ខេត្តមណ្ឌលគិរី ៖ តំបន់ឦសានប្រទេសកម្ពុជាកំពុងរងនូវឥទ្ធិពលអាកាសធាតុត្រជាក់ជាខ្លាំង នាចុងឆ្នាំ២០២៤នេះ ខណៈនៅខេត្តមណ្ឌលគិរីសង្កេតឃើញសីតុណ្ហភាពបានធ្លាក់ចុះជាង១០អង្សាសេ នាពេលយប់ និងលើស២០អង្សាសេបន្តិចបន្តួចនៅពេលថ្ងៃ ដែលលាយឡំជាមួយខ្យល់បោកបក់ផង។ ទន្ទឹមនិងអាកាសធាតុប្រែប្រួលទៅតាមរដូវកាល អាជីវករដែលលក់ខោអាវជជុះតាមដងផ្លូវក្នុងក្រុងសែនមនោរម្យ…
ខេត្តមណ្ឌលគិរី ៖ តំបន់ឦសានប្រទេសកម្ពុជាកំពុងរងនូវឥទ្ធិពលអាកាសធាតុត្រជាក់ជាខ្លាំង នាចុងឆ្នាំ២០២៤នេះ ខណៈនៅខេត្តមណ្ឌលគិរីសង្កេតឃើញសីតុណ្ហភាពបានធ្លាក់ចុះជាង១០អង្សាសេ នាពេលយប់ និងលើស២០អង្សាសេបន្តិចបន្តួចនៅពេលថ្ងៃ ដែលលាយឡំជាមួយខ្យល់បោកបក់ផង។
ទន្ទឹមនិងអាកាសធាតុប្រែប្រួលទៅតាមរដូវកាល អាជីវករដែលលក់ខោអាវជជុះតាមដងផ្លូវក្នុងក្រុងសែនមនោរម្យ ក៏អាចរកកម្រៃបានគួរសមពីការលក់អាវក្រាស់ៗ ឬអាវរងា ដែលមានតម្លៃទាបសម្រាប់មហាជនពាក់រក្សាកម្តៅក្នុងខ្លួននារដូវរំហើយក្នុងមួយឆ្នាំមានម្តង។
ចំណែកភ្ញៀវទេសចរក៏បានចាប់អារម្មណ៍ច្រើនក្នុងការដើរកម្សាន្តតាមរមណីយដ្ឋាននានាក្នុងខេត្តមណ្ឌលគិរី ជាពិសេសគឺការទទួលយកអារម្មណ៍ប្លែកពីអាកាសធាតុដ៏ត្រជាក់ក្នុងកំរិត១៦អង្សាសេទៅ២២អង្សាសេ ដែលស្ទើរតែគ្មានតំបន់ដទៃក្នុងប្រទេសកម្ពុជាធ្លាក់ដល់កំរិតអង្សានេះឡើយ។
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម ស្តីពីស្ថានភាពអាកាសធាតុសម្រាប់ថ្ងៃទី២១ ខែធ្នូ ឆ្នាំ២០២៤ បានឲ្យដឹងថា ខ្យល់មូសុងឦសានមានឥទ្ធិពលលើសមុទ្រចិនខាងត្បូង និងគ្របដណ្តប់លើអាងទន្លេ មេគង្គព្រះរាជាណាចក្រកម្ពុជា និងឈូងសមុទ្រថៃ ។ស្ថានភាពបែបនេះចាប់ពីថ្ងៃទី២១ ដល់ថ្ងៃទី២៣ ខែធ្នូ នៅតំបន់វាលទំនាបសីតុណ្ហភាពមធ្យមអប្បបរមា២០°C និងសីតុណ្ហភាពមធ្យមអតិបរមា៣២°Cខ្យល់ បក់មកពីទិសឦសាន និងអាគ្នេយ៍មានល្បឿនមធ្យម៥ ម៉ែត្រក្នុង១វិនាទី។
តំបន់ខ្ពង់រាបមានសីតុណ្ហភាពមធ្យមអប្បបរមា១៨°C និងសីតុណ្ហភាពមធ្យមអតិបរមា៣១°C ខ្យល់ បក់មកពីទិសឦសាន និងបូពា៍មានល្បឿនមធ្យម៦ម៉ែត្រ/វិនាទី។ចំណែកតំបន់មាត់សមុទ្រ សីតុណ្ហភាពមធ្យមអប្បបរមា១៩°C និងសីតុណ្ហភាពមធ្យមអតិបរមា៣២°C ខ្យល់ បក់មកពីទិសឦសាន និងអាគ្នេយ៍ មានល្បឿនមធ្យម៦ម៉ែត្រ/វិនាទី។
ដូច្នេះ ដើម្បីឲ្យដំណើរកម្សាន្តរបស់ពុកម៉ែបងប្អូននៅខេត្តមណ្ឌលគិរីប្រកបដោយភាពសប្បាយរីករាយនិងមានសុខភាពល្អ សូមត្រៀមជាមួយសម្លៀកបំពាក់ក្រាស់ៗ ដើម្បីបង្ការពីជំងឺនានាអំឡុងពេលដើរលេងនាឱកាសថ្ងៃឈប់សម្រាក៕
ចែករំលែកព័តមាននេះ