ក្រោយដាក់ទុនវិនិយោគតម្លៃ១,៥ពាន់លានដុល្លារនៅលើផ្ទៃដី២.៦០០ ហិកតា កាលពីឆ្នាំ២០២០ អាកាសយានដ្ឋានអន្តរជាតិថ្មីប្រភេទ 4F ដែលត្រូវប្រសិទ្ធនាមថា អាកាសយានដ្ឋានអន្តរជាតិតេជោ គ្រោងនឹងដំណើរការ នៅក្នុងអំឡុងខែកក្កដា ឆ្នាំ២០២៥…
ក្រោយដាក់ទុនវិនិយោគតម្លៃ១,៥ពាន់លានដុល្លារនៅលើផ្ទៃដី២.៦០០ ហិកតា កាលពីឆ្នាំ២០២០ អាកាសយានដ្ឋានអន្តរជាតិថ្មីប្រភេទ 4F ដែលត្រូវប្រសិទ្ធនាមថា អាកាសយានដ្ឋានអន្តរជាតិតេជោ គ្រោងនឹងដំណើរការ នៅក្នុងអំឡុងខែកក្កដា ឆ្នាំ២០២៥ ខាងមុខនេះ ។ តាមប្រភពព័ត៌មានបានអោយដឹងថា គិតត្រឹមថ្ងៃទី១៨ ខែធ្នូ ឆ្នាំ២០២៤ ដំណើរការសាងសង់អាកាសយានដ្ឋានថ្មីនេះ សម្រេចបាន៩២ភាគរយហើយ ។
ស្របពេលដែលព័ត៌មានអំពីវឌ្ឍនភាពនៃការកសាងអាកាសយានដ្ឋានថ្មីនេះ ត្រូវបានផ្សព្វផ្សាយក៏មាន ព័ត៌មានមួយចំនួនបង្ហើរចេញថា អាកាសយានដ្ឋានអន្តរជាតិភ្នំពេញដែលកំពុងតែដំណើរការនឹងត្រូវបិទ ។ នៅក្នុងពេលជាមួយគ្នានោះក្រុមហ៊ុនសម្បទានព្រលានយន្តហោះបារាំងដែលមានឈ្មោះថា សូស៊ីយេតេ កុងសេស្យូនែរ ដឺ ឡាអេរ៉ូព័រ (SCA) ដែលកំពុងតែទទួលខុសត្រូវគ្រប់គ្រងប្រតិបត្តិការសេវាកម្មដឹកជញ្ជូនផ្លូវអាកាសនៅអាកាសយានដ្ឋានអន្តជាតិភ្នំពេញក៏ទទួលបានសិទ្ធិធ្វើប្រតិបត្តិការសេវាកម្មដដែលនេះ នៅ អាកាសយានដ្ឋានថ្មីនេះផងដែរ ។
នៅក្នុងស្ថានភាពបែបនេះ ជោគវាសនានៃអាកាសយានដ្ឋានអន្តរជាតិភ្នំពេញនៅមិនទាន់ដឹងថា នឹងទៅជាយ៉ាងណានៅឡើយទេ ដោយខ្លះត្រូវបានគេល្បីថានឹងក្លាយជាអាកាសយានដ្ឋានយោធាខ្លះឭថានឹងក្លាយជាអាកាសយានដ្ឋានបម្រុង ហើយខ្លះថា ជាអាកាសយានដ្ឋានឯកជន ហើយក៏មានព័ត៌មានខ្លះថា និង ក្លាយជាកន្លែងអភិវឌ្ឈន៍គម្រោងថ្មីៗ …។ល។
ជោគវាសនានៃអាកាសយានដ្ឋានអន្តរជាតិភ្នំពេញ ទៅជាយ៉ាងណាវា គឺជាសិទ្ធិរបស់រាជរដ្ឋាភិបាលដែលនឹងធ្វើការសម្រេចចិត្ត ដើម្បីធានាផលប្រយោជន៍សាធារណៈ និងជាតិ ។ ប៉ុន្តែមុននឹងសម្រេចជោគវាសនាអាកាសយានដ្ឋាននេះសូមរក្សាទុក និងរង់ចាំឲ្យប្រតិបត្តិការដឹកជញ្ជូននៅអាកាសយានដ្ឋានថ្មីដំណើរការស្រួលបួលសិន ។
ជាធម្មតា ដើម្បីដាក់ឲ្យប្រតិបត្តិការវិស័យដឹកជញ្ជូនផ្លូវអាកាសមួយត្រឹមត្រូវ គឺទាមទារនូវស្តង់ដាបរិស្ថាន សុវត្ថិភាព និងការគ្រប់គ្រងជាច្រើន ហើយស្មុគស្មាញ និងទាមទារពេលវេលាច្រើនគួរសមដែរទោះបីជាអាកាសយានដ្ឋាននេះត្រូវគ្រប់គ្រង និងដឹកនាំប្រតិបត្តិការសេវាកម្មដោយក្រុមហ៊ុនដែលមានបទពិសោធន៍និងដំណើរការស្រាប់មករាប់ឆ្នាំរួចមកហើយក៏ដោយ ។
ក្រៅពីស្តង់ដានៅអាកាសយានដ្ឋានថ្មីផ្ទាល់អ្នកដែលពាក់ព័ន្ធក៏គួរតែគិតគូអំពីប្រតិបត្តិការសេវាកម្មឡូជីស្ទិចនានាក្រៅអាកាសយានដ្ឋាន ពោល គឺតាំងពីកន្លែងចំណត និងហេដ្ឋារចនាសម្ព័ន្ធគាំទ្រ និងដឹកជញ្ជូនផ្សេងៗសម្រាប់សម្រួលភាពងាយស្រួលដល់អ្នកទេសចរ និងអ្នកដំណើរទូទៅ ។
អាកាសយានដ្ឋាននេះមិនមែនមានទីតាំងជិតនឹងទីក្រុងដូចជា អាកាសយានដ្ឋានដែលមានស្រាប់នោះឡើយ ។ វាមានចម្ងាយរហូតដល់ទៅ១៩គីឡូម៉ែត្រ ដូច្នេះតម្លៃនៃការធ្វើដំណើរចេញចូលអាកាសយានដ្ឋាននេះក៏ថ្លៃដែរ ។ ផ្អែកតាមទឡ្ហីករណ៍នេះសង្ឃឹមថា ភាគីពាក់ព័ន្ធនឹងគិតគូរចំណុចនេះហើយជួយសម្រួល ឬក៏ផ្តល់សេវាកម្មដែលមានជម្រើសល្អៗដល់អ្នកដំណើរ និងអ្នកទេសចរ ។
អាកាសយានដ្ឋានថ្មីដែលត្រូវបានរចនាឡើង ដើម្បីបំពេញតាមស្តង់ដារ 4F ដែលជាចំណាត់ថ្នាក់ខ្ពស់បំផុតក្រោមអង្គការអាកាសចរណ៍ស៊ីវិលអន្តរជាតិ វាពិតជានឹងឆ្លើយតបនឹងតម្រូវការ និងនិន្នាការរីកចម្រើននៃវិស័យដឹកជញ្ជូនផ្លូវអាកាសរបស់កម្ពុជា ។ ជាមួយគ្នានោះវាក៏ស្របតាមចក្ខុវិស័យរបស់កម្ពុជាក្នុងការក្លាយជាមជ្ឈមណ្ឌលក្នុងតំបន់សម្រាប់ការធ្វើដំណើរតាមផ្លូវអាកាស និងពាណិជ្ជកម្មគាំទ្រដល់កំណើនសេដ្ឋកិច្ចរបស់ប្រទេស និងការតភ្ជាប់អន្តរជាតិ ។ ប៉ុន្តែចំណុចខ្វះខាតផ្នែកឡូជេស្ទិចបន្តិចបន្តួចក៏អាចនឹងធ្វើឲ្យស្រអាប់ដល់ការខិតខំប្រឹងប្រែងនេះដែរ ។
សរុបទៅអ្វីដែលលើកឡើងខាងលើ គឺគ្រាន់តែជាទស្សនៈ និងជាគំនិតបន្តិចបន្តួច ដើម្បីធ្វើយ៉ាងណាចូលរួមចំណែក ដើម្បីឲ្យគម្រោងកសាងអាកាសយានដ្ឋាននេះឆ្លើយតបនឹងការរំពឹងទុក ហើយវាពិតជា ហេដ្ឋារចនាសម្ព័ន្ធដែលនឹងជំរុញវិស័យទេសចរណ៍ ពាណិជ្ជកម្ម និងដឹកជញ្ជូន ។
យើងក៏សង្ឃឹមថា ការលុបបំបាត់នូវការព្រួយបារម្ភ និងបញ្ហាអសកម្មផ្សេងៗនឹងជួយឲ្យប្រតិបត្តិការដឹកជញ្ជូនផ្លូវអាកាសនៅតាមច្រកអាកាសយានដ្ឋានថ្មីដែលមានទីតាំងស្ថិតនៅក្នុងខេត្តកណ្តាលក្លាយជាច្រកយុទ្ធសាស្ត្រពិតប្រាកដ ដើម្បីពង្រឹងទំនាក់ទំនង និងការតភ្ជាប់របស់កម្ពុជាជាមួយពិភពលោក ៕
ចែករំលែកព័តមាននេះ