អន្តរជាតិ ៖ ក្រុមកីឡាបាល់ទាត់ជម្រើសជាតិឥណ្ឌូណេស៊ី គឺជាក្រុមមានកីឡាករវ័យក្មេងជាងគេក្នុងពានរង្វាន់អាស៊ាន AFF Championship ឆ្នាំ ២០២៤ ខណៈដែលសិង្ហបុរី គឺជាក្រុមមានកីឡាករអាយុច្រើនជាងគេ។

ឥណ្ឌូណេស៊ី ក្រោមការដឹកនាំរបស់គ្រូបង្វឹក Shin Tae-yong ដែលសម្រេចដាក់កីឡាករឈុត B ឬអាយុក្រោម២២ឆ្នាំនោះ គឺជាក្រុមមានកីឡាករវ័យក្មេងជាងគេប្រចាំពាន់រង្វាន់ AFF Championship 2024 ដោយក្រុមទាំងមូលមានអាយុជាមធ្យម២០ឆ្នាំ។ ក្រុមរបស់គ្រូបង្វឹកជនជាតិកូរ៉េខាងត្បូងរូបនេះ មានកីឡាករ ២៤រូបក្នុងចំណោម២៦រូប អាយុជាមធ្យម ២០ឆ្នាំ រួមជាមួយកីឡាករលេងនៅបរទេសចំនួន៥រូបផងដែរ។

សិង្ហបុរី គឺជាក្រុមមានកីឡាករអាយុច្រើនជាងគេប្រចាំព្រឹត្តិការណ៍នៅឆាំ្ននេះ។ ក្រោមការដឹកនាំរបស់គ្រូបង្វឹក Tsutomu Ogura សម្រេចកោះហៅកីឡាករឆ្នើមៗ ភាគច្រើនលេងនៅលីគក្នុងស្រុក។ កីឡាករទាំង២៦រូបរបស់គ្រូបង្វឹកជនជាតិជប៉ុនរូបនេះ រួមជាមួយកីឡាករលេងនៅបរទេស១រូប មានអាយុជាមធ្យម ២៨ឆ្នាំ។

ដោយឡែក ក្រុមទីម័រខាងកើតមានកីឡាករអាយុជាមធ្យម ២២ឆ្នាំ ក្រុមឡាវមានកីឡាករអាយុជាមធ្យម ២២ឆ្នាំ ក្រុមហ្វីលីពីនមានកីឡាករអាយុជាមធ្យម ២៤ឆ្នាំ ក្រុមមីយ៉ាន់ម៉ាមានកីឡាករអាយុជាមធ្យម ២៤ឆ្នាំ ក្រុមកម្ពុជាមានកីឡាករអាយុជាមធ្យម ២៥ឆ្នាំ ក្រុមម៉ាឡេស៊ីមានកីឡាករអាយុជាមធ្យម ២៥ឆ្នាំ ក្រុមការពារតំណែងជើងឯកថៃ មានកីឡាករអាយុជាមធ្យម ២៦ឆ្នាំ ក្រុមវៀតណាមមានកីឡាករអាយុជាមធ្យម ២៦ឆ្នាំ។

ពានរង្វាន់ AFF Championship 2024 ចាប់ផ្តើមពីថ្ងៃទី៨ ខែធ្នូ ឆ្នាំ២០២៤ ដល់ថ្ងៃទី៥ ខែមករា ឆ្នាំ២០២៥ មាន១០ប្រទេសចូលរួម ដោយចែក ជា២ពូល ពូល A រួមមាន កម្ពុជា ថៃ ម៉ាឡេស៊ី សិង្ហបុរី និង ទីម័រខាងកើត។ ចំណែកពូល B រួមមាន វៀតណាម ឥណ្ឌូណេស៊ី ហ្វីលីពីន មីយ៉ាន់ម៉ា និង ឡាវ។ ក្រុមលេខ១ និងលេខ២ នៃពូលទាំងពីរបន្តឡើងទៅវគ្គពាក់កណ្តាលផ្តាច់ព្រ័ត្រ។

ក្រោយបញ្ចប់ការប្រកួតបើកឆាកពានរង្វាន់ AFF Championship 2024 យើងបានឃើញ ពូល A ម្ចាស់ផ្ទះកម្ពុជាបានត្រឹមស្មើជាមួយម៉ាឡេស៊ីលទ្ធផល ២-២ ស្របពេលដែលក្រុមភ្ញៀវថៃ បំបាក់ទីម័រខាងកើតលទ្ធផល ០-១០ កាលពីថ្ងៃទី៨ ខែធ្នូ។ ពូល B ម្ចាស់ផ្ទះមីយ៉ាន់ម៉ាចាញ់ឥណ្ឌូណេស៊ីលទ្ធផល ០-១ ស្របពេលក្រុមភ្ញៀងវៀតណាម បំបាក់ឡាវលទ្ធផល ១-៤។

គួរបញ្ជាក់ថា ពានរង្វាន់ជើងឯកអាស៊ានពីមុនត្រូវបានហៅថា AFF Championship ឬ AFF Cup បច្ចុប្បន្នជា ASEAN Mitsubishi Electric Cup ផ្អែកលើម្ចាស់ឧបត្ថម្ភ គឺជាការប្រកួតរៀបចំដោយសហព័ន្ធបាល់ទាត់អាស៊ីអាគ្នេយ៍ (AFF) សម្រាប់ក្រុមបុរស ។ បង្កើតឡើងដំបូងនៅឆ្នាំ ១៩៩៦ បច្ចុប្បន្ន ថៃឈ្នះជើងឯកច្រើនជាងគេពោល៧សម័យកាល, សិង្ហបុរី ឈ្នះ៤សម័យកាល, វៀតណាមឈ្នះ២សម័យកាល និងម៉ាឡេស៊ីឈ្នះ១សម័យកាល៕ រូបភាព ៖ PSSI, Football Association of Singapore និង Garuda Stats