ខេត្តពោធិ៍សាត់ ៖ ថ្ងៃទី២០ ខែវិច្ឆិកា ឆ្នាំ២០២៥ ៖ ស្ថានភាពទឹកជំនន់ទឹកភ្លៀងតាមដងស្ទឹងពោធិ៍សាត់ បានឈានដល់កម្រិតគួរឱ្យព្រួយបារម្ភ និងកំពុងដាក់សម្ពាធយ៉ាងខ្លាំង មកលើភូមិសាស្ត្រក្រុងពោធិ៍សាត់…
ខេត្តពោធិ៍សាត់ ៖ ថ្ងៃទី២០ ខែវិច្ឆិកា ឆ្នាំ២០២៥ ៖ ស្ថានភាពទឹកជំនន់ទឹកភ្លៀងតាមដងស្ទឹងពោធិ៍សាត់ បានឈានដល់កម្រិតគួរឱ្យព្រួយបារម្ភ និងកំពុងដាក់សម្ពាធយ៉ាងខ្លាំង មកលើភូមិសាស្ត្រក្រុងពោធិ៍សាត់ ជាពិសេសនៅចំណុចរសើបចំនួនពីរ គឺតំបន់ព្រៃញី និងក្បាលហុង ។ នេះបើយោងតាម រដ្ឋបាលក្រុងពោធិ៍សាត់ បានប្រកាសនាព្រឹកថ្ងៃទី២០ ខែវិច្ឆិកា ឆ្នាំ២០២៥ ។
រដ្ឋបាលក្រុងពោធិ៍សាត់ បានបញ្ជាក់ថា ៖ យោងតាមប្រភពព័ត៌មានពីមូលដ្ឋានបានឱ្យដឹងថា ការកើនឡើងនៃកម្ពស់ទឹកយ៉ាងគំហុកនេះ គឺបណ្តាលមកពីក្បាលស្ទឹងសំខាន់ៗទាំងបីនៅប៉ែកខាងលើ បានបុកសម្រុកហូរធ្លាក់មកព្រមគ្នា យ៉ាងខ្លាំងក្លា ដែលធ្វើឱ្យលំហូរទឹកនៅផ្នែកខាងក្រោមនៃដងស្ទឹងពោធិ៍សាត់មិនអាចរំដោះបានទាន់ពេលវេលា ។
ប្រឈមមុខនឹងស្ថានភាពដ៏តានតឹងនេះ អាជ្ញាធរខេត្ត និងក្រុងពោធិ៍សាត់ បាននឹងកំពុងចុះអន្តរាគមន៍យ៉ាងសកម្ម ដោយបានដាក់ពង្រាយកម្លាំង ដើម្បីជួយទប់ទឹកនៅតំបន់ដែលប្រឈមការបាក់ច្រាំង ឬទឹកហៀរ និងជាពិសេស គឺការផ្តល់អាទិភាពខ្ពស់បំផុតក្នុងការជម្លៀសប្រជាពលរដ្ឋ ដែលកំពុងរស់នៅក្នុងតំបន់ប្រឈមគ្រោះថ្នាក់ខ្លាំង ទៅកាន់ទីទួលសុវត្ថិភាព ។
អាជ្ញាធរមូលដ្ឋាន សូមអំពាវនាវទទូចដល់បងប្អូនប្រជាពលរដ្ឋទាំងអស់ ដែលមានលំនៅដ្ឋានរស់នៅតាមបណ្តោយដងស្ទឹងពោធិ៍សាត់ សូមមេត្តាបង្កើនការ ប្រុងប្រយ័ត្នឱ្យបានខ្ពស់បំផុត។ សូមបងប្អូនត្រៀមលក្ខណៈរៀបចំទុកដាក់សម្ភារៈមានតម្លៃ និងឯកសារសំខាន់ៗនៅទីខ្ពស់ ហើយត្រូវតាមដានព័ត៌មានជាប្រចាំពីអាជ្ញាធរ ដើម្បីត្រៀមខ្លួនជម្លៀសប្រសិនបើស្ថានភាពតម្រូវ។
គិតមកត្រឹមម៉ោងនេះ ក្រុមការងារសង្គ្រោះ និងកងកម្លាំងចម្រុះ កំពុងបន្តឈរជើង និងតាមដានស្ថានភាពទឹកយ៉ាងយកចិត្តទុកដាក់ ដើម្បីធានាសុវត្ថិភាពជូនប្រជាពលរដ្ឋ ៕
ចែករំលែកព័តមាននេះ