ខេត្តស្វាយរៀង ៖ លោក ភឹម ថា អភិបាលរង ក្រុងស្វាយរៀង និងមន្ត្រីទីចាត់ការផែនការវិនិយោគរដ្ឋបាលខេត្តស្វាយរៀង បានដឹកនាំកម្លាំងចុះធ្វើការឃាត់ក្រុមអ្នកជួសជុល កំណាត់ផ្លូវបេតុងមួយខ្សែ…
ខេត្តស្វាយរៀង ៖ លោក ភឹម ថា អភិបាលរង ក្រុងស្វាយរៀង និងមន្ត្រីទីចាត់ការផែនការវិនិយោគរដ្ឋបាលខេត្តស្វាយរៀង បានដឹកនាំកម្លាំងចុះធ្វើការឃាត់ក្រុមអ្នកជួសជុល កំណាត់ផ្លូវបេតុងមួយខ្សែ ប្រវែងជិត២០ម៉ែត្រ ស្ថិតនៅសង្កាត់គយត្របែក ដែលក្រុមហ៊ុនធ្វើអាជីវកម្មដឹកអាចម៌ដីលក់ បានធ្វើចរាចរណ៍ឆ្លងកាត់ បណ្ដាលឲ្យស្រុតផ្លូវខូចខ្ទេចទាំងស្រុង ហើយត្រូវប្រជាពលរដ្ឋរិះគន់យ៉ាងចាស់ដៃ រួចសុំឲ្យលោកអភិបាលក្រុង មានវិធានការទប់ស្កាត់ និងឲ្យក្រុមហ៊ុនជួសជុលផ្លូវបេតុងនេះសងប្រជាពលរដ្ឋវិញ ប៉ុន្តែក្រុមហ៊ុនបានមកជួសជុលខុសស្តង់ដាបច្ចេកទេស ទើបអាជ្ញាធរចុះមកផ្អាកការងារសិន ។
ការចុះមកផ្អាកនេះ ធ្វើឡើងកាលពីព្រឹកថ្ងៃទី១០ ខែធ្នូ ឆ្នាំ២០២៤ នៅភូមិគយត្របែក សង្កាត់គយត្របែក ក្រុងស្វាយរៀង ។
លោក ភឹម ថា អភិបាលរងក្រុងស្វាយរៀង បានឲ្យដឹងថា ដោយទទួលបានព័ត៌មានពីសំណាក់បងប្អូនប្រជាពលរដ្ឋ ក៏ដូចជាមន្ត្រីនៅមូលដ្ឋាន បានជម្រាបមករដ្ឋបាលក្រុង អំពីរថយន្តក្រុមហ៊ុនអាជីវកម្មដឹកអាចម៌ដីលក់ ធ្វើចរាចរណ៍ឆ្លងកាត់ផ្លូវបេតុងមួយខ្សែនេះ បានបង្កជាហេតុបណ្ដាលឲ្យកំណាត់ផ្លូវមួយកន្លែង ក្នុងភូមិសាស្ត្រខាងលើបានទទួលរងការខូចខាតដោយការបាក់ស្រុតផ្លូវបេតុងហើយបានបង្កផលវិបាកចំពោះការធ្វើដំណើររបស់បងប្អូនប្រជាពលរដ្ឋនៅមូលដ្ឋានក៏ដូចជាអ្នក ដែលធ្វើដំណើរឆ្លងកាត់ទីកន្លែងនោះ។ មិនត្រឹមតែប៉ុណ្ណោះទេ ខាងក្រុមហ៊ុនដឹកដីខាងលើ ក៏បានបង្កឲ្យធ្លាយបំពង់ទឹកស្អាតរបស់ប្រជាពលរដ្ឋដាច់ទឹកប្រើប្រាស់អស់១ថ្ងៃ ថែមទៀតផង ។
លោកអភិបាលរងក្រុងស្វាយរៀង បានបន្តថា ដោយឃើញសភាពជាក់ស្ដែង រដ្ឋបាលក្រុងស្វាយរៀង ក៏បានឲ្យក្រុមហ៊ុន ដែលបានដឹកដីលក់បង្កឲ្យខូចខាតកំណាត់ផ្លូវបេតុងខាងលើ ធ្វើកិច្ចសន្យាថា នឹងជួសជុលកំណាត់ផ្លូវបេតុងនេះ ឡើងវិញ ក្រោយចប់កិច្ចសន្យារយៈពេលកន្លះខែ។ រហូតមកដល់ថ្ងៃទី១០ ខែធ្នូ ឆ្នាំ២០២៤នេះ ខាងក្រុមហ៊ុនបានឲ្យតំណាងរបស់ខ្លួន មកធ្វើការជួសជុលកំណាត់ផ្លូវនេះឡើងវិញ ក៏ប៉ុន្តែការជួសជុលនេះ គឺវាមិនត្រឹមត្រូវតាមលក្ខណៈស្តង់ដាបច្ចេកទេសនោះទេ ទើបរដ្ឋបាលក្រុងស្វាយរៀង រួមនឹងមន្ត្រីជំនាញ ក៏បានធ្វើការហាមឃាត់ ផ្អាកការជួសជុលសិន ពីព្រោះការក្រងដែក និងដាក់ទំហំដែក មិនត្រឹមត្រូវតាមលក្ខណៈស្តង់ដារនោះទេ លុះត្រាណាធ្វើទៅទៅតាមលក្ខណៈស្តង់ដា ទើបរដ្ឋបាលក្រុង អាចទទួលយកបាន ហើយអនុញ្ញាតឱ្យជួសជុលបន្តទៀតបាន ។
ប៉ុន្តែទោះបីជាយ៉ាងណាក៏ដោយ គេនៅមិនទាន់ដឹងថា ក្រុមហ៊ុនដឹកអាចម៍ដីលក់ខាងលើនោះ នឹងធ្វើការកែតម្រូវការចងសរសៃដែក និងដាក់ទំហំដែកឲ្យត្រឹមត្រូវតាមលក្ខណៈស្តង់ដា នៅពេលណានោះទេ រហូតដល់ព្រឹកថ្ងៃទី១១ ខែធ្នូនេះ ក្រុមហ៊ុនមិនទាន់កិនបង្ហាប់ដី និងក្រាលបាតឡើងវិញទេ គឺគ្រាន់តែចាក់ដីឥដ្ឋ រួចចាក់ទឹកកិនបង្រាប រៀបដែក ចាក់បេតុង តែម្តង ។
បើតាមមន្ត្រីបច្ចេកទេស លើកឡើងថា តាមស្តង់ដា បច្ចេកទេស ការសាងសង់ផ្លូវបេតុងនេះ គឺតម្រូវឲ្យប្រើដែកសរសៃ ថ្នាំងអំពៅ ១០លី ចងក្រឡាដែក ១តឹក ៨ហ៊ុន ប្រើស៊ីម៉ង់តិ៍ ខេស៊ីមែន (KCMEN) ហើយមុននិងចាក់បេតុ ត្រូវកិនបង្ហាប់ដី រួចក្រាលបាត ប្រើថ្ម ទើបរែងដែកដាក់ពីលើ យកទំហំ និងកម្រាស់១តឹកកន្លះ តាមស្តង់ដា កំណត់ទើបរដ្ឋបាលក្រុងទទួល ។
គួររំលឹកផងដែរថា ករណីខាងលើនេះ ប្រជាពលរដ្ឋបានលើកឡើងថា កាលពីព្រឹកថ្ងៃទី២៩ វិច្ឆិកា ២០២៤ កន្លងទៅ នៅភូមិគយត្របែកសង្កាត់គយត្របែក ក្រុងស្វាយរៀង មានក្រុមអាជីវកម្មដឹកអាចម៍ដីលក់ ដែលមានម្ចាស់ក្រុមហ៊ុនឈ្មោះ ជុំ ខាន់ មានទីលំនៅឯខេត្តកំពង់ចាម បានមកធ្វើអាជីវកម្ម ជីករណ្តៅដី និងដឹកអាចម៍ដីលក់ នៅក្រុងស្វាយរៀង បានកំពុងបំផ្លាញផ្លូវបេតុង ១ខ្សែ ប្រវែងជិត២០ម៉ែត្រ បណ្តាលឲ្យស្រុតខូចទាំងស្រុង និងបែកធ្លាយទុយោទឹកស្អាតរបស់ប្រជាពលរដ្ឋ បណ្តាលឲ្យដាច់ទឹកប្រើប្រាស់អស់រយៈពេល១ថ្ងៃ ពេលប្តឹងទៅអាជ្ញាធរសង្កាត់មិនអើពើ សង្ស័យត្រូវសើមមាត់ហើយមើលទៅ ទើបលោកអភិបាលក្រុង ឲ្យជួសជុលជូនប្រជាពលរដ្ឋវិញ និងព្រមានបញ្ឈប់ឲ្យធ្វើអាជីវកម្មទៀតផង ៕
ចែករំលែកព័តមាននេះ