អាជ្ញាធរខេត្តឱ្យម្ចាស់សណ្ឋាគារ ផ្ទះសំណាក់ ត្រូវរាយការណ៍ពីជនបរទេស
- បន្ទាយមានជ័យ
ខេត្តបន្ទាយមានជ័យ ៖ កាលពីថ្ងៃទី២០ ខែធ្នូ ឆ្នាំ២០២៤កន្លងទៅ នៅសាលប្រជុំ «ក» សាលាខេត្ត ឯកឧត្តម អ៊ុំ…
ខេត្តបន្ទាយមានជ័យ ៖ កាលពីថ្ងៃទី២០ ខែធ្នូ ឆ្នាំ២០២៤កន្លងទៅ នៅសាលប្រជុំ «ក» សាលាខេត្ត ឯកឧត្តម អ៊ុំ រាត្រី អភិបាលខេត្ត និងនាយឧត្តមសេនីយ៍ ឃុន សំបូរ អគ្គនាយករងនៃអគ្គនាយក ដ្ឋានអន្តោប្រវេសន៍ បានអញ្ជើញជាអធិបតីភាព ក្នុងពិធីផ្សព្វផ្សាយផែនការលេខ០០៣ផក ចុះថ្ងៃទី១៧ ខែកក្កដា ឆ្នាំ២០២៤ របស់ក្រសួងមហាផ្ទៃ ស្តីពីការចុះត្រួតពិនិត្យវត្តមានស្នាក់នៅរបស់ជនបរទេស ក្នុងព្រះរាជាណាចក្រកម្ពុជា ជូនដល់សមត្ថកិច្ចពាក់ព័ន្ធរដ្ឋបាលក្រុង-ស្រុក ម្ចាស់សណ្ឋា គារ ផ្ទះសំណាក់ ។
នាយឧត្តមសេនីយ៍ ឃុន សំបូរ បានថ្លែងថា ដើម្បីចូលរួមលើកកម្ពស់ប្រសិទ្ធភាពការអនុវត្តច្បាប់ស្តីពីអន្តោប្រវេសន៍ និងច្បាប់ស្តីពីការងារ ក្រសួងមហាផ្ទៃបានរៀបចំវិធានការ កម្លាំង និងមធ្យោ បាយ ជាក្រុមការងារប្រតិបត្តិការថ្នាក់អន្តរអគ្គៈ ដើម្បីគាំទ្រដល់ស្នងការដ្ឋាននគរបាលរាជធានី/ខេត្ត ក្នុងការអនុវត្តសេចក្តីណែនាំលេខ ០២៨សណន ចុះថ្ងៃទី១៩ ខែកក្កដា ឆ្នាំ២០១៩ របស់ក្រសួងមហាផ្ទៃ ស្តីពីការគ្រប់គ្រងវត្តមានជនបរទេសក្នុងព្រះរាជាណាចក្រកម្ពុជា និងការធ្វើបច្ចុប្បន្នភាពជនបរទេសអន្តោប្រវេសន៍ឱ្យមានប្រសិទ្ធភាព ។ ពង្រឹងវិស័យសន្តិសុខសុវត្ថិ
ភាព និងសណ្តាប់ធ្នាប់សាធារណៈតាមបណ្តារាជធានី/ខេត្ត ដើម្បីធានាសុខដុមនីយកម្មរបស់ប្រជាពលរដ្ឋ ព្រមទាំងភ្ញៀវទេសចរ និងអ្នកវិនិយោគជាតិ-អន្តរជាតិឱ្យមកទស្សនា និងប្រកបរបររកស៊ីនៅព្រះរាជាណាចក្រកម្ពុជា មានជំនឿទុកចិត្តកាន់តែខ្លាំងឡើង ។
នាឱកាសនោះ ឯកឧត្តម អ៊ុំ រាត្រី អភិបាលខេត្ត បានអំពាវនាវដល់ម្ចាស់សណ្ឋាគារ ផ្ទះសំណាក់ ចូលរួមសហការជាមួយសមត្ថកិច្ច ដើម្បីធ្វើការស្រាវជ្រាវ ស្រង់ទិន្នន័យជនបរទេសដែលកំពុងស្នាក់នៅកម្ពុជា ក៏ដូចជាខេត្តបន្ទាយមានជ័យ ទាំងរស់នៅស្របច្បាប់និងមិនស្របច្បាប់ ។ ជាមួយគ្នានេះ អាជ្ញាធរក្រុង-ស្រុក ឃុំ-សង្កាត់ បើសិនជាមានករណីជនបរទេសមកស្នាក់នៅក្នុងមូលដ្ឋានរបស់ខ្លួន ត្រូវចុះស្រង់ទិន្នន័យ សួរព័ត៌មាន ក៏ដូចជាឯកសារពាក់ព័ន្ធ ទាក់ទិននឹងការស្នាក់ក្នុងប្រទេសកម្ពុជា ។
យោងតាមរបាយការណ៍ដែលផ្តល់ដោយស្នងការដ្ឋាននគរបាលខេត្ត គិតត្រឹមថ្ងៃទី១៨ ខែធ្នូ ឆ្នាំ២០២៤ បានបង្ហាញថា ក្នុងខេត្តបន្ទាយមានជ័យមាន ៖ ១-ជនបរទេសអន្តោប្រវេសន្ត សរុបចំនួន២៨៨គ្រួសារ មនុស្សរាយ៤៣៦នាក់(ស្រី១៧៣នាក់) មាន៥សញ្ជាតិ ។ ២-ជនបរទេសមិនមែនអន្តោប្រវេសន្ត សរុបចំនួន ១ ៦១៥២នាក់(ស្រី ៤០៨៦នាក់) មាន៥៨សញ្ជាតិ ប្រកបរបរភាគច្រើនគឺនៅតាមរោងចក្រ សណ្ឋាគារ កាស៊ីណូ និងអាជីវកម្មផ្សេងៗ។
ជនបរទេសស្នាក់នៅច្រើនជាងគេតាមប្រព័ន្ធ FPCS មាន៧សញ្ជាតិ ក្នុងនោះមាន ឥណ្ឌូណេស៊ី មានចំនួន ៤ ២០១នាក់(ស្រី១ ០៦៩នាក់) ចិនចំនួន ៤ ១៩០នាក់(ស្រី៧០៤នាក់) វៀតណាមចំនួន ២ ២៥៩នាក់(ស្រី៩៨៧នាក់) ឥណ្ឌាចំនួន ៩៣៦នាក់(ស្រី៥២នាក់) ថៃចំនួន៧៧០នាក់(ស្រី៣៦៣នាក់) សាធារណរដ្ឋកូរ៉េ ចំនួន៦៩៣នាក់(ស្រី៩៥នាក់) និងប៉ាគីស្ថានចំនួន៤២១នាក់(ស្រី២៧នាក់) ។
ទន្ទឹមនឹងនេះ លទ្ធផលនៃកិច្ចសហប្រតិបត្តិការស្រាវជ្រាវសង្គ្រោះជនបរទេសប្រចាំឆ្នាំ២០២៤ ដែលបានសុំអន្តរាគមន៍សរុបមានចំនួន១១៧ករណី ក្នុងនោះតាមរយៈប្រភពហ្វេសប៊ុកក្រសួង មហាផ្ទៃចំនួន៤៥ករណី ហតឡាញជនបរទេស ៥៨ករណី ហតឡាញ១១៧ ចំនួន១២ករណី និងពីស្ថានទូតចំនួន២ករណី ។
ការធ្វើកិច្ចអន្តរាគមន៍សង្គ្រោះជាក់ស្តែងបានចំនួន៣១ករណី មានមនុស្ស៦២នាក់(ស្រី១១នាក់) រកមិនឃើញកំពុងស្រាវជ្រាវបន្តចំនួន៤១ករណី មនុស្សចំនួន១២៤នាក់(ស្រី២៨នាក់) និងត្រឡប់ទៅវិញដោយខ្លួនឯងចំនួន ៤៥ករណី មនុស្ស ៨០នាក់(ស្រី១៩នាក់) ៕
ចែករំលែកព័តមាននេះ