រាជធានីភ្នំពេញ ៖ ក្រុមកីឡាការិនី គ្រិកឃីតកម្ពុជា បានធ្វើដំណើរទៅចូលរួមការប្រកួតពានមិត្តភាពអន្តរជាតិ ជាមួយសិង្ហបុរី (Cambodia-Singapore Women’s Friendship Cup…
រាជធានីភ្នំពេញ ៖ ក្រុមកីឡាការិនី គ្រិកឃីតកម្ពុជា បានធ្វើដំណើរទៅចូលរួមការប្រកួតពានមិត្តភាពអន្តរជាតិ ជាមួយសិង្ហបុរី (Cambodia-Singapore Women’s Friendship Cup 2025) ដែលនឹងធ្វើឡើងចាប់ពីថ្ងៃទី១៣ រហូតដល់ថ្ងៃទី១៧ ខែសីហា ហើយទាំងថ្នាក់ដឹកនាំសហព័ន្ធកីឡា គ្រិកឃីតកម្ពុជា គ្រូបង្វឹក និងក្រុមអត្តពលិក បានតាំងចិត្តដណ្តើមយកលទ្ធផលល្អត្រឡប់មកវិញ មុនបង្ហាញខ្លួនជាថ្មី នៅក្នុងការប្រកួតស៊ីហ្គេម លើកទី៣៣ នៅប្រទេសថៃ នាខែធ្នូ ឆ្នាំ២០២៥នេះ ។
លោក នូ សុផល ជាអគ្គលេខាធិការសហព័ន្ធ បានឱ្យដឹងថា នេះជាលើកដំបូងហើយ សម្រាប់ក្រុមកីឡាការិនីគ្រិកឃីតកម្ពុជា បានចេញទៅប្រកួតជាលក្ខណៈអន្តរជាតិ នៅក្រៅប្រទេស ក្រោយការចូលរួមប្រកួតស៊ីហ្គេម ឆ្នាំ២០២៣ នៅកម្ពុជា។ លើកនេះយើងបានបញ្ជូនគ្រូបង្វឹក ២នាក់ ក្រុមកីឡាការិនី ១៥នាក់ ឲ្យទៅចូលរួមប្រកួត ។
លោកអគ្គលេខាធិការរូបនេះ បានទទួលស្គាល់ថា ក្រុមកីឡាការិនីគ្រិកឃីតកម្ពុជា ពិតជាធ្វើមិនសូវបានល្អ សម្រាប់ការបង្ហាញខ្លួនជាលើកដំបូង នៅស៊ីហ្គេម លើកទី៣២ ឆ្នាំ២០២៣ ក្នុងនាមជាម្ចាស់ផ្ទះ ដោយសារកាលនោះ ពួកគេនៅមានបទពិសោធន៍ខ្ចីពេក ប៉ុន្តែតាមរយៈការខិតខំហ្វឹកហាត់ និងប្រកួតប្រជែងនៅក្នុងស្រុក រហូតមកដល់ពេលនេះ លោករំពឹងថា ក្រុមកីឡាការិនីគ្រិកឃីតកម្ពុជា នឹងដណ្តើមបានលទ្ធផលល្អ នៅសិង្ហបុរី ។
លោកបញ្ជាក់ថា ៖ «កីឡាការិនីទាំងអស់នេះ សុទ្ធតែជាអត្តពលិក ដែលបានចូលរួមប្រកួតស៊ីហ្គេម ឆ្នាំ២០២៣ ហើយពួកគាត់ បានហ្វឹកហាត់យ៉ាងយកចិត្តទុកដាក់ មុនចេញទៅប្រកួតនៅសិង្ហបុរីនេះ អ៊ីចឹងយើងសង្ឃឹមថា ពួកគាត់ នឹងទទួលបានបទពិសោធន៍ល្អៗ បែបលក្ខណៈអន្តរជាតិ ជាលើដំបូងនេះ ហើយក៏អាចទទួលបានជ័យជម្នះត្រឡប់មកវិញផងដែរ» ៕
ចែករំលែកព័តមាននេះ