ទីក្រុងម៉ូស្គូ៖ ប្រទេសរុស្ស៊ីថ្លែងថាទំនាក់ទំនងរវាងម៉ូស្គូ និងវ៉ាស៊ីនតោនចាប់ផ្ដើមដើរដល់ដំណាក់កាលប្រឈមមុខគ្នាខ្លាំងមែនទែនហើយដល់ថ្នាក់ថាពលរដ្ឋរុស្ស៊ីបើហ៊ានធ្វើដំណើរទៅអាមេរិកទោះបីនៅក្នុងហេតុផលអ្វីក៏ដោយក៏អាចប្រឈមនឹងគ្រោះថ្នាក់យ៉ាងស្រួចស្រាល់ផងដែរ។ អ្នកនាំពាក្យរុស្ស៊ី លោកស្រីម៉ារីយ៉ា ហ្សាការ៉ូវ៉ា (Maria Zakharova) ថ្លែងថាមិនមែនតែអាមេរិកប៉ុណ្ណោះទេ ប្រទេសកាណាដា និងបណ្ដាប្រទេសខ្លះនៅសហភាពអឺរ៉ុបក៏ពលរដ្ឋរុស្ស៊ីមិនគួរធ្វើដំណើរទៅនោះទេ។
លោកស្រីបានពិពណ៌នាទំនាក់ទំនងរវាងអាមេរិក និងរុស្ស៊ីកំពុងឈានដល់ដំណាក់កាលតានតឹងខ្លាំងសឹងតែផ្ទុះបែកជាពីរទៅហើយ។ «នៅក្នុងស្ថានភាពដែលទំនាក់ទំនងអាមេរិក-រុស្ស៊ីកំពុងតែប្រឈមមុខគ្នាដល់កម្រិតនេះដោយសារកំហុសឆ្គងរបស់វ៉ាស៊ីនតោន រាល់ការធ្វើដំណើរ (របស់ពលរដ្ឋរុស្ស៊ី) ទៅអាមេរិកនៅក្នុងក្របខណ្ឌឯកជន ឬនៅក្នុងរូបណាក៏ដោយឱ្យតែមិនមែនជាក្របខណ្ឌផ្លូវការដែលចាំបាច់ទេ គួរតែជៀសវាងល្អជាង ព្រោះពោរពេញដោយគ្រោះថ្នាក់ខ្លាំងណាស់»។
លោកស្រីថ្លែងបន្តទៀតថា «យើងសូមជំរុញឱ្យអ្នកទាំងអស់គ្នា (ពលរដ្ឋរុស្ស៊ី) ជៀសវាងមិនធ្វើដំណើរទៅអាមេរិក និងប្រទេសដទៃទៀតដែលជាសម្ព័ន្ធមិត្តរបស់អាមេរិកដូចជាកាណាដាជាពិសេស និងបណ្ដាប្រទេសនៅសហភាពអឺរ៉ុប លើកលែងតែប្រទេសអឺរ៉ុបមួយចំនួនតូចប៉ុណ្ណោះដែលអាចធ្វើដំណើរទៅបាន។
គួរកត់សម្គាល់ថាទំនាក់ទំនងនេះបានឈានដល់វិបត្តិធ្ងន់ធ្ងរកាលពីខែវិច្ឆិកានៅពេលអាមេរិកអនុញ្ញាតជាផ្លូវការឱ្យអ៊ុយក្រែនបាញ់មីស៊ីលម៉ាកអាត់តាខំ (ATACMS) ចូលឆ្ងាយៗទៅក្នុងទឹកដីរុស្ស៊ី។ អង់គ្លេសក៏អនុញ្ញាតឱ្យបាញ់មីស៊ីលម៉ាកស្តំសេដូរបស់ខ្លួនចូលឆ្ងាយៗទៅក្នុងទឹកដីរុស្ស៊ីផងដែរ។ ជាកិច្ចឆ្លើយតប រុស្ស៊ីគំរាមបាញ់នុយក្លេអ៊ែរដាក់ប្រទេសទាំងនោះ៕
ចែករំលែកព័តមាននេះ