រាជធានីភ្នំពេញ ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅយប់ថ្ងៃទី១១ ខែធ្នូ ឆ្នាំ២០២៤នេះ បានបំភ្លឺថា ក្រោយឃើញការបង្ហោះព័ត៌មានតាមបណ្តាញសង្គម…
រាជធានីភ្នំពេញ ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅយប់ថ្ងៃទី១១ ខែធ្នូ ឆ្នាំ២០២៤នេះ បានបំភ្លឺថា ក្រោយឃើញការបង្ហោះព័ត៌មានតាមបណ្តាញសង្គម កាលពីថ្ងៃទី១០ ខែធ្នូ ឆ្នាំ២០២៤ ថាមានមន្ត្រីជាប់កិច្ចសន្យាម្នាក់ ឈរជើងនៅគោលដៅស្ពានអាកាស៥មករា (តិចណូ) ពួនស្ទាក់រងចាំចាប់មធ្យោបាយប្រជាពលរដ្ឋ ដោយអនុវត្តផ្ទុយគោលការណ៍ដឹកនាំរបស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នោះ មន្ត្រីជាប់កិច្ចសន្យារូបនេះ ត្រូវបានការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ អញ្ជើញមកសួរនាំ ជុំវិញការបង្ហោះរិះគន់នៅក្នុងបណ្តាញសង្គម ។
លោក ប៊ន បៃលិន មន្ត្រីជាប់កិច្ចសន្យាបម្រើការងារនៅផ្នែកបញ្ជាចរាចរណ៍ទី២ ឈរជើងនៅគោលដៅស្ពានអាកាស៥មករា (តិចណូ) នៅរសៀលថ្ងៃទី១១ ខែធ្នូ ឆ្នាំ២០២៤ បានឆ្លើយបំភ្លឺ ថា រូបគាត់មិនបានឈរពួនស្ទាក់នោះទេ គឺគាត់ឈររងចាំបញ្ចៀសចរាចរណ៍ សម្រូលក្បួនរថយន្តថ្នាក់ដឹកនាំ ឆ្លងកាត់ ខណៈដែលមានការហៅតាមវិទ្យុទាក់ទង (ID) ឲ្យត្រៀមចេញសម្រួលចរាចរណ៍ ជូនក្បួនថ្នាក់ដឹកនាំ ធ្វើដំណើរជិតដល់គោលដៅរបស់ខ្លួននោះហើយ ។
គួរជម្រាបផងដែរថា កន្លងមក ដោយសារមានការរិះគន់ពីប្រជាពលរដ្ឋ ដែលធ្វើដំណើរតាមដងផ្លូវមានការមិនពេញចិត្តចំពោះមន្ត្រីជាប់កិច្ចសន្យា ដែលតែងតែអនុវត្តលើសពីតួនាទីរបស់ខ្លួន ដូចជា មានការឃាត់យាន្តយន្តនៅតាមដងផ្លូវ ដើម្បីធ្វើការផាកពិន័យជាដើម ។
ម្យ៉ាងវិញទៀត ដោយសារតែឯកសណ្ឋានហាក់ស្រដៀងទៅនឹងមន្ត្រីនគរបាលចរាចរណ៍ផ្លូវគោកផង ទើប កន្លងមកនេះ សាលារាជធានីភ្នំពេញ និងស្នងការដ្ឋាននគរបាលរាជធានីភ្នំពេញ សម្រេចធ្វើការផ្លាស់ប្តូរ ឯកសណ្ឋានមន្ត្រីជាប់កិច្ចសន្យាទាំងអស់ ដើម្បីកុំឱ្យប្រជាពលរដ្ឋមានការភ័ន្តច្រឡំ ។
បច្ចុប្បន្ន មន្ត្រីនគរបាលជាប់កិច្ចសន្យា ត្រូវបានប្តូរឯកសណ្ឋានអាវពីពណ៌ខៀវផ្ទៃមេឃ មកជាពណ៌លឿងទុំវិញ ដែលមិនច្រឡំ ជាមួយនឹងមន្ត្រីនគរបាល ពេញសិទ្ធិ។ មន្ត្រីជាប់កិច្ចសន្យានេះ ជាជំនួយការសហការការងារជាមួយមន្ត្រីនគរបាលចរាចរណ៍ផ្លូវគោក រាជធានីភ្នំពេញ ។ ហើយមន្ត្រីជាប់កិច្ចសន្យានេះ មានតួនាទីត្រឹមជួយសម្រួលការងារចរាចរណ៍ នៅតាមដងវិថី និងមិនមានសិទ្ធិចាប់ឃាត់យានយន្តល្មើសច្បាប់ចរាចរណ៍នោះឡើយ ៕
ចែករំលែកព័តមាននេះ