រាជធានីភ្នំពេញ ៖ ប្រធានរដ្ឋសភាតួកគីយេ បានចាត់ទុក សម្តេចតេជោ ហ៊ុន សែន ប្រធានព្រឹទ្ធសភាកម្ពុជា គឺជាឥស្សរជននយោបាយដ៏សំខាន់បំផុត និងស្ថាបនិកនៃកម្ពុជាទំនើបបច្ចុប្បន្ន…
រាជធានីភ្នំពេញ ៖ ប្រធានរដ្ឋសភាតួកគីយេ បានចាត់ទុក សម្តេចតេជោ ហ៊ុន សែន ប្រធានព្រឹទ្ធសភាកម្ពុជា គឺជាឥស្សរជននយោបាយដ៏សំខាន់បំផុត និងស្ថាបនិកនៃកម្ពុជាទំនើបបច្ចុប្បន្ន ។
ការលើកឡើងរបស់ប្រធានរដ្ឋសភាតួកគីយេ នៅពេលសម្ដេចតេជោ ហ៊ុន សែន អញ្ជើញជួបពិភាក្សាជាមួយឯកឧត្តម Numan Kurtulmuş ប្រធានរដ្ឋសភាតួកគីយេ នៅថ្ងៃទី១២ ខែធ្នូ ឆ្នាំ២០២៤ នាវិមានរដ្ឋសភារដ្ឋធានីអង់ការ៉ា ។ នៅក្នុងជំនួបឯកឧត្តម ប្រធានសភាតួកគីយេបានសម្តែងក្តីរីករាយ និងស្វាគមន៍យ៉ាងកក់ក្ដៅចំពោះសម្ដេចតេជោ និងគណៈប្រតិភូ ដែលបានអញ្ជើញមកបំពេញទស្សនកិច្ចនៅតួកគីយេ ។
ឯកឧត្តមប្រធានរដ្ឋសភាតួកគីយេបានចាត់ទុក សម្តេចតេជោ គឺជាឥស្សរជននយោបាយដ៏សំខាន់បំផុត និងស្ថាបនិកនៃកម្ពុជាទំនើបបច្ចុប្បន្ន ហើយបានគូសបញ្ជាក់ថា ទស្សនកិច្ចរបស់សម្តេចតេជោ មានសារៈសំខាន់ពិសេស ខណៈពេលដែលប្រទេសយើងទាំងពីរ ប្រារព្ធខួបលើកទី៦៥ នៃទំនាក់ទំនងកាទូត ។
ឯកឧត្តម បានបន្តថា សកលលោកកំពុងចូលក្នុងយុគសម័យថ្មីដែលគេសម្គាល់ថា មានការផ្លាស់ប្តូរលឿន និងបង្កើតតុល្យភាពថ្មី ។ ក្នុងបរិបទនេះ តួកគីយេផ្តល់សារៈសំខាន់ ពិសេស ដល់ទ្វីបអាស៊ី ដែលក្នុងនោះមានកម្ពុជាផងដែរ ។
ជាមួយគ្នានេះដែរ ឯកឧត្តមប្រធានសភា បានលើកឡើងថា តួកគីយេនឹងបន្តកសាងស្ពានសហប្រតិបត្តិការថ្មីៗទៀតជាមួយកម្ពុជា ។ តួកគីយេបានបើកមជ្ឈមណ្ឌលវប្បធម៌នៅទីក្រុងភ្នំពេញ ហើយដោយសហការជាមួយទីភ្នាក់ងារជំនួយអភិវឌ្ឍន៍តួកគីយេ (TIKA) បានចុះហត្ថលេខាខាងវិស័យអប់រំ សិក្សាធិការ ។
ជាក់ស្តែង និស្សិតកម្ពុជា២៥នាក់ កំពុងសិក្សានៅតួកគីយេ ហើយសង្ឃឹមថា នឹងមានច្រើនទៀតនៅពេលអនាគត ។ ឯកឧត្តម បានបន្ថែមថា កម្ពុជាមានសក្តានុពលធំធេងខាងវិស័យពាណិជ្ជកម្ម ក៏ប៉ុន្តែទំហំនៃការផ្លាស់ប្តូរពាណិជ្ជកម្មរវាងប្រទេសយើងទាំងពីរសម្រេចបាន ប្រមាណ៣៥០លានដុល្លារ នៅឆ្នាំ២០២៤ លើផែនការសម្រេចឱ្យបាន១ពាន់លានដុល្លារ ។
នាឱកាសនោះ សម្តេចតេជោ បានថ្លែងអំណរគុណ ឯកឧត្តម ប្រធានសភាតួកគីយេ ចំពោះការអញ្ជើញ និងស្វាគម៍យ៉ាងកក់ក្តៅ ព្រមទាំងការលើកឡើងយ៉ាងស៊ីជម្រៅអំពីទំនាក់ទំនងរវាងប្រទេសយើងទាំងពីរ ។ សម្តេចបានលើកឡើងថា ទស្សនកិច្ចរបស់សម្តេច នាពេលនេះចំពេលនៃខួប៦៥ឆ្នាំនៃទំនាក់ទំនងការទូតនៃប្រទេសយើងទាំងពីរ និងបន្ទាប់ពី តួកគីយេ និងកម្ពុជា បានដាក់ស្ថានទូតទៅវិញទៅមក ។
សម្តេចតេជោ បានអរគុណ ឯកឧត្តមប្រធានសភា ដែលបានលើកសរសើរគុណសម្បត្តិដឹកនាំរបស់សម្តេចយ៉ាងខ្លាំង ។ ក្នុងឋានៈជាប្រធានព្រឹទ្ធសភាថ្មី សម្តេចនឹងបន្តធ្វើអ្វីៗទាំងអស់ ដើម្បីកម្ពុជាបន្តរក្សាបាននូវសន្តិភាព និងស្ថិរភាពយូរអង្វែង ។
សម្តេចតេជោ បានអរគុណតួកគីយេផងដែរ ដែលបានបញ្ជូន អនុប្រធានគណបក្សយុត្តិធម៌ និងអភិវឌ្ឍន៍តួកគីយេ ទទួលបន្ទុកកិច្ចការបរទេស (AKP) ទៅចូលរួមមហាសន្និបាត ICAPP លើកទី១២ នៅទីក្រុងភ្នំពេញ កាលពីខែវិច្ឆិកាកន្លងទៅនេះ ។
សម្តេចតេជោ បានគូសបញ្ជាក់ថា សម្តេចជាអ្នកផ្តល់សន្ទុះដល់ទំនាក់ទំនងទ្វេភាគីជាមួយតួកគីយេ ។ នៅក្នុងពេលបំពេញទស្សនកិច្ចការងារនៅតួកគីយេ ឆ្នាំ២០១៨ សម្តេចតេជោ និងប្រធានាធិបតី Erdoğan បានដាក់ផែនការសម្រេចឱ្យបាន១ពាន់លានដុល្លារ ក្នុងការផ្លាស់ប្តូរពាណិជ្ជកម្មទៅវិញទៅមក ។ សន្ទុះកំណើនទំហំពាណិជ្ជកម្មទ្វេភាគីរវាងប្រទេសទាំងពីរនៅមិនទាន់ខិតជិតដល់គោលដៅនៅឡើយ ។
អាស្រ័យហេតុនេះ ទស្សនកិច្ចរបស់សម្តេច និងកិច្ចប្រឹងប្រែងរួមរបស់គណបក្សដឹកនាំប្រទេសទាំងពីរនឹងជំរុញផែនការនេះឱ្យបានសម្រេច ដោយផ្តល់អាទិភាពលើកាលានុវត្តន៍ភាពសេដ្ឋកិច្ច ពាណិជ្ជកម្ម និងវិនិយោគ៕
ចែករំលែកព័តមាននេះ