ខេត្តកំពង់ឆ្នាំង ៖ ព្រះសង្ឃមួយអង្គបានសុគតភ្លាមនៅកន្លែងកើតហេតុ និងមនុស្សពីរនាក់ទៀតបានរងរបួសធ្ងន់ស្រាលក្នុងហេតុការណ៍គ្រោះថ្នាក់ចរាចរណ៍​រវាង​រថយន្តមួយគ្រឿងបុកម៉ូតូ​កង់បីពីក្រោយ ។

ហេតុការណ៍ខាងលើនេះ​ បានបង្កការភ្ញាក់ផ្អើល​កើតឡើង​កាលពី​វេលាម៉ោង6និង45នាទីព្រឹកថ្ងៃ23 ខែធ្នូឆ្នាំ 2024 នៅចន្លោះគីឡូម៉ែត្រលេខ​67 និងលេខ​68 ស្ថិតនៅក្នុងភូមិទឹកល្អក់ ឃុំសែប ស្រុកកំពង់ត្រឡាច ខេត្តកំពង់ឆ្នាំង ។

តាម​ប្រភពពីកន្លែងកើតខេត្តបានឱ្យដឹងថា មុនពេលកើតហេតុ មានម៉ូតូ​កង់បី​មួយគ្រឿងបើកបរដោយឈ្មោះ រ៉ន កុសល អាយុ៤៨ឆ្នាំ រស់នៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ បានដឹកអ្នកដំណើរ២អង្គនាក់ ធ្វើដំណើរពីត្បូងទៅជើង តាមបណ្ដោយផ្លូវជាតិលេខ 5 លុះពេលមកដល់ចំណុចកើតហេតុ ស្រាប់តែមានរថយន្តមួយគ្រឿងម៉ាក toyota alphard ពាក់ស្លាកលេខកម្ពុជា KIRI.K 44 បើកបរដោយឈ្មោះ ផាន់ន័យ រតនៈវិទូ អាយុ ២៤ឆ្នាំ មានទីលំនៅក្រុងតាខ្មៅ ខេត្តកណ្ដាល បើកបរក្នុងល្បឿនៗបានបុកម៉ូតូ​កង់បង់​ពីក្រោយ បណ្ដាលឱ្យសុគតព្រះសង្ឃមួយអង្គ ព្រះនាម ទឹម ជាន ព្រះជន្ម 84 ព្រះវស្សា គង់នៅវត្តសំរោងសែន ស្រុកកំពង់លែង និងអ្នករួមដំណើរឈ្មោះ លឿន លេង អាយុ 57 ឆ្នាំរស់នៅភូមិព្រែកជីក ឃុំកោះចិនស្រុកពញាឮខេត្តកណ្ដាល បានដើរឱ្យរងរបួសយួនស្រាជាមួយនឹងអ្នកបើកបរ​ម៉ូតូកង់បី​។

ក្រោយពេលកើតហេតុ សមត្ថកិច្ចបានបញ្ជូនព្រះសពព្រះសង្ឃទៅក្រុមគ្រួសារធ្វើបុណ្យតាមប្រពៃណី អ្នករងរបួសដឹកទៅសង្គ្រោះនៅមន្ទីរពេទ្យ ដោយឡែកអ្នកបើកបររថយន្តត្រូវបានឃាត់ខ្លួនជាមួយរថយន្ត បញ្ជូនទៅនគរបាលខេត្តកំពង់ឆ្នាំងដើម្បីបន្តនីតិវិធី៕