រាជធានីភ្នំពេញ ៖ រថយន្តម៉ាកឡិចស៊ិស RX-330 មួយគ្រឿង បានឈប់ចតស្ងៀមលើចិញ្ចើមផ្លូវបញ្ច្រាសទិសដៅចរាចរណ៍ ស្រាប់តែមានបុរសម្នាក់បើកបរម៉ូតូសណ្ដោងរ៉ឺម៉ក ១គ្រឿង ទៅដល់បុកពេញទំហឹង បណ្ដាលឲ្យគាបជាប់គ្នា…
រាជធានីភ្នំពេញ ៖ រថយន្តម៉ាកឡិចស៊ិស RX-330 មួយគ្រឿង បានឈប់ចតស្ងៀមលើចិញ្ចើមផ្លូវបញ្ច្រាសទិសដៅចរាចរណ៍ ស្រាប់តែមានបុរសម្នាក់បើកបរម៉ូតូសណ្ដោងរ៉ឺម៉ក ១គ្រឿង ទៅដល់បុកពេញទំហឹង បណ្ដាលឲ្យគាបជាប់គ្នា ហើយបុរសដែលជាអ្នកបើករ៉ឺម៉កនោះ បានធ្លាក់បោកផ្ទប់ថ្នល់បែកក្បាលរងរបួសធ្ងន់ធ្ងរ ដេកសន្លប់ស្ដូកស្ដឹងក្បែររថយន្តខាងលើ ។
ឧប្បត្តិហេតុនោះបានកើតឡើងកាលពីវេលាម៉ោង៤និង៤០នាទីល្ងាចថ្ងៃទី២៤ ខែធ្នូ ឆ្នាំ២០២៤ នៅតាមផ្លូវបេតុងក្នុងបុរីសែនសុខ ស្ថិតនៅក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
បុរសរងគ្រោះអ្នកបើកបរម៉ូតូសណ្ដោងរ៉ឺម៉កខាងលើនោះ មិនត្រូវបានស្គាល់អត្តសញ្ញាណនោះទេ រងរបួសបែកក្បាលពីក្រោយ ។ ដោយឡែករថយន្តម៉ាកឡិចស៊ិស RX-330 ពណ៍ស ពាក់ស្លាកលេខភ្នំពេញ 2AU-0255 ឈប់ចតស្ងៀមនៅលើចិញ្ចើមផ្លូវបញ្ច្រាស់ទិសដៅចរាចរណ៍ ។
ប្រជាពលរដ្ឋបានប្រាប់ឲ្យដឹងថា នៅមុនពេលកើតហេតុ បុរសរងគ្រោះបានបើកបរម៉ូតូសណ្ដោងរ៉ឺម៉កម៉ូតូ ១គ្រឿងខាងលើ ធ្វើដំណើរក្នុងទិសដៅពីត្បូងទៅជើងលឿនគួរសមដែរ លុះពេលទៅដល់ត្រង់ចំណុចកើតហេតុ ពុំដឹងថា គេចអ្វីនោះទេ ក៏ជ្រុលទៅបុកចំទ្វារមុខខាងស្ដាំរថយន្តនោះពេញទំហឹង បណ្ដាលឲ្យគាបជាប់គ្នា ហើយបុរសអ្នកបើកម៉ូតូសណ្ដោងរ៉ឺម៉កធ្លាក់បោកផ្ទប់ថ្នល់រងរបួសបែកក្បាលពីខាងក្រោយហូរឈាមសន្លប់ស្ដូកចំណែករថយន្ត និងរ៉ឺម៉កម៉ូតូ បានរងការខូចខាតយ៉ាងដំណំ ។
ក្រោយពេលកើតហេតុ នគរបាលប៉ុស្តិ៍ត្រពាំងក្រសាំង បានចុះទៅកាន់ទីនោះ ហើយបានបញ្ជូនបុរសអ្នកបើកម៉ូតូសណ្ដោងរ៉ឺម៉កខាងលើទៅសង្គ្រោះបន្ទាន់ភ្លាមៗ ។ បន្ទាប់មកបាននាំយករថយន្ត និងម៉ូតូសណ្ដោងរ៉ឺម៉កម៉ូតូ ទៅរក្សាទុករង់ចាំការដោះស្រាយគ្នានៅពេលក្រោយ ៕
ចែករំលែកព័តមាននេះ