ក្រសួងអប់រំ យុវជន និងកីឡា នៃប្រទេសកម្ពុជា កាលពីថ្ងៃអង្គារ៍បានប្រកាសចេញហើយនូវបំរាមហាមប្រាមភេសជ្ជៈប៉ូវកម្លាំងគ្រប់ប្រភេទនៅតាមសាលារៀន ខណៈមើលឃើញហានិភ័យនៃការកើនឡើងយ៉ាងខ្លាំងនូវជំងឺទឹកនោមផ្អែមក្នុងចំណោមយុវវ័យ ។ នៅក្នុងបម្រាមនោះ ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ…
ក្រសួងអប់រំ យុវជន និងកីឡា នៃប្រទេសកម្ពុជា កាលពីថ្ងៃអង្គារ៍បានប្រកាសចេញហើយនូវបំរាមហាមប្រាមភេសជ្ជៈប៉ូវកម្លាំងគ្រប់ប្រភេទនៅតាមសាលារៀន ខណៈមើលឃើញហានិភ័យនៃការកើនឡើងយ៉ាងខ្លាំងនូវជំងឺទឹកនោមផ្អែមក្នុងចំណោមយុវវ័យ ។
នៅក្នុងបម្រាមនោះ ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន មានប្រសាសន៍ថា វិធានការនេះធ្វើឡើងក្នុងគោលបំណងបង្ការហានិភ័យនៃជំងឺមិនឆ្លងជាពិសេសជំងឺទឹកនោមផ្អែមដែលបណ្តាលមកពីការទទួលទានជាតិស្ករ និងភេសជ្ជៈប៉ូវកម្លាំង ។ លោកបាននិយាយនៅក្នុងសេចក្តីណែនាំមួយថា «ការប្រើប្រាស់ ការចែកចាយ ការលក់ និងការផ្សាយពាណិជ្ជកម្មភេសជ្ជៈប៉ូវកម្លាំងគ្រប់ប្រភេទនៅក្នុង និងជុំវិញបរិវេណសាលាត្រូវបានហាមឃាត់យ៉ាងតឹងរ៉ឹង» ។ លោកក៏បានបន្តទៀតថា ការហាមប្រាមនេះ ត្រូវបានអនុវត្តចំពោះគ្រប់គ្រឹះស្ថានអប់រំរដ្ឋ និងឯកជន ព្រមទាំងគ្រឹះស្ថានអប់រំបច្ចេកទេសនៅទូទាំងប្រទេស ។
លោកឧបនាយករដ្ឋមន្ត្រីក៏បានណែនាំដល់សាលារៀនទាំងអស់ឱ្យរំលឹកសិស្សអំពីផលប៉ះពាល់នៃការទទួលទានភេសជ្ជៈប៉ូវកម្លាំងនៅពេលពួកគេជួបជុំគ្នាគោរពទង់ជាតិ ។ ក្រៅពីនេះ លោកក៏បានណែនាំដល់សាលាទាំងអស់ឱ្យរឹបអូសភេសជ្ជៈប៉ូវកម្លាំងពីអ្នកលក់ក្នុង និងជុំវិញសាលារៀន ហើយបញ្ចប់កិច្ចសន្យាជួលតូប ប្រសិនបើពួកគេប្រឆាំងនឹងការហាមឃាត់នោះ ។ ការហាមប្រាមនេះធ្វើឡើង ប៉ុន្មានម៉ោងបន្ទាប់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានមានប្រសាសន៍ថា កម្ពុជាបានរាយការណ៍ពីការកើនឡើងនៃជំងឺទឹកនោមផ្អែម ដោយបានណែនាំដល់ក្រសួងអប់រំ យុវជន និងកីឡា ឱ្យចាត់វិធានការទប់ស្កាត់ជំងឺនេះក្នុងចំណោមសិស្ស ។
សម្តេចមហាបវរធិបតី បានមានប្រសាសន៍ក្នុងពិធីបើកការដ្ឋានសាងសង់មន្ទីរពេទ្យវិទ្យាសាស្ត្រសុខាភិបាល ក្នុងរាជធានីភ្នំពេញថា សម្តេចធ្លាប់បានឃើញផ្ទាល់ ការដែលក្មេងម្នាក់ទទួលទានភេសជ្ជៈផ្អែមដល់ទៅ ៣កំប៉ុងឯណោះ ក្នុងមួយថ្ងៃៗ ។
សម្តេចមហាបវរធិបតី បានសង្កត់ធ្ងន់ថា នេះ គឺជាហានិភ័យសុខភាពសាធារណៈមួយដែលកម្ពុជាគួរយកចិត្តទុកដាក់ និងបានជំរុញឲ្យក្រសួងសុខាភិបាល និងក្រសួងអប់រំពិនិត្យមើលធ្វើការអប់រំ ការត្រួតពិនិត្យ ក៏ដូចជា ការណែនាំដល់ការលក់ចំណីអាហារ នៅតាមសាលាសម្រាប់ក្មេងតូចៗផង ។ សម្តេចមហាបវរធិបតី សង្កត់បន្ថែមថា ព្រោះតែពពួកភេសជ្ជៈប៉ូវកម្លាំងនេះបានធ្វើឲ្យកំណើននៃអ្នកកើតទឹកនោមផ្អែមនៅលើប្រជាជនកម្ពុជាដែលមានអាយុជាង៣០ទៅជាង៤០ច្រើនណាស់ ។
ពាក់ព័ន្ធនឹងបញ្ហានេះ លោក ឈាង រ៉ា រដ្ឋមន្ត្រីក្រសួងសុខាភិបាល ធ្លាប់បាននិយាយថា ក្នុងចំណោមមនុស្សស្លា.ប់សរុបនៅកម្ពុជាអ្នកស្លា.ប់ដោយសារជំងឺមិនឆ្លងដូចជា ជំងឺបេះដូង ជំងឺសរសៃឈាម ជំងឺទឹកនោមផ្អែម ជំងឺមហារីក និងជំងឺផ្លូវដង្ហើមរុំារ៉ៃ គឺមានច្រើនជាងជំងឺឆ្លង ។ លោកបានលើកឡើងថា នេះជាបញ្ហាប្រឈមផ្នែកសុខភាពសាធារណៈដ៏ធំមួយនៅកម្ពុជា ក៏ដូចជា នៅលើសកលលោក ដែលជំងឺមិនឆ្លងខាងលើនេះ គឺអាចការពារបានរហូតដល់ទៅ៨០% តាមរយៈការមានរបបអាហារឲ្យបានត្រឹមត្រូវ ពោល គឺប្រើប្រាស់អំបិល ស្ករ ខ្លាញ់ តិចៗ ហើយត្រូវផ្កួបផ្សំ និងលំហាត់ប្រាណ, កុំពិសាគ្រឿងស្រវឹង និងថ្នាំជក់ជាដើម ។
កុំលេងសើចនឹងជំងឺមិនឆ្លង ជាពិសេស គឺទឹកនោមផ្អែម ពីព្រោះដើមហេតុនៃជំងឺមិនឆ្លងផ្សេងៗមួយចំណែកក៏បណ្តាលមពីទឹកនោមផ្អែមនេះឯង ។ ការដែលមនុស្សប្រើប្រាស់ជាតិផ្អែមនោះច្រើនពេក វាបង្កឲ្យសល់សារធាតុស្ករនៅក្នុងខ្លួនកើតទៅជាជាតិខ្លាញ់ ស្ទះដល់សរសៃឈាម កើតទៅជាជំងឺបេះដូង ខូចតម្រងនោម ហើយក៏អាចដាច់សរសៃឈាមខួរក្បាល ។ល។ តាមការស្រាវជ្រាវលើឯកសារមួយចំនួនបានបង្ហាញថា ដើម្បីឲ្យសុខភាពយើងរឹងមាំ បរិមាណនៃជាតិស្ករ ឬភេសជ្ជៈផ្អែមដែលមនុស្សម្នាក់អាចទទួលទានប្រចាំថ្ងៃដោយសុវត្ថិភាព អាស្រ័យលើកត្តាបុគ្គលដូចជាអាយុកម្រិតសកម្មភាព និងសុខភាពទូទៅ ។
ដើម្បីឲ្យសុខភាព និងសុខមាលភាពរបស់មនុស្សម្នាក់ៗល្អប្រសើរ អង្គការសុខភាពពិភពលោកផ្តល់គោលការណ៍ណែនាំទូទៅថា ដំបូងមនុស្សពេញវ័យ និងកុមារគួរកាត់បន្ថយការទទួលទានជាតិស្ករឲ្យបានតិចជាង១០ភាគរយនៃការប្រើប្រាស់ថាមពលសរុបរបស់ពួកគេម្នាក់ៗខណៈដែលតម្រូវការនៃសារធាតុស្កសម្រាប់រក្សាលំនឹងថាមពលប្រចាំថ្ងៃរបស់មនុស្ស គឺអនុញ្ញាតិឲ្យយើងបញ្ចូលជាតិស្ករទៅក្នុងខ្លួនក្រោម៥ភាគរយ ឬប្រហែលជា៦ស្លាបព្រាកាហ្វេប៉ុណ្ណោះនៅក្នុងមួយថ្ងៃ ។
ត្រង់ចំណុចនេះ សូមប្រុងប្រយ័ត្ន ការបំពេញជាតិស្ករ៦ស្លាបព្រាកាហ្វេនេះមិនមែនបានន័យថា យើងត្រូវទទួលទានស្ករ៦ស្លាបព្រាកាហ្វេទេ គឺវាបូកបញ្ចូលគ្រប់អាហារទាំងអស់ ពីព្រោះអាហារនានា គឺសុទ្ធតែមានជាតិស្ករនៅក្នុងនោះស្រាប់ ដូចជា បាយ ផ្លែឈើ និង បន្លែផ្សេងៗ គឺវាមានជាតិស្ករនៅក្នុងនោះស្រាប់ហើយ ។ ក្រៅពីនោះនៅមានយើងបន្ថែមជាតិស្ករទៅក្នុងសម្ល និងភេសជ្ជៈផ្សេងៗទៀត ។
វិលមកបម្រាមដែលចេញដោយក្រសួងអប់រំ យុវជន និងកីឡានេះវិញសារធារណៈមតិនឹងស្វាគមន៍ពីព្រោះនៅតាមសាលារៀន គឺពិតកន្លែងដែលសម្បូរផលិតផលគ្រឿងកំប៉ុង និងដបដែលសម្បូរជាតិផ្អែមនោះច្រើនមែន ។ ផលិតផលភេសជ្ជៈប៉ូវកម្លាំងទាំងនេះមានជាច្រើនប្រភេទជាច្រើនក្រុមហ៊ុន ខណៈដែលពពួកភេសជ្ជៈទាំងនេះត្រូវបាននាំចូល និងផលិតដោយក្រុមហ៊ុននៅក្នុងស្រុកស្រាប់ ។
ដើម្បីឲ្យបម្រាមនេះមានប្រសិទ្ធភាព ហើយធានាបាននូវការអនុវត្ត និងប្រតិបត្តិដ៏ត្រឹមត្រូវ យន្តការត្រួតពិនិត្យ និងតាមដានគួរតែដាក់ចេញផងដែរ ។ នៅក្នុងករណីល្មើសគួរតែមានជាការពិនិត្យ ឬដាក់ទណ្ឌកម្ម អ្នកដែលពាក់ព័ន្ធ ។ នៅក្នុងករណីប្រកាសចេញ តែខ្វះការត្រួតពិនិត្យ និងអនុវត្ត គឺវានឹងនៅតែដដែលជាដដែល ។ ដូច្នេះសង្ឃឹមថា ក្រសួង និងសហការជាមួយនឹងស្ថាប័នជំនាញដាក់ចេញនូវសកម្មភាពដ៏មានប្រសិទ្ធភាព ហើយក៏សង្ឃឹមថាគ្រប់គ្នានឹងចូលរួមតាំងពីសាលា លោកគ្រូអ្នកគ្រូ រួមទាំងអាណាព្យាបាលកុមារ និងយុវវ័យគ្រប់រូប ៕
ចែករំលែកព័តមាននេះ