រាជធានីភ្នំពេញ ៖ លោក អេ ភូថង អតីតស្ដេចប្រដាល់គុនខ្មែរត្រូវបានក្រុមគ្រួសារបញ្ជូនទៅមន្ទីរពេទ្យភ្លាមៗបន្ទាប់ពីធ្វើដំណើរតាមយន្តហោះពីប្រទេសអូស្ត្រាលីត្រឡប់មកដល់មាតុប្រទេសវិញកាលពីរាត្រីថ្ងៃទី១៦ ធ្នូ ដោយសារបញ្ហាសុខភាព ។ ប្រភពជិតស្និទ្ធអតីតអធិរាជកែងឆេះជង្គង់ហោះខាងលើបានឲ្យដឹងថា…
រាជធានីភ្នំពេញ ៖ លោក អេ ភូថង អតីតស្ដេចប្រដាល់គុនខ្មែរត្រូវបានក្រុមគ្រួសារបញ្ជូនទៅមន្ទីរពេទ្យភ្លាមៗបន្ទាប់ពីធ្វើដំណើរតាមយន្តហោះពីប្រទេសអូស្ត្រាលីត្រឡប់មកដល់មាតុប្រទេសវិញកាលពីរាត្រីថ្ងៃទី១៦ ធ្នូ ដោយសារបញ្ហាសុខភាព ។
ប្រភពជិតស្និទ្ធអតីតអធិរាជកែងឆេះជង្គង់ហោះខាងលើបានឲ្យដឹងថា កាលពីថ្ងៃទី១៦ ធ្នូ កន្លងទៅ លោក អេ ភូថង ត្រូវក្រុមគ្រួសារបញ្ជូនទៅកាន់មន្ទីរពេទ្យភ្លាមក្រោយលោកមានអាការៈមិនស្រួលខ្លួនខ្លាំងពេលធ្វើដំណើរតាមយន្តហោះពីប្រទេសអូស្ត្រាលីមកដល់អាកាសយានដ្ឋានអន្តរជាតិភ្នំពេញវិញ ។ មកដល់ពេលនេះ គេមិនទាន់ដឹងថា លោកអេ ភូថង ស្ថិតក្នុងស្ថានភាពបែបណានោះទេ ខណៈជំងឺចាស់របស់លោកត្រូវគេដឹងថា លោកមានជាតិអាស៊ីតឡើងខ្លាំង ខ្លាញ់រុំបេះដូងខ្លាំង សម្ពាធសរសៃឈាមបេះដូង និងលើសជាតិស្ករបន្តិច ព្រោះលោកធាត់ពេក ព្រមទាំងធ្លាប់ឆ្លងជំងឺកូវីដ១៩ថែមទៀតផង ។
គួរឱ្យដឹងផងដែរថា លោកអេ ភូថង និងអ្នកស្រីសាំង សុម៉ាលី ជាភរិយា បានរួមដំណើរជាមួយ
កីឡាករ កីឡាការិនីគុនខ្មែរ៦រូបចេញទៅប្រកួតនៅប្រទេសអូស្ត្រាលីជាលើកទី២ កាលពីថ្ងៃទី១ ខែធ្នូ ឆ្នាំ២០២៤ ។ ការចេញទៅប្រកួតលើកទី២នេះ អ្នករៀបចំកម្មវិធីបានសម្រិតសម្រាំងសុទ្ធតែកីឡាករ កីឡាការិនីល្អលំដាប់ជួរមុខនៅក្នុងប្រទេសកម្ពុជា ។ ក្នុងនោះអ្នកលេងដៃភ្លើងជើងរន្ទះ រឿង សុភ័ណ្ឌ, ម្ចាស់មេដាយមាសស៊ីហ្គេម២ជំនាន់ បឺត សង្ឃឹម ម្ចាស់មេដាយមាសស៊ីហ្គេមម៉ឺន មេឃា ម្ចាស់មេដាយមាសស៊ីហ្គេម កញ្ញាទូច ចាន់វត្តី អ្នកលេងរន្ទះជើង ធន់ ផានិត និងកីឡាករវ័យក្មេងម្នាក់ទៀត ។
ជាលទ្ធផលក្នុងចំណោមកីឡាករ-កីឡាការិនីកម្ពុជាទាំង៦រូបតាមប្រភពព័ត៌មានថាទទួល
បានជោគជ័យ៤រូបក្រោមការបោះម៉ូប្រាប់ពីលោកគ្រូអេ ភូថង ពេលប្រកួត ។ កីឡាករកីឡាការិនីគុនខ្មែរទាំង៦រូប និងលោកគ្រូអេ ភូថង ព្រមទាំងភរិយា បានធ្វើដំណើរត្រឡប់មកដល់មាតុប្រទេសវិញកាលពីរាត្រីថ្ងៃទី១៦ធ្នូ ឆ្នាំ២០២៤ ។ អំឡុងពេលធ្វើដំណើរត្រឡប់មកវិញ លោកគ្រូអេ ភូថង កើតអាការៈមិនស្រួលខ្លួនខ្លាំងរហូតដើរលែងរួចទើបក្រុមគ្រួសារបញ្ជូនទៅមន្ទីរពេទ្យភ្លាមៗដើម្បីសង្គ្រោះបង្កការភ្ញាក់ផ្អើលយ៉ាងខ្លាំងនៅក្នុងបរិវេណអាកាសយានដ្ឋានអន្តរជាតិភ្នំពេញ។
កោះសន្តិភាពសូមជូនពរលោកគ្រូអេ ភូថង ឆាប់ជាសះស្បើយពីជំងឺដើម្បីបន្តការងារក្នុងនាម
ជាអ្នកថែរក្សា និងលើកស្ទួយកីឡាគុនខ្មែរដែលជាកេរដំណែលរបស់ដូនតាឱ្យស្ថិតនៅគង់វង្ស
យូរអង្វែងសម្រាប់កូនចៅជំនាន់ក្រោយ ៕
ចែករំលែកព័តមាននេះ