងនៅតាមក្លិបមួយចំនួន ជារៀងរាល់ចុងសប្តាហ៍ផងដែរ ។
យ៉ាងណាក៏ដោយ នៅក្នុងចំនួនអ្នកប្រដាល់ដ៏ច្រើន ដែលត្រូវបានដាក់ឱ្យប្រកួតនៅតាមសង្វៀនជារៀងរាល់សប្តាហ៍នេះ គឺជាង៩៥ភាគរយជាការប្រកួតរបស់កីឡាករ ចំណែកការប្រកួតរបស់កីឡាការិនីមានមិនដល់៥ភាគរយផងទេ ។ ការខ្សត់ទីផ្សារប្រកួតសម្រាប់កីឡាការិនីនេះ បានកើតមានឡើងជាច្រើនឆ្នាំមកហើយ ដែលធ្វើឱ្យពួកគេមួយចំនួនធំបានបង្ខំចិត្តបោះបង់ចោលអាជីពឈឺសាច់នេះទាំងឈឺចាប់ ព្រោះមិនអាចរកបានប្រាក់កម្រៃគ្រប់គ្រាន់យកទៅផ្គត់ផ្គង់គ្រួសារតាមរយៈការប្រកួតនេះ ។
ជាក់ស្ដែងកីឡាការិនីគុនខ្មែរ ធឿន ស្រីនី បានត្រឡប់ទៅធ្វើការរោងចក្រតម្បាញវិញ ក្រោយពីរូបនាងបានឈប់អស់រយៈពេល១ខែ។ មូលហេតុ ដែលធ្វើឲ្យកីឡាការិនីរូបនេះ ត្រឡប់ទៅអាជីពដើមវិញ ដោយសារតែនាងមិនសូវទទួលបានការប្រកួត ខណៈគ្រួសារកំពុងស្ថិតក្នុងជីវភាពខ្វះខាត ។ លោក រស់ សុជា គ្រូបង្វឹករបស់កីឡាការិនីរូបនេះ បានប្រាប់ថា ស្រីនី អស់សង្ឃឹម មិនមានកម្លាំងចិត្តក្នុងការហ្វឹកហាត់ ហើយព្រមទាំងធ្លាក់ខ្សោយសមត្ថភាពផងដែរ។
ធឿន ស្រីនី បានឈប់ធ្វើការរោងចក្រម្ដងរួចមកហើយ នៅខែតុលា ដើម្បីបុកហ្វឹកហាត់គុនខ្មែរ និងសម្រួចសមត្ថភាពខ្លួនឲ្យក្លាយជាកីឡាការិនីឆ្នើម តាមក្ដីស្រមៃ។ ប៉ុន្ដែកីឡាការិនីរូបនេះ ឈប់បានត្រឹមតែមួយខែ ជីវភាពគ្រួសារ ខ្វះខាតខ្លាំង ព្រោះទទួលបានការប្រកួតតែ១ដងក្នុង១ខែប៉ុណ្ណោះ។ ចំណូលនេះ មិនអាចជួយដល់តម្រូវការគ្រួសារបាន។
លោក រស់ សុជា បារម្ភថា សមត្ថភាពរបស់កីឡាការិនីរូបនេះនឹងធ្លាក់ចុះ ព្រោះតែបច្ចុប្បន្ន ស្រីនី កំពុងបាក់ទឹកចិត្ត និងមិនមានស្មារតីប្រឹងប្រែងហ្វឹកហាត់ ដោយសារតែមិនសូវមានសង្វៀនចាប់គូឲ្យប្រកួតបាន២-៣លើកក្នុង១ខែ។ ប្រកួត១លើកបាន៥០មុឺនរៀលប៉ុណ្ណោះអ៊ីចឹងពិបាកក្នុងការជួយគ្រួសារណាស់ ។
ធឿន ស្រីនី ត្រូវបានអ្នកគាំទ្រទទួលស្គាល់ថា ជាថ្នាលកីឡាការិនីគុនខ្មែរ ដែលមានបច្ចេកទេស និងសមត្ថភាពល្អ។ កីឡាការិនីរូបនេះ ពូកែខាងក្បាច់ទាត់គល់រំជួយមេឃ ដែលជាហេតុអ្នកគាំទ្រ ដាក់រហស្សនាមឲ្យថា«អ្នកលេងជើងក្រោម»។ កីឡាការិនីវ័យ១៩ ឆ្នាំនេះ ធ្លាប់ឡើងប្រកួតគុនខ្មែ ១៩លើក ក្នុងនោះឈ្នះ១៥ និងចាញ់៤។ ក្រៅពីគុនខ្មែរ ស្រីនី ក៏ធ្លាប់ប្រកួតប្រដាល់សកលជើងឯកថ្នាក់ជាតិ បានមេដាយសំរឹទ្ធ១ និងប្រកួតប្រដាល់ឃីកបុកស៊ីង ជើងឯកថ្នាក់ជាតិ បានមេដាយសំរឹទ្ធ១ ផងដែរ។
រំលឹកទៅដល់បញ្ហានេះ កីឡាការិនីជម្រើសជាតិប្រដាល់គុនខ្មែរ វី ស្រីឆាយ ដែលធ្លាប់ឈ្នះមេដាយសំរឹទ្ធសម្រាប់ការប្រកួតស៊ីហ្គេម លើកទី៣១ ឆ្នាំ២០២២ នៅប្រទេសវៀតណាម និងស៊ីហ្គេម លើកទី៣២ ឆ្នាំ២០២៣ នៅកម្ពុជានោះ បានទទួលស្គាល់ថា ការរកទីផ្សារប្រកួតសម្រាប់កីឡាការិនីពិតជាមានការពិបាក ដែលធ្វើឱ្យកីឡាការិនីមួយចំនួនធំបង្ខំចិត្តបញ្ចប់អាជីពនេះ ។
ស្រីឆាយ បាននិយាយថា ការខំហាត់តែមិនសូវបានឡើងប្រកួត ធ្វើឱ្យយើងមានការពិបាកទាំងទៅលើការពង្រឹងសមត្ថភាព បច្ចេកទេស និងទៅលើការរកប្រាក់ចំណូលផ្គត់ផ្គង់គ្រួសារ។ បើយើងមិនមានការងារអ្វីអាចរកចំណូលបន្ថែមលើការប្រដាល់នេះទៀត គឺមានការពិបាកខ្លាំងហើយខ្លួននាងផ្ទាល់ក៏ធ្លាប់ជួបបញ្ហានេះផងដែរ ប៉ុន្តែឥឡូវខ្លួនបានជាប់ក្នុងក្របខណ្ឌទាហាន កាលឆ្នាំ២០២៣ ដែលមានប្រាក់របបជាប្រចាំខែ អ៊ីចឹងបើទោះបីជាយូរៗបានប្រកួតម្តង ក៏មិនជាជួបបញ្ហាខ្លាំងដូចមុនដែរ។
វី ស្រីឆាយ បានទម្លាយឱ្យដឹងទៀតថា ការខ្សត់ទីផ្សារប្រកួតសម្រាប់កីឡាការិនី បានចាប់ផ្តើមតាំងពីឆ្នាំ២០១៨មក ហើយនៅពេលផ្ទុះជំងឺកូវីដ១៩ គឺលែងមានតែម្តង គឺទើបតែឆ្នាំ២០២៤នេះទេ ដែលទីផ្សារប្រកួតរបស់កីឡាការិនីចាប់ផ្តើមកម្រើកវិញ ។ កង្វះធនធានកីឡាការិនីនៅពេលនេះ វានៅតែជាបញ្ហាប្រឈមសម្រាប់គុនខ្មែរ ហើយចំពោះបញ្ហានេះ នាងស្នើឱ្យថ្នាក់ដឹកនាំសហព័ន្ធកីឡាប្រដាល់គុខខ្មែរ ក៏ដូចជាម្ចាស់សង្វៀនទូរទស្សន៍ទាំងអស់ សូមចាប់គូឱ្យមានការប្រកួតសម្រាប់នារីឱ្យបានច្រើនផង ។ ម្ចាស់មេដាយសំរឹទ្ធស៊ីហ្គេមរូបនេះ ក៏ស្នើទៅនារីដែលស្រឡាញ់កីឡានេះចូលហ្វឹកហាត់ ផងដែរព្រោះបើមានទីផ្សារប្រកួតច្រើនហើយចំនួនកីឡាការិនីមានចំនួនតិច ក៏នៅតែមានបញ្ហាប្រឈមដដែល ។
ជុំវិញបញ្ហាកង្វះធនធានកីឡាការិនីនេះដែរឯកឧត្តម ខូវ ឆាយ ប្រធានសហព័ន្ធកីឡាប្រដាល់
គុនខ្មែរ បានអះអាងថា សហព័ន្ធបានចេញគោលការណ៍ទៅគ្រប់ស្ថានីយនិងដៃគូអភិវឌ្ឍថា រាល់កម្មវិធីប្រកួតត្រូវតែមានគូនារី១គូ ឬក៏គូយុវជនថ្នាល ហើយការជំរុញនេះ ដើម្បីឱ្យទីផ្សារប្រកួតរបស់នារីមានការកើនឡើង ។
ទន្ទឹមគ្នានេះដែរ ឯកឧត្តមក៏បានជំរុញឱ្យគ្រប់ភាគីពាក់ព័ន្ធ ត្រូវផ្សព្វផ្សាយ និងលើកទឹកចិត្តធ្វើម៉េចឱ្យយុវនារី ទាំងអាយុក្រោម១៣ឆ្នាំ និងក្រោម១៦ឆ្នាំ ចូលហ្វឹកហាត់ប្រដាល់ឱ្យបានច្រើន ព្រោះសហព័ន្ធនឹងរៀបចំឱ្យមានការប្រកួតសម្រាប់យុវជនថ្នាល និងផ្នែកនារី ពីចន្លោះអាយុ១៣ទៅ១៦ឆ្នាំ នាពេលឆាប់ៗនេះ ដើម្បីជំរុញឱ្យមានកីឡាការិនីចូលរួមកាន់តែច្រើន ។
គួររំលឹកថា ប្រដាល់គុនខ្មែរដែលផ្តើមចេញពីការប្រកួតស្ម័គ្រចិត្តនៅតាមវត្តអារាម និងកម្មវិធីបុណ្យទានតាមភូមិជាលក្ខណៈកម្សាន្តនោះ បានចាប់ផ្តើមបង្កើតកម្មវិធីប្រកួត និងមានការផ្សាយផ្ទាល់តាមកញ្ចក់ទូរទស្សន៍ នៅពេលសង្វៀនទូរទស្សន៍ប៉ុស្តិ៍លេខ៥ បានបើកដំណើរការនៅឆ្នាំ១៩៩៥ ហើយក្រោយមកក៏មានសង្វៀនទូរទស្សន៍មួយចំនួនទៀតបើកជាបន្តបន្ទាប់ ។
ការប្រកួតប្រដាល់នៅតាមសង្វៀនទូរទស្សន៍អស់រយៈពេលជិត៣០ឆ្នាំមកនេះ មានក្លិបប្រដាល់ជិត១០០ បានបើកដំណើរការជាបន្តបន្ទាប់ ក្រោមការអនុញ្ញាតពីសហព័ន្ធកីឡាប្រដាល់គុនខ្មែរ តែក៏មានក្លិបមួយចំនួនបានបិទទ្វារ ហើយក្លិបថ្មីៗមួយចំនួនទៀត ក៏បានបើកដំណើរការធ្វើឱ្យចរន្តនៃការបណ្តុះធនធានកីឡាករ កីឡាការិនី សម្រាប់បម្រើដល់ទីផ្សារប្រកួតជារៀងរាល់ចុងសប្តាហ៍នៅតែមានមិនដាច់ បើទោះបីជាកម្មវិធីប្រកួតរបស់សង្វៀនទូរទស្សន៍ មានការកើនឡើងខ្លាំងក្ដី៕
ចែករំលែកព័តមាននេះ