ទីក្រុងញូដេលី៖ មនុស្សយ៉ាងតិច១៣នាក់ស្លាប់ និងជាច្រើននាក់ទៀតបាត់ខ្លួននៅក្នុងហេតុការណ៍លិចកាណូតដឹកជញ្ជូនអ្នកដំណើរនៅលើផ្ទៃសមុទ្រនៃទីក្រុងបុំបៃ ប្រទេសឥណ្ឌា។ អាជ្ញាធរអះអាងថាហេតុការណ៍នេះកើតឡើងនៅវេលាម៉ោង៣:៥៥ល្ងាចថ្ងៃពុធនៅពេលកាណូតឈ្មោះនីលខាម៉ាល់ (Neelkamal) បុកគ្នា១ទំហឹងជាមួយនាវារបស់កងទ័ពជើងទឹកឥណ្ឌា។
រហូតមកដល់ពេលនេះ អាជ្ញាធរ និងក្រុមអ្នកជួយសង្គ្រោះបន្តស្វែងរកអ្នកដែលអាចនៅរស់រានមានជីវិតពីហេតុការណ៍នេះ។ ស្លាប់ប៉ុន្មាន រស់ប៉ុន្មាន បាត់ខ្លួនប៉ុន្មាន នឹងដឹងលទ្ធផលនៅថ្ងៃស្អែកតាមរយៈការចេញសេចក្ដីប្រកាសជាលាយលក្ខណ៍អក្សរ។ អាជ្ញាធរប្រកាសថាដើម្បីប៉ះប៉ូវការខូចខាត គ្រួសារជនរងគ្រោះដែលស្លាប់ ឬរបួសនឹងទទួលបានប្រាក់ឧបត្ថម្ភខ្លះ។
អាជ្ញាធរប្រាប់ថានៅពេលបុកគ្នានោះ កាណូតដឹកអ្នកដំណើរក្រឡាប់ចូលទៅក្នុងទឹកសមុទ្រ។ អាជ្ញាមិនបាននិយាយថាកប៉ាល់របស់កងទ័ពជើងទឹករងផលប៉ះពាល់កម្រិតណាទេព្រោះជាកិច្ចការសម្ងាត់របស់ជាតិ។ មកទល់នឹងពេលនេះ គេអាចជួយសង្គ្រោះអ្នកនៅរស់១០១នាក់។ ក្នុងចំណោមអ្នកស្លាប់ទាំង១៣នាក់នោះ ដប់នាក់ជាជនស៊ីវិល, ៣នាក់ជាទាហានជើងទឹក។
កងទ័ពជើងទឹកឥណ្ឌារួមជាមួយឆ្មាំល្បាតដែនសមុទ្រ និងនគរបាលជើងទឹកបានបញ្ជូនទូកល្បាតចំនួន១១គ្រឿង និងឧទ្ធម្ភាគចក្រ៤គ្រឿងដើម្បីពន្លឿនការស្វែងរក និងជួយសង្គ្រោះ។ ប៉ុន្តែបេសកកម្មនេះមិនទាន់បញ្ចប់នៅឡើយទេ។ សមត្ថកិច្ចត្រៀមបង្កើតគណៈកម្មការចំពោះកិច្ចដែលមានសមាសភាពមកពីនគរបាល និងទាហានជើងទឹកដើម្បីស៊ើបអង្កេតរួមគ្នា។
អ្នកនាំពាក្យកងទ័ពជើងទឹកឥណ្ឌាបញ្ជាក់បន្ថែមថាមូលហេតុនៃការបុកគ្នារវាងកាណូតដឹកអ្នកដំណើរ និងកប៉ាល់របស់កងទ័ពជើងទឹកនោះដោយសារបញ្ហាបច្ចេកទេសនៅក្នុងកប៉ាល់របស់ទាហានជើងទឹក ជាហេតុធ្វើឱ្យបាត់បង់ម្ចាស់ការអស់រលីង លែងបញ្ជាដៃចង្កូតបានតទៅទៀត។ នៅពេលនោះ កប៉ាល់នេះស្ថិតនៅក្នុងដំណាក់កាលបើកបរសាកល្បងនៅឡើយទេ៕
ចែករំលែកព័តមាននេះ